Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Maietz Pazko jaien ordua ailegatu da

Busturialdeko Hitza — 2026-05-20 17:10:38

Sanisidroen lekukoa hartzera datoz Maietz Pazko jaiak, eta Arratzun, Muxikan eta Sukarrietan gogotik ospatzeko prest daude. Egitarau oparoak prestatu dituzte, Busturialdeko herri txikietan ospakizun handiak prestatzen dituztela erakusten dutenak. Hala, festa eta giro herrikoia nagusituko dira hiru udalerrietan datozen egunetan.

Arratzu eta Muxika izango dira jaiei ekiten lehenak, bariku [maiatzak 22] iluntzean ekingo baitiote biek festari. Ugarten dute hitzordua muxikarrek, 20:00etan, orduan botako baitute txupinazoa. Jarraian, bakailao jana eta pultsu txapelketa izango dituzte aukeran. Edonork izango du bigarrenez egingo duten txapelketan parte hartzeko aukera, izen ematea egunean bertan egingo baita. Horiek bukatuta, Taixuz erromeriagaz biribilduko dute eguna.

Goizean atseden hartuta, zapatu eguerdian [maiatzak 23] jarraituko dute egitarauagaz, auzo poteoan eta herri bazkarian elkartuta. Gaur [maiatzak 20] da bazkarirako tiketak eskuratzeko azken eguna, 618 01 14 67 telefono zenbakira WhatsApp-a bidalita. Gainera, ez dira briska eta mus txapelketak eta musika emanaldiak faltako, Apokhalipsis eta Orkestra Elektrotxaranga igoko baitira oholtzara.

Domekan [maiatzak 24], jaiak agurtzeko, urteroko balkoitik balkoira arteko bertso saioan batuko dira herritarrak. Goi mailako bertsolariez gozatuko dute, Onintza Enbeita Maguregi muxikarra eta Aitor Etxebarriazarraga Gabiola gernika-lumotarra igoko baitira aurten balkoietara.

Bost eguneko festa.
Arratzuarrak ere 20:00etan batuko dira etzi, Goikuri Elkartearen eskutik pregoia entzun eta txupina botatzeko. Buruhandien kalejiraren ostean, horiek ere mahai ingurua izango dute topagune, sartenekoa dastatzeko. Muxikan bezala, Arratzun ere ez dira dantza eta kantua ere ez dira faltako, Gora Herria erromeriaz gozatuko baitute 22:30etik aurrera.

Zapaturako ere egun guztiko egitaraua ondu dute, eta ez dira herri kirolak, herri bazkaria, irrintzi txapelketa edota playback-a faltako. Bazkarirako txartelak Arratzuko Herriko Tabernan eskuratu daitezke, eta play-backerako izen ematea ere zabalik dago: arratzukojaibatzordea@gmail.com helbide elektronikora mezua bidali beharko da zapatua aurretik, talde parte hartzailearen izena eta abestia adierazita —MP3 formatuan edo esteka ipinita—. Jaia goizaldera arte luzatu asmoz, Gauergi Erromeria eta DJ Areneren emanaldiak egongo dira.

Domeka goiza frontoian igaroko dute arratzuarrek, Arratzuko Esku Pilota txapelketaren finalak lehiatuko baitira. Astelehena [maiatzak 25], berriz, hiru eguneko egitarauaren ostean indarrak berreskuratzeko hartuko dute, eta martitzenean [maiatzak 26] jarraituko dute festagaz: meza ostean Maietz Pazko bazkarian batuko dira, herriko tabernan. Arratsaldean Oier Juradoren magia ikuskizunaz gozatu ostean, Arratzuko Piñabolak Otxotearen eskutik jai amaierako txupina botako dute.

Sukalki eguna.
Sukarrietan ere asteburu berezia dute aurretik. Zapatuan sukalki lehiaketan batuko dira, sukalki errezeta tradizionala prestatzen trebeena nor den ezagutu eta eguna lagunartean pasatzeko.

Kozinatu bitartean baina, ez dira Sustabiz Fundazioaren eskutik herri kirolak faltako, eta saio parte hartzaileen bidez, arrauna eta bestelako herri kirolak ezagutu ahal izango dituzte. Gainera, Gari Elorriaga, Patxi Bilbao, Ane Antxutegi eta Jon Onaindiak erakustaldia ere eskainiko dute, 13:00etatik aurrera. Ostean, sukalki lehiaketako sariak banatu eta herri bazkarian batuko dira.

Egun lasaiagoa izango dute domekan sukarrietarrek, baina edonola ere, ez da jan-edanik faltako. 13:30ean sardinada izango dute aukeran, Plazuelan. Ostean, Plazato tabernan lehiatuko duten mus txapelketaren 24. aldiagaz agurtuko dituzte jaiak, datorren urtera arte.

EGITARAUAK, HERRIZ HERRI:

ARRATZU

Maiatzak 22, barikua
- 20:00. Jaien hasiera. Pregoia eta txupina, Goikuri Elkartearen eskutik.
- Ostean. Buruhandien kalejira.
- 21:00. Sartenekoa.
- 22:30. Gora Herria erromeria.
Maiatzak 23, zapatua.
- 11:30-13:00. Pottokak.
- 13:00. Herri kirolak: Bizkaiko Lasto Botatze Txapelketa.
- 15:00. Herri bazria frontoian. Txartelak Arratzuko herriko tabernan salgai.
- 15:30. Umeentzako ekintzak Ehunzangoren eskutik.
- 19:00. Herritarren arteko irrintzi txapelketa.
- 20:00. Playback. Maiatzaren 18tik 23ra arte email (arratzukojaibatzordea@gmail.com) bidez izena eman behar da, eta parte hartzaileen izena eta abestia bidali beharko dira.
- 22:30. Gauargi erromeria.
- Ondoren. Dj Arene.
Maiatzak 24, domeka.
- 11:00-14:00. Arratzuko Esku pilota txapelketaren finalak.
- 12:30. Meza nagusia, Arratzuko koriak abestuta.
Maiatzak 26, martitzena.
- 13:00. Meza.
- 15:00. Maietz Pazko bazkaria herriko tabernan.
- 18:00. Oier Jurado, magoaren ikuskizuna.
- Ostean. Txokolate beroa guztiontzat.
- 20:00. Arratzuko Piñapolak Otxotearen eskutik, jai amaierako txupina.

MUXIKA

Maiatzak 22, barikua.
- 20:00. Txupinazioa Egundo taldearekin.
- Gero. Makailo jana.
- Ostean. II. Pultsu txapelketa. Izena eman beharko da egunean bertan.
- 22:30. Taixuz erromeria.

Maiatzak 23, zapatua.
- 13:30. Auzo poteoa.
- 14:30. Bazkaria. Izena eman beharko da maiatzaren 20a aurretik, 618 01 14 67 telefonora whatsappa bidalita.
- 16:30. Goitibehera lasterketa.
- 17:30. Briska eta mus txapelketa. Izena eman beharko da egunean bertan.
- 21:00. Kontzertuak: Apokhalipsis eta Orkestra elektrotxaranga.
Maiatzak 24, domeka.
- 12:00. Meza.
- 13:00. Basotxoritxu dantza taldea.
- 14:15. Balkoitik balkoira bertso saioa Onintza Enbeita Maguregigaz eta Aitor Etxebarriazarraga Gabiolagaz.

SUKARRIETA

Maiatzak 23, zapatua.
- 09:00. Txupinazoa.
- 10:00. XLII. Sukalki lehiaketarako izen ematea.
- 10:30. Pilota partiduak, Arkupe Sustabiz Kirol Elkarteko pilotariekin.
- 11:30. Sukarrietako Kantagune taldea, kalez kale.
- 13:00. Herri kirol erakustaldia: Gari Elorriaga (Gernika-Lumo), Patxi Bilbao (Amoroto), Ane Antxutegi (Usansolo) eta Jon Onaindia (Mendata).
- 14:00. Sukalki kazolen aurkezpena.
- 14:30. Sari banaketa.
- 15:00. Herri bazkaria, parkean.
- 17:30. Haurren jokoak, parkean.
Maiatzak 24, domeka.
- 11:00. Meza nagusia.
- 12:00. Trikitixa.
- 13:30. Sardinada, Plazuelan.
- 17:00. 24. Mus Txapelketa, Plazatxo tabernan.

Bestelako basogintza eredua, jomuga

Busturialdeko Hitza — 2026-05-18 14:15:27

BaSOS Elkarteak antolatuta, Baso Bizien Eguna ospatu zuten zapatuan [maiatzak 15], Muxika eta Gernika-Lumo artean. Busturialdeko elkartea Baso Biziak plataformaren partaideetako bat da, eta hari egokitu zaio aurtengoan basogintzaren inguruko hausnarketa eta kultur jarduna uztartzen dituen egun berezia atontzea. Zapatuan, goizetik iluntzera bitartean, “bestelako” basogintza eredu bat hartzea “ezinbestekoa” dela aldarri egin zuten, eta herritarrek ederto erantzun zioten aldarri hari, Baso Bizien Egunak “erantzun polita” eduki baitzuen.

Baso bizia bailitzan, bertaratutako guztiek “ekosistema anitza” eratu zutela adierazi dute: “Denetariko herritar profilez osatutako partaidetza eduki genuen, eta egitarauko egitasmo guztietan 40 lagun edo gehiago egon ziren. Iritzi positiboak eta eraikitzaileak jaso ditugu, eta egunaren geure balorazioa, horrenbestez, oso positiboa izan behar da nahitaez”. Natura mintzagai izanik, naturara zuzen-zuzenean jo zuten goizean: Muxikan txangoa egin zuten. “Eibar, Elgoibar edota Berriatutik ere” martxalariak hurreratu ziren, BaSOS ontzen ari den proiektuak bertatik bertara ezagutze aldera: “Alde batetik, Muxikako Udalagaz dugun hitzarmenaren berri eman genien; 16 hektareako pinudi gaixo baten lagapena lortu dugu, eremu hori pixkanaka bertoko baso bihurtzeko eta modu iraukorrean ustiatzeko gune bilakatzeko helburuarekin. Bestetik, Ordorikako lursailean egiten ari garen beharra azaldu genien, sail horiek urrundik ikusi ahal izan baikenituen”.

Argazkia: BaSOS elkartea.

Urkietako arte zaharrak geldialdi berezia hartu zuen: Onintza Enbeita muxikarraren eta Ibai Amillategi gernika-lumotarraren bertso saioatxoa. Lilibertsoko kideen esku hartzea “oso hunkigarria” izan zen: “Enbeita, bertakoa izanik, hunkituta aritu zen bertsotan; umoretik ere heldu zioten han sortutako giroari. Oro har, Urkietakoa geldialdi gogoangarria izan zen”. Ez zen inolaz ere tropelak eduki zuen geldiune bakarra izan, bigarren bat unean bertan inprobisatu baitzuten: Enbeitak San Roman auzuneko dorretxera eroan zituen bertaratutakoak, eta han toki eta eraikin hari buruzko azalpenak eman. “Basogintza egitarauaren ardatza zen, baina bestelako aisi, kontzientziazio zein kultur langaiek ere tokia izan zuten egun osoan zehar”.

Basogintza, hiru adarretatik.
Muxikatik Astra kultur faktoriara lekualdatu zen egitaraua. Eguerdian, Zuhaitzen bizitza ezkutua lanaren ordu erdiko aurkezpen ekitaldia egin zuten; Maider Etxebarriak zuhaitzen funtzionamendua zientziaren prismatik ikertu du obra horretan, eta hari buruzko zertzelada nagusiak plazaratu zituen. Talde bazkariaren ostean, basogintzaren egungo egoera eta etorkizunari dagokiona mahaigaineratu zituzten, hiru ikuspegitatik. EHNE Bizkaiako Unai Aranguren, Tantai Baso Jabe Kooperatibako Aitor Kortabarria eta Iratxe Arriola EH Bilduko batzarkidea jesarri ziren mahaiaren inguruan.

Arangurenek baso jabe txikiekin “kontaktua” duen nekazari zein abeltzain txikien egoera plazaratu zuen; Arriolak basoen inguruko foru arauaren inguruan duen eskarmentua partekatu zuen; Kortabarriak “basogintza eredu berri bat planteatzeko garaia” dela argitu zuen, “aldaketarako inflexio puntu batean gaudela” argituz. Sektorearen prekarizazioa nabarmentzea izan zen berbaldiaren gailurretako bat: “Beharginen egoera zein den argi eta garbi utzi gura izan zuten, eta azpimarratu lan istripu gehien dituen arloetako bat dela”. Basogintzagaz lotutako dirulaguntzak espezie jakin batzuen inguruko eredu “industrial” batera bideratzea ere jorratu zuten, besteren artean.

Argazkia: BaSOS elkartea.

Solasaldiarekin batera, Basogintza iraunkorra bultzatzen ikus-entzunezkoaren proiekzioa eman zuten, Muxikako Udalarekin egindako lagapen akordioa ontzen duena: “Eduki horrek ere, batik bat, basogintza eredu intentsiboaren gainbehera irudikatzen du, eta basogintza bestelako modu batean ulertzeko moduak egon badaudela argitzen du.

Kurtzeroko plaza eta jolasgune berdea, gero eta hurbilago

Busturialdeko Hitza — 2026-05-15 06:08:44

Kurtzero auzoan elkargunea sortzeko pausoak ematen ari dira Muxikako Udala eta herritarrak. Auzoko aparkaleku nagusian, plaza eta jolasgune berdea eraikiko dituzte, eta bide horretan, eskutik helduta doaz udala eta bertako bizilagunak: «Muxikako Udala oso konprometituta dago gobernantza kolaboratiboagaz. Herritarren parte hartze aktiboa bilatzen dugu udalerrian egiten diren proiektu guztietan, tartean, hirigintza-proiektuetan. Izan ere, uste dugu funtsezkoa dela espazio horiek erabiliko dituzten herritarrek zeresana edukitzea proiektua pentsatzen hasten den momentutik». Kasu honetan ere, herritarrekin egon dira lehenengo diagnostikoa egiteko.

Ondoren, azterketa horretatik ateratako informazio guztiagaz, proiektua idatzi zuten, eta orain, aurreproiektua esku artean daukatela, horri ekarpenak edota hobekuntzak egiteko aukera eduki dute herritarrek: «Horrela, ibilbide guztia, proiektua pentsatu zenetik, egingo denera arte, herritarren eskutik egin izan da, beste proiektu askotan egin dugun moduan».

«Herritarren parte hartze aktiboa bilatzen dugu udalerrian egiten diren proiektu guztietan»

Muxikako Kurtzeroa azkenengo urteetan asko hazi den auzoa da, etxebizitza berri asko eraiki dituzte, eta gaur egun, udalerriko auzorik populatuena da, hau da, udalerriaren biztanleriaren zati handiena bertan bizi da. Paradoxikoki, baina, auzoak ez dauka elkargune natural bat, ez dauka herriko plaza bat edo jendea elkartzeko gunerik. Udal gobernu taldeak espazio publiko baten falta sumatzen zuen, non jendea elkartu ahal izango den, eguraldi txarra dagoenerako gune estali bat edukiko duen, umeekin egoteko gune bat… Pandemian beharrizana areagotu zen: «Ezin ginen irten udalerritik, eta udaletik ikusten genuen gabezi hori herritar askok ere ikusi zuten. Herritar askok helarazi zigun Kurtzeroan horrelako espazio bat behar zutela».

Auzoaren beharrizana
Horrenbestez, 2021. urtean udaberrian, parte hartze prozesu bat martxan ipini zuten. Aparkaleku berdeei buruzko parte hartze saio bat egin zuten, eta herritarren erantzuna «oso ona» izan zen: «Herritar pila batek parte hartu zuen». Saio horretatik ateratako ondorioetako bat izan zen Kurtzeroan dagoen aparkalekua «gaindimentsionatuta dagoela, benetan auzoak daukan beharrizanerako». Hau da, aparkalekua handiegia da, eta ez du horrenbeste ibilgailuk bertan aparkatzen. Eta, aldi berean, herritarrak egoteko gune bat falta zela ondorioztatu zuten.

Beraz, parte hartze saio horretan proposamen bat zehaztu zen: aparkalekuari zati bat kentzea eta plaza edota elkargune bat eraikitzea, baita umeentzako espazio bat ere, espazio berdea, jolasgune bategaz.

Horri helduta, aurreproiektua egin zuten, aurrekontua zehaztuz. Horiek aztertuta, eta kontuan edukita aurreproiektua «oso handia» dela, Muxikako Udalak erabaki du proiektua bi fasetan gauzatzea.

«Kurtzeroko aparkalekuaren espazioa berrantolatu, eta erabilera berriak adostu ditugu guztion artean»

Lehenengo fasean, plaza eta jolasgunea eraikiko dituzte. 250.000 euro inguruko inbertsioa egitea eta lanak urtea amaitu aurretik esleitzea aurreikusi dute.

Bigarren faseari datorren urtean ekingo diote. Fase horretan, estalkia ipiniko dute.

Bide horretan, iragan eguen arratsaldean Kurtzeroko plaza eta jolasgune berriari buruzko parte hartze saioa egin zuten, Zubieta-Errota Udal Liburutegian: «Ideia nagusiak eduki ditugu, eta aurreproiektua eginda dago; beraz, aurreko asteko saioaren helburua izan zen herritarrek aurreproiektuari ekarpenak egitea, herritarren eskutik, azkenengo proiektuari hobekuntzak sartzeko».

Gainera, Umeen Kontseiluaren bidez, udalerriko umeen ekarpenak eta proposamenak ere jaso ditu Muxikako Udalak: «Parte hartze saio emankorra izan zen. Kurtzeroko aparkalekuaren espazioa berrantolatu, eta erabilera berriak adostu ditugu guztion artean, eta ateratako ondorioei herriko haurrekin egindako saioan egin zituzten ekarpenak ere gehituko zaizkie. Kurtzeroko plaza berria eta jolasgune berdea gero eta hurbilago dago!».

Parte hartze saioa
Egueneko parte hartze saioan, hiru ariketa planteatu zizkieten, eta bakarka zein taldetxoetan bilduta egin zuten lanketa. Horrela, gaur egun bakoitzak espazio horri ematen dion erabilera eta harekiko daukan pertzepzioa jaso zituzten. Gunearen potentzialtasuna eta dauzkan mugak zehaztu eta zelan hobetu daitekeen hausnartu zuten. «Orain, egunerokotasunean ematen dioten erabileraz gain, jendeak etorkizunean zelan imajinatzen duen ikusi nahi izan dugu. Espazioa hobeto aprobetxatzeko, guneari etekina ateratzeko, erabakia hartu dute, eta ekarpenak jaso ditugu».

Baso Bizien Egunez, bertoko basoak balioan jarri eta horiek aldarrikatuko dituzte

Busturialdeko Hitza — 2026-05-13 15:44:53

Baso Bizien Eguna ospatuko dute aurten, Muxika eta Gernika-Lumo artean. Baso Biziak plataformako kide da BaSOS Elkartea, eta aurten beraiek hartu dute eguna antolatzeko ardura. Izan ere, azken urteotan egin dituzten ekimenengatik —crowdfunding kanpainak, Muxikako Udalarekin sinatutako hitzarmena eta egindako landaketak— talde aktiboa dela nabarmendu dute plataformakoek, eta horregatik eskaini diete egunaren antolakuntzaren ardura hartzea. Plataforman hainbat talde ekologista (tartean Eguzki), natur talde eta, batez ere, herri eta eskualde mailako basogintzaren beste eredu bat aldarrikatzen duten elkarteak biltzen dira, eta horren alde egingo dute zapatuan (maiatzak 16), goizean hasi eta iluntzera bitartean.

Ekimenaren helburu nagusia bertoko basoen garrantziari buruzko kontzientziazioa sustatzea da, bertoko basoak balioan jartzeko eta horiek aldarrikatzeko. Ze, gogorarazi dute Bizkai, Araba eta Gipuzkoako lurraldearen erdia baino gehiago zuhaitzez estalita dagoela, eta zuhaitzek eskaintzen dituzten zerbitzu ekosistemikoak “ezinbestekoak” direla. Hala ere, “bertoko basoen atzerakadarekin” eta “basogintza eredu intentsiboaren hedapenarekin”, funtzio garrantzitsu asko galtzen ari direla ohartarazi dute: lurzoruaren kalitatea, ur kantitatea eta uraren kalitatea, besteak beste. Horregatik, egunari aldarrikapen kutsua eman nahi diote, kontzientziazio lana egiteko asmoz.

Egitarauaren barruan hainbat jarduera antolatu dituzte. Beste urte batzuetan bezala, aurten ere txango bat egingo dute, aisialdia, kultura eta natura uztartzeko helburuarekin. Muxikan izango da irteera, BaSOSek bertan duelako landaketak egiten aritu den lursaila. Gainera, Muxikako Udalarekin egindako hitzarmenaren bidez, 16 hektareako pinudi gaixo baten lagapena lortu dute, eta helburu dute eremu hori pixkanaka bertoko baso bihurtzea. “Aldi berean, egurra modu iraunkorrean ustiatzeko gune bilakatzea nahi dugu. Erreferentzia bat sortu nahi dugu, erakusteko bertoko basoekin ere kalitatezko eta errentagarria izan daitekeen egur ustiapena posible dela”, adierazi dute.

Txangoan Urkietako artea bisitatuko dute, eta handik Ordorikako BaSOSen lursaila ikusi ahal izango dela gehitu dute. Ordu eta erdiko ibilbidea izango da, eta Urkietako artean Onintza Enbeitak eta Ibai Amillategik bertso batzuk eskainiko dituztela gehitu dute, “kultura eta natura uztartzeko”.

Ondoren, parte-hartzaileak Gernikako Astrara lekualdatuko dira. Bertan, Zuhaitzen bizitza ezkutua liburuaren aurkezpena egingo dute. Liburuaren itzultzaile Maider Etxebarriak zuhaitzen funtzionamendua ikuspegi zientifikotik azaltzen duen lanaren nondik norakoak aurkeztuko ditu labur-labur. Eta, bazkaltzeko txanda ailegatuko zaie bertaratzen direnei.

Bazkalostean, aldiz, EHNEk eta Tantaik elkarlanean egindako Basogintza iraunkorra bultzazen bideoaren proiekzioa eskainiko dute. Lan horretan, Muxikako Udalarekin egindako lagapen hitzarmena jorratzen da, eta, antolatzaileen arabera, bideoa aitzakia izango da ondoren egingo den solasaldia testuinguruan kokatzeko.

Solasaldian basogintzaren oraina eta etorkizuna izango dituzte hizpide. Antolatzaileek azaldu dutenez, Bizkaian une berezia bizi da: mendiei buruzko foru arauaren onarpena, eukaliptoaren moratoria eta Busturialdean martxan dauden eztabaidak direla medio. Nabarmendu dute Busturialdearen %70 zuhaitzez estalita dagoela, baina, Urdaibai Biosfera Erreserba izan arren, gaur egungo paisaiak kezka sortzen duela. Horren aurrean, basogintza eredu berri bat planteatzeko garaia dela defendatuko dute, iraunkorragoa izango dena eta gizartearen zein naturaren arteko oreka bilatuko duena. “Uste dugu gaur egungo egoerari buelta bat eman behar zaiola eta momentua dela beste basogintza eredu bat planteatzeko, iraunkorragoa dena eta gizartearen naturaren oreka baterantz bideratuta dagoena”, diote.

Horretarako, mahai-inguruan basogintzaren inguruan adituak diren hiru lagunek parte hartuko dute: Unai Arangurenek (EHNE Bizkaia), Aitor Kortabarriak (Tantai Baso Jabe koperatiba) eta Iratxe Arriolak (EH Bildu). “Unaik nekazaritza eta abeltzaintza arloko ikuspegia emango du; Aitorrek, baso-jabeen kooperatibako eta sektoreko langile gisa berba egingo du, sektorearen errealitatea azalduz; eta Iratxek mendiei buruzko foru arauaren eztabaidan izandako esperientzia partekatuko du, Bizkaiko legebiltzarkide moduan egindako lanetik abiatuta”, azaldu dute antolatzaileek.

Solasaldian gaur egungo egoera aztertuko dute Bizkaian eta Gipuzkoan, eta sektoreko langileen lan baldintzez, diru laguntzez eta instituzioekin dituzten harremanez ere ariko dira. Era berean, landa eremuaren eta mendien arteko lotura landuko dute, kontuan hartuta lurjabe asko nekazari edo abeltzainak direla. “EHNE bezalako sindikatuak mendien egoeraz jabetzen hasi direla eta horren inguruan zerbait egiteko beharra ikusten dutela ere azpimarratu nahi dugu”, diote.

Antolatzaileen ustez, gaur egungo testuingurua “bereziki garrantzitsua” da Bizkaian, ikuspegi instituzionaletik, sozioekonomikotik eta batez ere ekologikotik. Krisi klimatikoaren testuinguruan, Busturialdean basoen inguruko lanketa sakona egiteko “une egokia” dela uste dute, eta Urdaibai “esperientzia berrien laborategi” bihur daitekeela defendatu dute. Hori horrela, herritarrei egun osoko ekitaldietara beldurrik gabe gerturatzeko deia egin diete.

EGITARAUA.
10:30-12:00. Muxikako udaletxetik abiatuta, 6km-ko txangoa: Zertan gabiltza BaSOSen? galderari erantzungo diote, eta Onintza Enbeita eta Ibai Amillategi lagun izango dituzte.
13:00-13:30. Zuhaitzen bizitza ezkutua liburuaren aurkezpena Maider Etxebarria liburuaren itzultzailearen eskutik, Astran.
14:30-16:30. Bazkaria, Astran.
16:30-18:00. Basogintza iraunkorra bultzazen bideoaren aurkezpena, Astran.
Gero. Basogintzaren oraina eta geroa solasaldia, Unai Aranguren (EHNE Bizkaia), Aitor Kortabarria (Tantai Baso Jabe koperatiba) eta Iratxe Arriolaren (EH Bildu) eskutik, Astran.

Inurri txikien jaia, ederra bezain aberatsa

Busturialdeko Hitza — 2026-05-07 15:50:35

“Iñurrien antzera pauso txikiz aurrera, amestera”, dio ETS musikaren abesti ezagunak, eta txikitasunetik amestea zer den ondo baino hobeto dakite eskola txikiek. Iñurri lana egiten dute egunez egun, eta emaitza oparoak lortzeko gai direla erakusten dute. Gaur [maiatzak 7], inurri horien topaleku izan da Gautegiz Arteaga: XIX. Busturialdeko Eskola Txikien Jaia ospatu dute.

Gautegiz-Arteagako Montorre Eskolak antolatu du aurtengo hitzordua, eta Urretxindorra (Muxika), Uzelai (Busturia), Mundaka eta Haizeder (Ea-Elantxobe-Ibarrangelu) eskolako lagunekin giro ederrean elkartu ziren. Gutxi gora behera 500 ikasle inguru bat egin dute jaian, baina irakasle, guraso eta laguntzaileekin ia 800 lagun elkartu dira.

10:15ean Montorre Eskolakoen harreragaz hasi dute jaialdia, herriko plazan, eta jarraian, horiek bertsoak eta koplak abestu dituzte, eta elkarrekin talde argazkia atera dute. Ondoren, dantza entseguak egin, eta 11:30ean hasi dute dantza ikuskizuna.

Betiko moduan, adin tarteetan banatuta egin dute dantzan. 2-3 urte bitarteko umeek Kilimak abestiaren erritmora dantzatu dute, eta 4-5 urte bitartekoek Ene Kantak-en Ikasle berri bat abestiarenera. Gero, Lehen Hezkuntzakoak atera dira plazaren erdira. Lehenengo ziklokoek The Uski’s eskualdeko taldearen Horrelako aukeratu dute euren koreografia eskaintzeko, bigarren ziklokoek Goazenen Dantza dezagun hil arte eta hirugarren ziklokoek Duplaren Ongi etorri.

Gero, berriz, jolasetarako eta tailerretarako tartea hartu dute, txokotan banatuta; batzuk herriko plazan elkartu dira, eta beste batzuk, ostera, parkean.

13:15ean elkarrekin bazkaldu ostean, 15:30ean agurtzeko ordua heldu zaie. Amaierako ekitaldia bertsoekin eta biribilketan elkartuta girotu dute, eta Gautegiz Arteagakoek Muxikakoei pasatu diete lekukoa; izan ere, datorren urtean Urretxindorra Herri Eskolan elkartuko dira euren jai handia ospatzeko.

Emakumeena ere bada historia

Busturialdeko Hitza — 2026-05-04 16:47:40

Miren Enbeita, Gregoria Ajuriagojeaskoa, Ziriaka Uribe, Miren Iza, Margari Euba eta Juana Auzokoa. Izen propiodun Muxikako sei andra izan ziren, jostunak, Bizkargiko fronteko mendi tontorrean 1937an egon ziren gudariei txamarrak josi zizkietenak. Historiako liburuetatik kanpo gelditu ziren seirak, baina, atzo (maiatzak 3), Bizkargin beraien historia gogoratu zuten, eta emakume horien izenak historiaren lehen lerrora eraman zituzten. “Gerrari buruz berba egiten dugunean beti imajinatzen ditugu gizonezkoak mendian armekin: gudariak, milizianoak, errepublikarrak, abertzaleak… baina apurbat beherago, menditik apur bat beherago ere gerra egon zen, eta gerraren ondorioak jasan eta borrokatu zituzten beste gizon-emakume askok. Seguruenik epika gutxiagogaz, baina ondorio larri beragaz. Eta konturatu ginen umetan kontatu ziguten gerra historietatik oso urrun zegoela emakume hauen historia, baina garrantzitsuak izan zirela Bizkargiko fronterako”, adierazi zuen bertan Onintza Enbeitak.

“Arkeologia feminista egin behar izan dugu andran izenak topatzeko. Baina egon badaude: memorietan, asko; eta han-hemen idatzita, ez asko”

Izan ere, 1937an, Euskal Herriko beste hainbat txokotan bezala, Espainiako tropa frankistek airez eta lurrez eraso zioten Bizkargi mendiari. 7 egunez egon ziren gerran, eta, borrokaldi luze horien ostean, faxistek tontorra bereganatu zuten. Ordutik, efemeride hori gogoratzen dute Bizkargi Egunean. Eta atzo ere memoria historiko hori landu zuten, eta historiari “beste begi batzuetatik” begiratu zioten. Izan ere, sei emakume horien historia izan zuten gogoan, eta beraien izenak historiatik ez borratzea aldarrikatu zuten. “Jostea ekintza xumea da, xumeegia akaso, horri buruz historiako liburuetan idazteko. Historia normalean kausa handiz eta gizonen izenez idatzita egoten da. Gurea ere bai. Bizkargi entzuterakoan milizianoak, errepublikarrak, abertzaleak etortzen zaizkigu gogora, gizonak gehienak. 36ko gerrako gure imajinario osoa gizonek osatzen dute: gudariak, politikariak… denak margoztu ditugu gizonez. Faxismoaren aurrean pauso bat egin zuten gizonen berri jaso dugu etxeetan, eskoletan, liburuetan”, argi azaldu zuen Enbaitak.

Argazkia: Muxikako Udala.

Baina faxismoari “leku eta era askotan egin behar zaiola aurre” gehitu zuen, eta, Enbeitaren, Ajuriagojeaskoaren, Uriberen, Izaren, Eubaren eta Auzokoaren historia aipatu zuen, horien izenak topatzeko “arkeologia feminista” egin behar izan dutela azpimarratuta: “Arkeologia feminista egin behar izan dugu andran izenak topatzeko. Baina egon badaude. Gugandik ez hain urrun: memorietan, asko; eta han-hemen idatzita, ez asko. Guk zortea izan genuen Gregoria Ajuriagojeaskoa ia 100 urte bizi izan zelako eta harek zuzenean kontatu zigulako Muxikako sei andra egon zirela kartzelan Bizkargiko gudariei txamarrak jostearren”.

Beraien esku zeuden armak jarri zituztela gudarien esku azaldu zuen: josteko makinak. “Euskal Herriaren alde egin zuten josteko makinekin. Bizkargitik hurbil bizita, arropak baino gehiago, sare bat josi zuten Bizkargiko fronteari laguntzeko. Jostea ekintza xume bat dela esan daiteke, baina orduan esku guztiak behar izan ziren kausa bakarraren alde eta arerio bakarraren kontra egiteko”. Sei andre horien historia kaxoi batean gordeta egon da urte luzez, baina duela urte batzuk hori berreskuratzea eta erreibindikatzea erabaki zuten muxikako andrek, “gerra ez delako bakarrik bonbekin egiten, gerra galtzeko eta irabazteko modu asko daudelako”.

Sei horiek kartzelara eraman zituzten, eta “las seis mugiquesas” bezala ziren ezagunak han. Hala kontatu zien Ajuriagojeaskoak herrikideei: “Jateko txarra egoten zela, etxetik eroandako koltxoiak izan arte ezin izan zutela lo egin, hezetasunez beteta egon zirela, tratua ez zela bereziki ona… eta beste gauza asko esan zizkigun. Beti akordatuko gara Gregoriak esaten zigunaz: presoen alde egiteko beti, han dagoena ez dagoelako ondo”.

Argazkia: Muxikako Udala.

Kartzelara zergatik heldu ziren ere ez zitzaion ahaztu Ajuriagojeaskoari, eta berak kontatu legez gogoratu zuen Enbeitak atzo Bizkargin: “Ironia handiz zioen auzoan ‘lagun onak’ izan zituztelako amaitu zutela kartzelan. Orduan ere, denak ez baitziren egon errepublikarren alde; salatariak ere egon ziren”. Ondorioz, sei emakumeetatik lau sei hilabetez egon ziren kartzelan, eta Uribe eta Enbeita, berriz, urtebetez, “matxinadari laguntzea” ere egotzi zietelako beraien karguetan. Bilboko Orue txaletean egon ziren preso.

Sei emakume horien historia gogoratuta, Bizkargi burdinezko gerrikoa baino “askoz gehiago” izan zela esaterakoan, sei andra horiei buruz ere badabiltzala berbetan adierazi zuen Enbeitak tontorretik: “Gerra ez delako epika bakarrik. Fronte askotan jokatzen da gerra. Gernika arratsalde batean erre zuten, baina urte asko behar izan ziren berriro eraikitzeko. 1936ko altxamendu faxistaren atzeko gerra 1939an amaitu zen, baina frankismoak 40 urtez zapaldu zuen gure herria, eta gizon-emakume askok eman zuten beraien eskuetan zegoen guztia etorkizun hobe baten alde”.

“Bada ordua gure errelatoan falta diren izenak sartzeko. Gure kasuan, sei sartuko ditugu errelatoan, eurak ere Bizkargi direlako, euren laguntza barik zailagoa izango zelako dena”

Eskolako liburuetatik kendu egin zutela euskal historiaren bertsioa azpimarratu zuen Enbeitak: “Gerra zibila egon zela erakutsi ziguten, altxamendu faxista izan zela esan beharrean. Baina, guk ere, gure errelatotik izen batzuk kendu egin ditugu, edo behintzet ez diegu beste izen batzuei eman diegun besteko garrantziarik eman. Gerrari buruz berba egiterakoan faktore gehiagori buruz berba egin beharko genuke, ze, etxean zain gelditu ziren andrak ere gerraren parte izan ziren; senarrari agur esan zienak ere bai; baita semeak hilda jaso zituztenak ere; eta, zer esanik ez txamarrak josi zituztenei buruz, mitinetan egon zirenei buruz, herria zaindu zutenei buruz, edo gizonak falta zirenean atxurrekin lan egin zutenei buruz. Bada ordua gure errelatoan falta diren izenak sartzeko. Gure kasuan, sei sartuko ditugu errelatoan, eurak ere Bizkargi direlako, euren laguntza barik zailagoa izango zelako dena”.

Horiek gogoratu, eta festa giroan bildu ziren Bizkargin atzo. Adarraren, txalapartaren eta albokaren doinuak ere ez ziren falta izan, urtero legez.

Bizkargin 1937an faxismoaren aurka borrokatu zuten gudariak omendu zituzten gazteek, zapatuan.Ernai Gernika

Gazteen aldarriak ere bai.
Domekako egunaren bezperan, Ernaik deituta, Bizkargin batu ziren Larrabetzuko, Busturialdeko, Zornotzako zein inguruko hainbat herrietako gazte, mendi horretan

omentzeko: “Asko izan ziren askatasunaren alde bizi amen zutenak, tartean, asko gazteak. Ez ditugu ahaztuko eta haien lekukoa hartzea dagokigu herriaren askatasunaren aldeko borrokan”. Izan ere, iragana ulertzea “ezinbestekotzat” jo zuten, gaur egungo zapalkuntzari “aurre egiteko” eta etorkizun hobea eraikitzeko: “Belaunaldiz belaunaldi, gazteopk borrokari eutsi diogu, antolakuntzatik eta konpromisotik. Eta gaur ere lehen lerroan gaude, herri aske, sozialista, feminista eta euskaldunaren alde. Memoria borrokan eraikitzen delako”.

Bizkargin 1937an faxismoaren aurka borrokatu zuten gudariak omendu zituzten gazteek, zapatuan.Ernai Gernika

Aldarrikapenez beteko da Bizkargi asteburuan

Busturialdeko Hitza — 2026-04-30 10:00:00

Esangura berezia du Bizkargi mendiak Muxikan, Morgan, Errigoitin, Zornotzan, Larrabetzun, eta inguruko herrietan: memoriaren lekuko da. 1937an, Euskal Herriko beste hainbat txokotan bezala, Espainiako tropa frankistek airez eta lurrez eraso zioten mendiari. 7 egunez egon ziren gerran, eta, borrokaldi luze horien ostean, faxistek tontorra bereganatu zuten. Ordutik, efemeride hori gogoratzen dute Bizkargi Egunean. Hala, domekan mendi tontorrean bertan bilduko dira, Bizkargi Gogoratuz Elkarteak antolatuta, aldarrikapena, memoria eta jaia uztartuko dituen egunean. Baina bezperararako, Ernaikoek ere, memoriaren transmisioa bermatzeko egitaraua antolatu dute.

1937ko maiatzaren 9tik 16ra arteko bataila hartan izan ziren gudariak gogoan izango dituzte, baina Bizkargiko gudariei laguntzen ibili ziren Muxikako sei emakumeen historia ezagutaraziko dute aurten, Onintza Enbeitaren eskutik.

Lehenago, baina, Soinu Txikie taldeak girotuko ditu ermitaren inguruak, eta 12:00etan izango da ekitaldi nagusia. Gero, Jon Idigorasen jaiotzaren 90. urteurrena gogoan izango dute, Tasio Erkiziak zuzendutako hizketaldian. Idigoras ezker abertzale independentistaren militanteizan zen eta LAB sindikatuaren sortzean parte hartu zuen, besteren artean. Adarraren, txalapartaren eta albokaren doinuak ere entzungo dira Bizkargin urtero legez, baita Eneko Larruzearenak ere, eta Larrabetzuko Bizkargi Dantza Taldeak ere parte hartuko du ekitaldian. Ostean, Etxanoko Nagusiari ongietorria egingo diotela azaldu dute.

Bertsolariak ere ez dira faltako: Enbeita muxikarrak, Xabier Arriaga Txiplas errigoitiarrak eta Ibai Amillategi gernika-lumotarrak botako dituzte bertsoak. Horien ostean, Porrurik bez elektrotxarangaren doinuez gozatuko dute bertaratzen direnek.

Gazteen aldarria, zapatuan.
Domekako egunaren bezperan, Ernaik deituta, Bizkargin batuko dira Larrabetzuko, Busturialdeko, Zornotzako zein inguruko hainbat herrietako gazteak: “Duela 89 urte, faxismoak gerra eta errepresioa ekarri zituen gure herrira, eta 1937ko maiatzean Bizkargin bertan borrokaldi gogorrak izan ziren. Ehunka lagunek askatasunaren alde egin zuten borroka mendi honetan. Guk memoria hori bizirik mantentzen dugu. Iraganetik ikasi eta gaurko borrokak indartzeko”. Izan ere, faxismoaren eta eskuin muturraren gorakadaren aurrean, gazteak lehen lerroan daudela erakutsiko dute, “memoria antifaxismoa batuz, Euskal Herri aske eta eraldatzaile baten alde” egiteko.

Hala, Bizkargi tontorrera igotzeko Larrabetzuko plazan elkartuko dira, eta Morgaganetik igoko dute mendia. 14:00etan egingo dute ekitaldi nagusia, eta ordubete beranduago bazkaltzeko bilduko dira; bakoitzak bere etxetik eroan beharko du jatekoa. Jan eta gero, Bizkargi 1937-2026. Memoria eta antifaxismoa hitzaldiagaz hausnartzeko eta gogoetatzeko unea hartuko dute, eta Larrabetzura bueltatzeko bidea hartuko dute, Horibai Gaztetxean Djak egongo baitira iluntze eta gaua girotzen.

Egueraldiaren arabera Bizkargin edo Larrabetzuko eskolako aterpean egingo dutela egitaraua jakinarazi dute.

EGITARAUA.
Zapatua, maiatzak 2 (Ernai).
12:30. Larrabetzuko plazan, herrietako kedada.
13:00. Morgaganetik igoera Bizkargi mendira.
14:00. Ekitalda.
15:00. Bazkaria, etxetik eroanda.
16:00. Hitzaldia: Bizkargi 1937-2026. Memoria eta antifaxismoa.
21:00. Djak Horibai Gaztetxean, Larrabetzun: Etxeparra eta AskaTaSuna.
** Egueraldiaren arabera Bizkargin edo Larrabetzuko eskolako aterpean egingo dute egitaraua.

Domeka, maiatzak 3 (Bizkargi gogoratuz elkartea).
11:00. Soinutxikie taldeagaz, triki-kantu-dantzan.
11:30. Meza, ermitan, Santa Kurtzeren omenez.
12:00. Memoria ekitaldian bilduko dira, eta gaia Bizkargiko gudariei laguntzen ibili ziren Muxikako sei emakumeen historia izango da. Onintza Enbeitak zuzenduko du saioa.
Gero. Jon Idigorasen jaiotzaren 90. urteurrena gogoan izango dute, Tasio Erkiziagaz.
Ostean. Adarra, txalaparta eta alboka, eta gero, Eneko Larruzeagaz kantaldia.
Jarraian. Larrabetzuko Bizkargi Danta Taldearen ikuskizuna.
Gero. Etxanoko Nagusiaren ongietorria eta esker ona.
12:45. Bertsolariak: Ibai Amillategi, Onntza Enbeita eta Txiplas.
13:00. Erromeria Porrurik bez elektrotxarangaren eskutik.

Mugikortasun "segurua eta jasangarria" aldarrikatzeko mobilizatzen jarraituko dute

Busturialdeko Hitza — 2026-04-29 11:13:22

Muxikan, Ibarrurin eta Gorozikan urteak daramatzate udalerria zeharkatzen duen errepidearen arriskua salatzen, eta oraindik ez dute erantzun eraginkorrik jaso. Horregatik, “bide segurtasuna bultzatu eta mugikortasun jasangarriaren alde” egiteko herritar talde batek deitutako martxa deialdiari erantzunez, 120 lagun baino gehiago batu ziren domekan (apirilak 26) urte luzeko aldarrikapena berriro ere kalera ateratzeko. Txaleko islatzaileak soinean, eta oinez, patinetez edo bizikletaz, udalerria zeharkatzen duen errepidearen errai bat moztu zuten, eta, ondoko herriraino joateko bide seguru bat eskatu zuten.

11:30ak pasata atera ziren Kurtzerotik, Mugikortasun segurua eta jasangarria Muxikan. Istripu gehiagorik ez! zioen pankartaren atzean. Handik Gernikako norabidean joan ziren, Aldi supermerkatuaren pareraino, gero buelta bide beretik egiteko.

Martxaren helburua argia izan zen: herri eta auzoen arteko bidegorriak nahi dituztela aldarrikatzea, mugikortasun jasangarria bultzatzea, eta Gernika-Lumorekin bide seguru bat exijitzea. Hori dela eta, aldarriarekin Bizkaiko Foru Aldundiari beraien udalerrian errepideen segurtasuna “hobetzeko” behar diren inbertsioei “lehentasuna” ematea eskatu zieten. Izan ere, azken 40 urteetan “esponentzialki handitu” da ibilgailuen joan-etorria bertan, eta asko dira errepide horretatik egunero igarotzen diren ibilgailuak, baita ibilgailu astunak ere. “Bidea ez da segurua eta urtean zehar istripu ugari gertatzen dira”, uste dute.

Hala, udalerrian mugikortasun segurua eta jasangarria aldarrikatzen segituko dute hurrengo domeketan ere; aste honetan ez dira elkartuko, baina maiatzaren 10erako, 17rako, 24rako eta 31rako hitzordua zehaztua dute: 11:30ean, Kurtzeroko aparkalekuan bilduko dira, eta joan den domekako ibilbide bera egitea aurreikusi dute. “Eskerrak eman nahi dizkiegu domekako martxara etorri diren guztiei. Espero dugu datozen asteetan jende gehiago etortzea gure udalerrian mugikortasun segurua eta jasangarria aldarrikatzeko”.

Bide segurtasuna bultzatu eta mugikortasun jasangarria eskatzeko martxa, Muxikan.

Mugikortasun jasangarri eta seguruaren aldeko martxak deitu dituzte muxikarrek

Busturialdeko Hitza — 2026-04-22 10:00:35

Muxikan, Ibarrurin eta Gorozikan “bide segurtasuna bultzatu eta mugikortasun jasangarriaren alde” egiteko martxak deitu ditu Muxikako auzokide talde batek. Izan ere, udalerriko bide segurtasunak kezkatzen ditu, “beraientzat zein beraien familientzat nahi duten egunerokotasunaz gozatzea” eragozten dielako. Hori dela eta, martxak egingo dituzte, domeka honetan (apirilak 26) hasi eta maiatzaren 31ra arteko domeka guztietan; 11:30ean jarri dituzte hitzorduak Muxikako Kurtzeroko bidegurutzean, Galtzada ondoko aparkalekuan.

30 minutu iraungo duten martxetan oinez, bizikletaz edota patinetez parte hartzeko deia egin diete herritarrei, “denentzako” garrantzitsuak diren kontuak lortzeko. Ibilaldian Ertzaintzaren patruila batek lagunduko diela jakinarazi dute, eta bertaratzen direnei txaleko islatzailea eroateko deia egin diete.

Martxen helburua argia da: herri eta auzoen arteko bidegorriak nahi dituzte, mugikortasun jasangarria eta Gernika-Lumorekin lotura lortzeko asmoz. Hori dela eta, aldarriekin Bizkaiko Foru Aldundiari beraien udalerriaren errepideen segurtasuna “hobetzeko” behar diren inbertsioei “lehentasuna” ematea eskatu nahi diete. “Entzun gaitzatela nahi dugu, 1.546 biztanle gara guztira Muxikan, eta jakin badakigu batasunak indarra egiten duela. Horregatik 30 minutuko martxak deituko ditugu”, esan dute.

Izan ere, salatu dute azken 40 urteetan “esponentzialki handitu” dela ibilgailuen joan-etorria Muxikan. “Errepidea kolapsatuta dago eguneroko joan-etorriengatik eta ibilgailu astunak horietako zati handi bat dira. Errepidea ez da segurua, eta urtean zehar istripu ugari gertatzen dira”, esanda adierazi dute beraien kezka. Izan ere, horien guztiak kontutan hartuz gero, beraien seme-alabak ezin direla auzoen edo herrien artean “autonomikoki” ibili diote, ez etasegurtasunez” ibili ere. Hala, auzoen artean ibiltzeko ibilgailu partikularren erabilera orokortu egin dela diote. Ondorioz, udalerriarentzako bide segurtasuna eta mugikortasun jasangarria lortzea dute helburu.

BaSOS Elkartekoek domekarako deitu dute aurtengo landaketa

Busturialdeko Hitza — 2026-01-15 06:54:13

BaSOS Elkarteak eta Muxikako Urretxindorra Herri Eskolak zuhaitz landaketa antolatu dute domekarako [urtarrilak 18], eta deialdiagaz bat egiteko gonbidapena luzatu dute. Hain zuzen ere, elkarteak aurten egingo duen lehenengo landaketa izango da.

Ordorikako lurretan sortzen ari diren bertoko basoa handitzen laguntzera animatu dituzte eskualdeko herritarrak.

Parte hartzen dutenak 09:00etan Ariatzako aparkalekuan elkartuko dira, eta bertatik abiatuko dira Ordorika auzora, landaketa egitera. Landaketara joan gura dutenek aurretiaz izena eman behar dute. Horretarako, basoso@basos.eus helbide elektronikora mezua bidaltzeko eskatu dute.

Urte berria ondo hasteko plan ederra dela nabarmendu dute, eta bertoko basoen alde bakoitzak bere alea jartzera eta auzolanean goiz eder bat pasatzera hurbiltzeko deia egin dute.

Landaketara eraman beharrekoak ere gogoratu dituzte: ura, botak edo katiuskak, eta euria eginez gero euritarako arropa eta aldatzeko arropa. Aitzurrak eta eskularruak edukiz gero, landaketara eroateko eskatu dute, eta bestela, eurek utziko dituzte. Gainera, hamaiketakoa egongo dela jakinarazi dute.

BiziPuntuak, Ibarrangelun, Foruan eta Muxikan

Busturialdeko Hitza — 2026-01-05 13:20:02

Bizkaiko Foru Aldundiak bizikletaren erabilera sustatzeko azpiegitura-sarea sendotu du bederatzi BiziPuntu berri jarriz; horri esker, 110 geltokik osatzen dute sarea. Arduradunen berbetan, jarduketa horrek “aurrerapauso garrantzitsua” suposatzen du mugikortasun jasangarria bultzatzeko bidean, aldundiak bizikletaren eguneroko erabilera errazteko eta Bizkaiko hiri-espazioaren kalitatea hobetzeko daukan estrategian.

Sarearen lurralde-osotasuna sendotuz eta eskualde arteko orekari eutsiz, geltoki berri horiek dagoeneko kokatzen ari dira bizikleten sarrerako eta igarobideko puntu estrategikoetan: bana Ibarrangelun, Foruan, Muxikan, Atxondon, Areatzan, Arrankudiagan eta Derion eta bi Getxon —2021ean Bermeon, Gernika-Lumon eta Mundakan ipini zituzten eta 2022an Muruetan—. Gogoratu dutenez, BiziPuntuek aukera ematen diote edozein erabiltzaileri oinarrizko doikuntzak egiteko, gurpilak puzteko edota konponketa txikiak burutzeko, “bizikletaren erabilera seguruagoa, arinagoa eta autonomoagoa bilakatuz”.

Eguneroko joan-etorrietan zein aisialdiko eta turismo aktiboko ibilbideetan erabiltzen dituzte BiziPuntuak, eta udalerrien arteko “konektibitatea hobetzen” dute, garraio-sistema desberdinen arteko intermodalitatea erraztuz: “Bizkaiko Foru Aldundiak sustatzen duen mugikortasun aktibo, osasungarri eta emisio baxuko ereduan kokatzen da sarea. Hedapen honi esker, Bizkaiak aurrera egiten du dagoeneko errotuta eta herritarren artean oso ondo baloratuta dagoen sare baten garapenean. 110 BiziPuntuen sarea gaur egun erreferente bihurtu da Euskadin, eta Bizkaian garatzen ari den mugikortasun jasangarriaren ereduan oinarrizko azpiegitura da, lurraldearen ingurumen, energia eta kohesio politikekin bat etorriz”.

BizkaiBizi zerbitzua. BiziPuntuen sarearen hedapena BizkaiBizi zerbitzuaren funtzionamendu “arrakastatsuari” gehitzen zaiola azpimarratu dute arduradunek. Horiek azaldu bezala, bizikleta partekatuaren sistema publikoak mugikortasuna “eraldatu” du bederatzi udalerri aitzindaritan —Barakaldon, Getxon, Leioan, Portugaleten, Santurtzin, Bilbon, Erandion, Sestaon eta Berangon— , bizikleta ohiko garraiobide eraginkor bihurtuz: “Esperientziak erakutsi du, aisialditik harago, BizkaiBizik eguneroko ohiturak aldatu dituela. Lanerako, ikasketarako nahiz bizitza sozialerako joan-etorri jasangarriak erraztu ditu, eta bidezko mugikortasuna indartu du, dentsitate eta tamaina desberdinetako udalerrietan zerbitzu estandar bera bermatuz”. Bere eragin soziala nabarmendu dute: “Herritarren jarduera fisikoa areagotu da, mugikortasun osasungarriago eta eskuragarriago baten eredua sendotu da, eta garraio publikoarekin intermodalitatea finkatu da”.

Aldi berean, lurraldeko puntu estrategikoetan kokatutako bizikletentzako aparkaleku seguruak biltzen dituen BiziPark sareak hazten jarraitzen du, “bizikleta partikularren babeseko aparkamentuari eta Bizkaia konektatuago, jasangarriago eta kohesionatuago bati laguntzen dioten azpiegitura gisa”.

140 zuhaitz inguru landatu dituzte

Busturialdeko Hitza — 2025-12-16 12:36:26

Basoak SOSekoek Seber Altube ikastolako familiekin bat egin zuten domekan [abenduak 14], Ordorikako lursailean landaketa egiteko. Adierazi dutenez, “eguraldi zoragarria” izan zuten, eta konpainia ere horrelakoa izan zen. “Gustora” ibili zirela nabarmendu dute, gainera. 140 zuhaitz landare inguru sartu zituzten; urkiak, otsalizarrak, astigarrak, gerizondoak eta haritzak landatu zituzten, besteak beste.

Gauzak horrela, Seber Altubetik bertaratutako familiei eskerrak eman dizkie Basoak SOSeko kideek: “Eskerrik asko bihotzez hurbildu zineten guztioi”.

Final handirako prest

Busturialdeko Hitza — 2025-11-24 12:34:01

Iragan zapatuan [azaroak 22], IV. Ajuriako Pilota Goxua Txapelketaren finalaurrekoak lehiatu zituzten. Orain arte modura, pilotariak gogotik saiatu behar izan ziren, norgehiagoka “ederrak eta estuak” izan baitziren Ajuriako pilotalekuak harturikoak. Alde batetik, lehen kanporaketan maila itzela kantxaraturiko Muniozgurenek eta Pereak Goitia eta Kastañares eduki zituzten aurrez aurre. Bikote bietako batek ere ezin izan zuen aginta makina sendorik ezarri, eta partidua azken txanpan erabaki zen; 22 eta 20ko markagailuagaz nagusitu ziren lehen biak.

Bigarren neurketak iazko garaile Azkarai eta Bidaburu Gandiaga eta Urizarren aurka elkartu zituen. Txapelaren defendatzaileek ez zuten egunik onena bizi; lekeitiar arerioek, aldiz, ez zuten garaipena lehen unetik ziurtatzeko abagunea alferrik galdu. 22 eta 12koa bistaratu zuen markagailuak azkenean, Gandiagaren eta Urizarren alde. Azkarai eta Bidaburu, beren aldetik, final handitik urrats bakarrera geratu dira aurtengoan, eta hirugarren postua lortzearren bakarrik borroka egin ahalko dute, Goitiaren eta Kastañaresen aurka.

Final handiagaz batera, gainera, berriki zendutako Josu Laka mendexarrari omenaldi hunkigarria egingo diote antolatzaileek. Azaldu dutenaren arabera, Laka txapelketaren defendatzaile sutsuenetako bat izan da: “Hasiera-hasieratik pilotaren eta, zehatz-mehatz, lehiaketa honen alde gogor lan egin du”. Aurreratu dute Lakaren senideak omenaldian egongo direla. Bestalde, herritarrei zapatuan [azaroak 29] 18:00retan hasiko den azken jardunaldiaz gozatzera bertaratzeko deialdia luzatu die antolakuntzak.

Muxika, Ibarruri eta Gorozikako argazki lehiaketa, abian

Busturialdeko Hitza — 2025-11-05 11:14:02

Muxikarrak argazki kamerak kaleratzen hasiak daude. Izan ere, martxan da Muxika, Ibarruri eta Gorozikako argazki lehiaketa, 2026ko egutegiko argazkiak zehaztuko dituena, eta parte hartzaileek azaroaren 20ra bitarteko epea dute, beren proposamenak aurkezteko. Txapelketaren gaia Gure herriko ondarea izango da. Antolatzaileek aditzera eman dutenaren arabera, ondare horren denetariko adarrak izan ahalko dira argazkien muina, batik bat, ondare arkitektonikoa, historikoa edota kulturala. Lehiaketak adar bi edukiko ditu: alde batetik, gaztetxoena, 16 urteko adinera bitartekoena; bestetik, nagusiena, 16 urteko adinetik gorakoena.

Parte hartzaile bakoitzak sei argazki proposamen aurkeztu ahalko ditu, eta edozein teknika zein kolore onartuko dituzte. Hori bai, “ahalik eta kalitate handiena” edukitzea eta JPG formatudunak izatea eskatu du antolakuntzak. Hautatutako argazkien egileen izen-abizenak egutegian agertuko direla aurreratu dute, eta aurkezturiko denekin erakusketa egingo dutela, Zubieta Errota liburutegian. Horrez gain, argazkiak Muxikako Udalaren argazki artxiboaren “parte izatera” igaroko dira. Ez hori bakarrik: lehikaetara aurkeztutako argazki oro “udalaren jabetzapekoa” izatera igaroko dela aurreratu dute, eta udalak haien gaineko erabilera eskumen guztiak izango dituela ere bai, betiere egilearen izen-abizenak aipatuz.

Proposamenak aurkezteko bideari dagokionez, prozedura bi egongo dira: Zubieta Errotan bertan aurkeztea, USB euskarrian, edota liburutegia@muxikakoudala.eus posta elektronikora bidaltzea. Halaber, argazkiak aurkezteagaz batera egilearen izen-abizenak nahiz hartu-emanetarako datuak aurkeztu beharko dira, baita argazkiak non eta noiz egindakoak diren zehaztu ere.

Sariketa.
Sariak jasoko dituzte bai gaztetxoen, bai nagusien argazki lehiaketetako garaileek. Hori bai, iragarri dute parte hartzaile bakoitzak “ezin izango duela” sari bat baino gehiago jaso. Nagusien lehiaketan, lehiaketako argazkirik onena sarituko dute, bildumarik onenagaz eta muxikarren argazkirik onenagaz batera. Saridun bakoitzak lagun birentzako bazkari txartela jasoko du, Remenetxe jatetxerako. Gaztetxoen artean, gazteen argazkirik onenak jasoko du saria, eta sari hori, hain zuzen ere, “argazkilaritza materiala erosteko” 100 euroko txartela izango da.

Lurgaiak Mendatan ekingo dio 2025-2026 landaketa aldiari

Busturialdeko Hitza — 2025-11-04 14:30:49

Lurgaia Fundazioak 2025-2026 denboraldiko estreinako baso landaketa Busturialdean egingo du, asteburu honetan. Hain zuzen ere, Mendatako lurretara joko dute datorren zapatuan [azaroak 8], Berrekondo errekaren ibarrera. Berrekondo inguruak pinuen laborantza intentsiborako baliatu izan dira, eta orain bertan baso autoktonoa sortzea edo lehengoratzea izango da landaketen helburu nagusia.

Eguena [azaroak 6] bitarteko epea dago izena emateko, Lurgaiaren web orrialdera jota zein info@lurgaia.org posta elektronikora idatzita; izena ema ostean, baieztapenari itxaron beharko diote interesdunek. Izena ematerakoan, landaketan parte hartuko duten guztien izen-abizenak eta jatorrizko udalerria ipini beharko dira, baita hartu-emanetarako telefono zenbaki bat apuntatu ere.

09:00retan ipini dute zapaturako hitzordua, Muxikako Ariatzan, 1845 autobus geltokiaren aldameneko aparkaleku gunean. Bertatik ekingo diote landaketa eremurako bideari, lantaldea auto “gutxi batzuetan” banatuta. Landatzaileek aurreratu dutenaren arabera, Berrekondoko saila “lantzeko erraza” da, aldapa gutxiko esparrua delako. Hori “aprobetxatzeko” asmoa dute: “Ea egun horretarako prestatutako 500 zuhaitzen landaketa gainditzen dugun”. Amaieran, tortilla pintxoen janaz gozatuko dute parte hartzaileek.

Eroan beharrekoak.
Landaketan parte hartuko dutenentzako zenbait gomendio zerrendatu gura izan dituzte antolatzaileek. Alde batetik, ura ontzi berrerabilgarrietan eramateko eskatzen dute, baita jateko zer edo zer ere, “gura baldin bada”. Praka luzeak beharko dituzte landaketa eremuan segurtasunez ibiltzeko, eta mendiko botak. Euria egingo balu, euritarako arropak eta aterkia eroatea gomendatzen dute.

100 urte bete ditu Maria Angeles Onaindia muxikarrak

Busturialdeko Hitza — 2025-10-20 10:58:01

Maria Angeles Onaindia muxikarrak 100 urte bete ditu, eta familia eta gertukoekin bere urteguna ospatzeaz gain, Muxikako Udalaren zoriona ere jaso du udalerriko herritar nagusienak.

Ohorezko aurreskua dantzatu eta lore sorta oparitu dio udalak, familiagaz inguratuta ospatutako “egun berezia.

Maria Angeles Onaindiari lore sorta eman dio udalak.Muxikako Udala

Itsasoa eta dantzak batuko ditu aurtengo Ibarruriko Dantzari Egunak

Busturialdeko Hitza — 2025-10-09 10:12:27

Domekan [urriak 12] ospatuko dute Ibarruriko Dantzari Eguna, eta Baso Txoritxu Dantza Taldeko kideek itsasoa gaia oinarri hartuta prestatu dute aurtengo hitzordua. Izan ere, urtero gairen bat hartu, eta horren arabera aukeratzen dituzte dantzak eta musika, baita apainketa ere. Beraz, oraingo honetan, itsasoagaz zerikusia daukaten elementuekin apainduko dute frontoia.

Txistulariek eta trikitilariek lagunduta, kalejiran hasiko dute eguna, eta 13:00etan izango da ekitaldi nagusia, frontoian. Dantzari eta herriko abesbatzako kideen artean, 86 herritarrek eskainiko dute ikuskizuna.

Ohitura mantenduz, Dantzari Dantzagaz hasiko dute ekitaldia, Agintariena, Banangoa eta Txotxongilo dantzatuz. Jarrain, aurtengo gaian murgilduko dira. Sardinerak eta Larrain Dantzaz gain, Itsasoa gara eta Itsasoari begira abestiekin sortutako koreografiak eskainiko dituzte: “Ume, gazte zein nagusiok dantzatuko dugu, eta dantza bertikala ere edukiko dugu, Asier Egiarteren eskutik”. Gainera, Etxanoko buruhandiak ere gonbidatu dituzte.

Herri bazkarian 130 bat lagun batzea aurreikusi dute. Bazkalostea girotzeko, bingo musikatua edukiko dute, eta gero, berriz, Luhartz erromeria taldeko kideek dantzan ipiniko dituzte berriro ere herritarrak: “Iaz giro ederra sortu zen erromerian, eta aurten ere horrela izatea espero dugu”. Goizetik gauera arte giro polita egoten dela azpimarratu dute antolatzaileek, eta bertako zein inguruko bizilagunak dantzari egunera gonbidatu dituzte.

Egitaraua:

11:00. Meza nagusia, abesbatzagaz.
Ondoren. Kalejira, txistulari eta trikitilariekin.
13:00. Ekitaldi nagusia.
14:30. Herri bazkaria.
Ostean. Bingo musikatua.
Ondoren. Luhartz erromeria.
20:00. Txokolatea.