Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

32. Arrain Azoka abian da

Busturialdeko Hitza — 2026-05-22 16:58:45

Bermeotarren agendako datarik esanguratsuenetakoa, 32. Arrain Azoka, martxan da. Gaur [maiatzak 22], Lamera parkea udalerriko epizentro bihurtu da, azokagunearen irekiera eta Hegaluze Sariaren banatze ekitaldia tarteko. Bero sapari beren berotasunagaz erantzun diote bertaratu diren herritarrek, 12:00etatik aurrera. Arrain Azokaren hasiera ofiziala Hegaluze Sariaren banaketak trazatu du. Bermeoko Nautika Eskola izan da autengo omendua, eta bertako zuzendaritza eta irakaslego taldeak jaso du saria, ikasleek lagunduta.

ARGAZKIAK

Ekitaldian egon dira Nadia Nemeh alkatea, Bizkaiko Ahaldun Nagusi Elixabete Etxanobez eta eskualdeko gainontzeko gobernu taldeetako kideez gain, baita Eusko Jaurlaritzako nahiz Bizkaiko Foru Aldundiko bestelako karguak ere. Itsasoa zaindu, bizia dastatu lelopean, hasiera aparta eman diote Bermeoko herria eta itsas mundua ezkontzen dituen asteburuari. Nemehk, topagune kulturala zein gastronomikoa izateaz harago, azokak herritarren iruditeria kolektiboa eraikitzerakoan duen esangurari keinu egin dio, azoka “Bermeoren isla” dela nabarmenduta: “Arrain Azoka ez da azoka hutsa; Arrain Azoka Bermeo da”. Alde horretatik, efemeride berezi hori euskararen gordeleku ere badela argitu du: “Arrantzaleen hizkerek eta itsas arloagaz erlazionatutako berbek herriaren ondare kulturala eta jakintza kolektiboa osatzen dituzte”.

Belaunaldiz belaunaldi herriaren “sustrai, ogibide eta izaeraren parte” diren itsas beharginei erreparatu die alkateak, besteren artean, arrantzaleei. Ez hori bakarrik: itsasoaren inguruko balio sinbolikoari buruz ere mintzatu da, askatasunarekin eta herrien arteko elkartasunarekin duen lotura azpimarratuz eta fokua Global Summud flotilla gogoratuz. “Duela gutxi, hain zuzen ere, Bermeoko portuan eduki genuen giza eskubideen alde egiten duen Aita Mari ontzia”.

Nadia Nemeh: “Arrain Azoka ez da azoka hutsa; Arrain Azoka Bermeo da”

Jarraian iritsi da ekitaldiaren gailurra: Hegaluze Sariari dagokiona. Bermeoko Nautika Eskolak bere mende erdiko bidea ospatzen du aurten, eta ibilbide hori guztia aintzatetsi diote gaurkoan. Arrain Azoka elkarteak aitortza publikoa egin gura izan dio arrantza munduan prestakuntzak daukan “funtsezko garrantziari”, itsasoagaz lotutako lanbideetan “prestakuntza anitza eta espezializatua” bermatzen baitu. Garai bakoitzaren eskakizunetara doituz, Nautika Eskolaren “egokitzeko eta berritzeko gaitasuna” goratu dute, etorkizunari begira “ekarpen handiak” egiteko prest dagoela adierazita.

Eskolaren izaera integratzailea ere taularatu nahi izan dute: “Baita emakumezkoen presentzia eta integrazioa modu naturalean sustatu izana ere, tradizionalki maskulinizatua izan den sektore batean aukera berdintasunaren aldeko urrats esanguratsuak eginez”. Ez dute ahaztu tokiko gainontzeko hezkuntza eragileekin “elkarlanean aritzeko eta baliabideak partekatzeko” duen prestutasuna ere: “Hartara, komunitatea indartzen lagundu du urtez urte”.

Karmele San Miguel: “Sari hau azken 50 urteetan zentrotik pasatutako eta haren alde beraien aletxoa ipinitako pertsona guztienganako omenaldi modura ulertzen dugu”

Eskolako zuzendari Karmele San Miguel “hunkituta” agertu da, saria jasotzerakoan: “Egundoko ohorea da Nautika Eskolak Hegaluze Saria Jasotzea, bere 50. urtemugaren bueltan, gainera; ni neu oso harro nago gaur hemen egon ahal izateaz, egun hain esanguratsuan. Sari hau azken 50 urteetan zentrotik pasatutako eta haren alde beraien aletxoa ipinitako pertsona guztienganako omenaldi modura ulertzen dugu; izan ikasle, irakasle nahiz behargin, sari hau den-denena da. Bere bidea abiatu zuenetik, eskolaren helburu nagusia itsas sektorearen etorkizuneko langileei ahalik eta formakuntzarik onena ematea izan da, hala, itsas zein arrantza munduari emandako guztiaren truke zerbait bueltatu ahal izateko. Horrenbestez, aintzatespen hau lan horren saria da”.

Azokagunea, gaurkoan, aldarrigune ere izan da. Hain zuzen, Bizkaiko kontserba eta arrain gazituen sektoreko beharginek elkarretaratzea egin dute Lameran, arlo horretako langileentzako hitzarmen “duina” eskatu asmoz. Apirilaren amaieraz geroztik, mobilizazio egutegian bete-betean murgilduta daude, CEBEKi beren lan baldintzak hobetzeko eskatzeko. Iragan astean [maiatzak 16] Ondarroako Antxoa Egunean ere aireratu zituzten beren eskakizunak, eta eguenean [maiatzak 21] greba eguna eduki zuten. Bihar [maiatzak 23] ere, aldarriagaz aurrera egingo dute, Bermeon bertan: 13:00etan mobilizazioa egingo dute, Lamerako Harrizko Bankuan.

Denetarikoak denentzat.
Domekara [maiatzak 24] bitartean, 32. Arrain Azokak han-hemengo hainbat eta hainbat herritar hartzea aurreikusten du. Izan ere, urtero harrera ederra izan ohi duten ekimenei eutsiko diote aurten, baina berritasunak ere txertatuta. Horietako azpimarragarrienetakoa estreinakoz egingo duten tokiko artisauen gunea da, Pop-Up Kresaltsua izeneko espazio berrian egingo dutena.

Herriko kultur, aisi zein kirol taldeak ere ospakizun asteburuaren partaide izango dira: txistulariak, trikitilariak, dantza taldeak erraldoiak, gaiteroak eta danborrada kalerik kale ariko dira. Etxalak gazte talde euskaltzaleak ere, lehendabiziko aldiz Gazte Egitaraua atondu du biharko, eguerditik iluntzera artean.

Azokaguneko eskaintza zabalari, halaber, Bermeo Tuna World Capitalek eta Urdaibaiko Esentziek antolatutako astun zein txakolin dastaketak batuko zaizkio. Solidaritza Gunean, aldiz, marmitakoa eta hegaluze errea dastartu ahalko dira, eta bertan bildutako dirua gaixotasun arraroak dituzten Bermeoko umeen tratamenduetara bideratuko da. Itsasoak gordetako sekretu oro ahora eroateko aukera egongo da, baina baita sekretu horiez begien bidez gozatzeko ere: Nestor Basterretxea aretoak Itsasoaren sekretuak erusketa ikusgai du.

Moldagarritasunari eta mende erdiko bideari omenaldia

Busturialdeko Hitza — 2026-05-22 08:00:19

Bermeo eta bermeotarren nortasunagaz estuki loturikorik bada, itsasoa eta arrantza dira, eta sektorearen lehiakortasuna eta etorkizuna bermatzeko kalitatezko formakuntzak duen garrantziaren jakitun, Arrain Azoka Elkarteak 27. Hegaluze Saria Bermeoko Nautika eta Arrantzako Lanbide Heziketako Ikastetxe Integratuari aitortzea erabaki du. Gaur jasoko dute saria, 12:00etan, Arrain Azokaren inaugurazio ekitaldian, eta Karmele San Miguel eskolako zuzendaria “pozarren” agertu da.

Bermeoko Nautika Eskola urtemuga berezia ospatzen ari da, 50 urte bete baititu. Efemeridea Hegaluze Sariagaz biribiltzea “harrotasun handiagaz” bizi dute: “Urte batzuk generamatzan sarirako proposatutakoen artean, eta aurtengoa ikastegiaren 50. urteurrena zela eta, uste genuen bazitekeela harrera egitea. Oso ilusionatuta gaude”. Izan ere, aitortza publiko horrek islatzen du eurek egiten duten lanak sektorearen eta Bermeoren “errekonozimendua” daukatela: “Egoera horretan egon diren pertsona guztien errekonozimendu gisa ulertzen dugu saria: ikasleak, irakasleak, ikastetxeko langileak eta itsas-arrantza sektoreko profesionalak”.

Arrantza sektoreko profesional kualifikatuen prestakuntza lanean bost hamarkada beteta, Hegaluze Saria “profesional konprometituak eta etengabe aldatzen ari den sektorera egokitzeko gai direnak” trebatzen jarraitzeko “motibazio garrantzitsua” da: “Profesional publikoak dituen gurea bezalako prestakuntza-zentro batentzat sari honek itsas-arrantza prestakuntzak daukan garrantzia ikusarazten laguntzen digu”.

Bermeoren nortasuna
Arrain Azoka Bermeoren nortasunaren “zati garrantzitsu bat” dela deritzo San Migelek, eta gainera, Bermeoko Nautika eta Arrantzako LHIIrentzat “balio oso berezia” dauka, herriarekin “zuzenean konektatzen” dituelako: “Azokan parte hartzea eta aintzatetsiak izateak Bermeorentzat oso garrantzitsua den hitzordu kultural eta sozial baten parte aktibo garela sentiarazten gaitu”.

Arrain Azoka bezalako ekimenek “itsasoaren eta arrantza sektorearen balioa ikusarazten laguntzen dute”, sektorea belaunaldi berrietara hurbildu eta atzean dauden guztien profesionaltasuna, ezagutza eta berrikuntza lehen lerroan jarriz eta “etorkizunerako aukerak egon badaudela” erakutsiz.

Horregatik, nautika eskolak urtero, modu batera edo bestera, Arrain Azokagaz bat egin, eta modu aktiboan parte hartzeko aukerak bilatzen ditu, Juan de la Cosa itsasontzi-ospitalaren bisitak eskainita, adibidez. Gustura egiten duten lana da, eta programatutako jarduerek “harrera oso ona” izaten dute urtero. Aurten, nabigazio-simulagailura bisitak eskainiko dituzte: “Jendeak jakin-min handia dauka, eta lehen pertsonan nola lan egiten dugun edota sektoreko etorkizuneko profesionalak nola prestatzen diren ikusten gozatzen dute”.

Eskaintzen dituzten bisitek “profil ezberdinetako pertsonen” arreta bereganatzen badute ere, bereziki ume txikiak dituzten familiek erakusten dute interes handiena. Horregatik, aurten ere “esperientzia praktiko eta hurbilak” eskainiko dituzte nabigazio-simulagailuan: “Simulagailura bisitek interes handia pizten dute beti. Gure helburua da gertutatzen direnek esperientzia murgiltzailea bizi ahal izatea, une batez bada ere”.

Eboluzionatzen jakitea.
Ibilbide profesionala arrantzan, merkataritza-itsasketan, itsas industrian edota hezkuntzan eman duten belaunaldi ezberdinak igaro dira Bermeoko Nautika eta Arrantza Eskolatik 50 urtetan, eta orain arteko ibilbidearen balorazio “oso positiboa” egin du zentroko zuzendariak: “Denborarekin eboluzionatzen jakin dugu, gure nortasuna galdu gabe, eta bereziki harro sentitzen gara horretaz”.

Eboluzioak baina, erronkak dakartza berarekin. Mundua digitalizatuz joan den heinean, arrantza eta itsasoa ez dira prozesu horretatik kanpo gelditu eta, horrenbestez, zentroa ere “aldaketa teknologikoetara etengabe egokitu” behar izan da: “Gaur egun digitalizazioaz, jasangarritasunaz, automozioaz eta abarrez ari gara, eta eskolak guzti horri erantzuteko instalazioak, simulagailuak eta irakaskuntza-metodoak modernizatu behar izan ditu”.

Modernizazioaz harago, prestakuntza ildo berriak zabaltzeko egindako “lan handia” nabarmendu du San Migelek, “enpresekiko harremana eta lanbide-ingurunea sendotzea” ahalbidetu duen Arrantza Kapitainaren Espezializazio Programa balioan ipinita.

Digitalizatuz badoa ere, arrantza sektoreak “une konplexua” bizi duela ohartarazi du zentroko zuzendariak. Batez ere, belaunaldien erreleboari, iraunkortasunari eta ingurumenaren eskakizunei dagokienez da une konplexua, eta horri aurre egiteko “gakoa” da prestakuntza: “Profesional gero eta kualifikatuagoak, teknologikoki prestatuak eta oso ingurune aldakorretan moldatu daitezkeenak behar dira”.

Gazteei itsasoko eta arrantzako sektorea ezagutaraztea “erronka garrantzitsua” da, irudi “tradizionala” nagusi duen sektorearen irudi “gaurkotuagoa eta errealitatetik hurbilago dagoena” transmititzea eskatzen duelako: “Sektore oso teknologiko eta espezializatu baten aurrean gaude, garapen profesionala nabarmena da, eta Bermeoko Nautika eta Arrantza LHIItik uste dugu garrantzitsua dela errealitate hori zabaltzea”. Belaunaldi berriei itsas sektoreak eskaintzen dituen espezializazio eta hazkunde profesionalerako aukerak ezagutarazi beharra dagoela deritze, “bai arrantzan, bai ekonomia urdinari lotutako beste esparru batzuetan”.

Itsasoarena tradizionalki maskulinizatua den sektorea da, eta Bermeoko Udalak eta Arrain Azoka Elkarteak nautika eskolak emakumeen presentzia eta integrazioa “modu naturalean” bultzatu izana azpimarratu dute. Oraindik “bide luzea egiteko” dagoela uste du San Migelek, baina baikorra da: “Gero eta emakume gehiago dago itsas prestakuntzan interesatuta, eta espero dugu etorkizun ez oso urrunean sektorean erantzukizuneko postuak betetzen ari direla ikustea. Eskolatik emakumeen presentzia normalizatzeko eta eremu profesional hau mundura zabaltzeko lan egiten dugu”. Horren adibide ipini du ikasturte honetan ikastetxe ezberdinetako DBH 4. mailako neskekin egindako orientazio-saioak, sektorea ezagutarazi eta emakumeek ere itsas sektoreko lanpostu kualifikatuetara jo dezaketela transmititzeko: “Balorazio oso ona egin dugu, eta ikasleek eta irakasleek ere oso positiboki baloratu zituzten”. Zuzendariak argi dauka “prestakuntza, gaitasuna eta bokazioa” izatea dela garrantzitsuena. l

Arrain Azokaren itsasoko olatu euskaltzalea

Busturialdeko Hitza — 2026-05-22 06:00:52

Arrain Azoka bermeotar gazteentzat letra gorriz gorde beharrezko data berezia baldin bada, aurtengoak are esanguratsuagoa izateko osagai guztiak dakartza. Izan ere, Etxalak talde euskaltzaleak Arrain Azokako Gazte Egitaraua prestatu du biharko [maiatzak 23], herriko gazteak euskararen eta bermeotarrentzako egunik adierazgarrienetako baten inguruan saretzeko helburuagaz.

Ekimenaren ernamuina “duela zenbait urtetatik” datorrela adierazi dute Etxalakeko kideek: “Ostikada Gazte Asanblada aktibo zela, karropoteoa nahiz talde bazkaria egin ohi ziren, baina, denboraren poderioz, bai egitarau hura, bai asanblada bera bertan behera geratu ziren”. Hazi hura berpizteko asmoa dute aurten, batez ere, iazko Arrain Azokan egindako lanagaz aurrera egin asmoz: “Iaz, Arrain Azokan urdinez eta euskeraz izeneko kanpaina atondu genuen, eta Gazte Egitaraua duela urtebete abian ipinitako behar haren jarraipena da”.

Egitarau “erabat osagarriak”.
Arrain Azokak herritarren artean dituen “esangura eta garrantzia” aintzat izanda, azokaren bueltan antolatutako “egitarau eta jarduera guztiak errespetatuz” prestatu dute Gazte Egitaraua: “Azokagunea bera, haren inguruko programazio zabala eta gaualdiko portuko giroa errespetatuko ditugu, eta guk antolatutako egitaraua haiekiko guztiekiko erabat osagarria izango da, gainontzeko eragileak eta haiek eginiko beharra aintzatetsiz”. Etxalak udalerri mailan “erreferentzialtasuna irabazten” ari da apurka-apurka, eta prestatu dutena lanketa horren “hurrengo urratsa” izango da.

13:00etan ekingo diote egitarauari. Bermeoko Txosna Batzordeagaz auzolanean, karropoteoa egingo dute herriko kaleetan barrena, Bokaletik hasita. Egun horretan danborrada ere egingo dutenez, aurreratu dute haren ordutegia eta ibilbidea kontuan hartuko dituztela: “Batek besteari trabarik ez egiteko, uneren batean karropoteoa eten beharko bagenu, halaxe egingo genuke, gero ostera ere berrekiteko”. Portutik Lamera parkera joko dute, eta handik San Migeleko eskaileretara; bertan gazte euskaltzaleen talde argazkia egingo dute, “14:45 inguruan”.

157 lagun elkartuko dira gazte bazkarian

15:00retan, ospakizuna Taraskara lekualdatuko da, gazte bazkaria bertan egingo baitute. 157 lagun elkartuko dira bazkaritarako. “Kopuru oso polita da, eta gazteek biltzeko deialdiari ederto erantzun diotela bistaratzen du. Pozarren gaude, ze, burokrazia kontuengatik egitarauaren kartela berandu samar argitaratu behar izan genuen arren, eratzun oso ona jaso dugu”.

Egun berezi horretan, gainera, herritar pila batek “aurrerapen handiz kanpoan bazkaltzeko erreserba” egin ohi du, eta, beraz, “ez da batere erraza” kopuru horretara iristea: “Edozelan ere, asko eta asko izan dira kaletik gelditu gaituztenak, bazkaritarako txartelik geratzen ote zen galdegiteko. Jendea gogotsu eta parte hartzeko prest dagoela islatzen du horrek”. Aurtengo erantzun erabat positiboa tarteko, “aztertu egingo dute” hurrengo urtean txartel kopurua “are handiagoa” izatea.

Mahaigainekoa musikaz girotuko dute. Hala bazkaritara animatutakoak, nola beste toki batzuetan bazkalduko dutenak Taraskara hurreratzera eta jai giroaz gozatzera “gonbidatuta” daude: “Hasiera batean, zuzeneko musika saioa edota kontzerturen bat antolatzea planteatu genuen, baina, Portuko jaia 21:00rak inguruan hasiko denez, ez genuen hango antolatzaile eta komertzioen kontra egin nahi, ezta iluntzean larregi luzatu gura ere; hortaz, 20:30ak arte ariko gara”. Ondoren, Portura joateko deialdia luzatu diete herriko gazteei.

Etxalakeko kideek “giro euskaltzale eta lagunartekoaz” gozatu gura duten guztiei Gazte Egitarauan parte hartzeko deialdia luzatu diete: “Bazkaltzera geratu zein ez, bertaratu daitezela Gazte Egitarauaz eta Arrain Azoka moduko egun berezi bateko jai giroaz gozatzera”.7

GAZTE EGITARAUA

13:00. Karropoteoa, Bermeoko Txosna Batzordeagaz batera, Bokaletik hasita.
14:45. Gazte argazkia, San Migeleko eskaileretan.
15:00. Gazte bazkaria, Taraskan.
Bazkalostean. Musika.

Euskara ikasi eta praktikatzeko, Mintzodromoetan bilduko dira

Busturialdeko Hitza — 2026-05-19 10:00:21

24. Korrikak utzitako sentsazio indartsuei helduta, AEK-k hainbat konpromiso hartu ditu, eta, euskararen pizkunderako zer eskaini ahal duen erakutsi nahi diogu Euskal Herri osoari. Beraz, jendartean euskararen normalizazioa bultzatzeko, euskaraz praktikatzeko Mintzodromoak antolatu ditu eguenerako (maiatzak 21), hainbat herritan, tartean Bermeon eta Gernika-Lumon.

Izan ere, inoiz baino euskara gehiago entzuteko asmoz, 65 mintzodromo antolatuko dituzte, Euskal Herriaren luze-zabalean. “Azken batean, horrela lortuko dugu helburua: ikasiz eta praktikatuz”.

Gernika-Lumon, esaterako, 10:00etan bilduko dira Astran, eta bertaratzeko izena eman behar da, hurrengo telefono zenbakietara deituta: 600 48 20 10 edo 94-625 35 93.

Bermeon, aldiz, 18:00etan jarri dute hitzordua: eguraldi ona badago Bermeoko AEK euskaltegian bilduko dira, eta euria eginez gero, Kabidxen. Bermeoko Mintzodromoan parte hartzeko 607 60 95 80 telefono zenbakira deituta izena eman behar da.

“Benetako lanketa, konpromisoa, behin Korrika igarota dator. Asmo handiko helburuekin abiatzen dugu lasterketa, baina ekimena bera labur geratzen zaigu askotan, eta Korrikak irauten duen 11 egunetatik harago joan behar dugu”, azaldu dute, Korrikaren 12. Eguna prestatu dutela iragartzeaz gain.

12. eguna: eta izango gara! ekimena jarri zuen martxan AEK-k, euskararen aldeko lasterketaren balorazioan: “Korrikan parte hartu duten eragile guztiei konpromisoa eskatzen diegu, ekiteko engaiamendua. Lan horretan, besteak beste, ezinbestekoa da ordezkari politikoen ardura, haien babes juridiko eta politikoa. Askok eraman dute lekukoa Korrikan, baina ekintza sinboliko horretatik haragoko konpromisoa eskatzen diegu hemendik: Korrikaren harira egindako adierazpen ederrak ekimen bihur ditzatela, benetan susta dezaten Euskal Herri euskalduna”.

Eskaerak egiteaz batera, AEKk berak zer gehiago egin dezakeen adierazi zuen: “Beti esan dugu ez dela nahikoa Korrikan parte hartzea, hurrengo eguna ere garrantzitsua dela: benetako lanketa, konpromisoa, behin Korrika igarota dator”. Horren baitan, apirilaren 22an ordubeteko eskola eman zuten, doan, AEKren 100 euskaltegietan. Eta, orain, Mintzodromoekin biribilduko dute egitasmoa.

Artisau Arrantza Ezagutuz! programa Bermeora heldu da

Busturialdeko Hitza — 2026-05-18 14:13:55

Izan Arrantzale proiektuaren barruan, Artisau Arrantza Ezagutuz! programa berria aurkeztu du, baxurako arrantzaren sektoreak.

Gipuzkoan sei urtez jardun dute programa garatzen, eta orain, Bizkaira jausia eman dute: “Lehenengo aldiz, arrantza-sektorearen belaunaldien arteko erreleboa lantzeko proiektu estrategiko honek lurralde-mugak zeharkatuko ditu, 2025-2026 ikasturtean Euskadin batera garatzeko”. Izan ere, belaunaldien arteko erreleboaren egungo erronka lantzea da proiektuaren helburua, eta esperientzietan oinarritutako ikasketa-metodologiaren bidez, gaztetxoek artisau-arrantza eta baxurako arrantza tradiziotzat ez ezik, “ekonomia urdinerako lanbide moderno, duin eta funtsezkotzat ere hartzea” lortu nahi dute. Horrekin batera, elikadura eta kontsumo jasangarriago eta arduratsuagoaren garrantziaz sentsibilizatu nahi dituzte.

Bermeoko San Pedro Kofradian egin dute sukaldaritza-tailerraren lehenengo jardunaldia, eta bertako lonja ere bisitatu dute Urkitzaurko Urkitza Eskolako 8 eta 9 urteko 50 ikaslek.

Opegui eta Opescaya Gipuzkoako eta Bizkaiko baxurako arrantza-ekoizleen erakudeek, HAZIk, MSC (Marine Stewardship Council) nazioarteko gobernuz kanpoko erakundeak eta Eroski Fundazioak bat eginez sortu dute programa, eta “aurrekaririk gabeko aliantza estrategikoa” dela azpimarratu dute. Sektore arteko lankidetzak balio-kateko eragile nagusiak batzen ditu, “arrantza-trazabilitatearen zirkulua ixteko”. Batasun horri esker, belaunaldien arteko erreleboaren erronkari hainbat ikuspegi profesional eta aditutatik heldu dakiokeela uste dute: “Euskadi mailan aitzindaria da hezkuntza-proiektu hau, eta bere bitartez, 300 ikaslek arrantzaren prozesua bertatik bertara ezagutuko dute, arrantzaletik mahaira ibilbidea biziz”. Eusko Jaurlaritzaren Elikadura, Landa Garapen, Nekazaritza eta Arrantza Sailaren eta Itsas Garapen Euskadiko Arrantza Ekintza Taldearen laguntzarekin garatzen ari dira programa pilotua.

Argazkia: Eusko Jaurlaritza.

Getaria, Hondarribia eta Bermeoko portuetako lonja eta kofradietara bisitak egingo dituzte, nutrizio eta kontsumo arduratsuari buruzko tailerrak, sukaldaritza ikastaroak eta Arrantza Ikustera Goaz! esperientziak eskaintzen dituzte programan: “Helburua da ikasle bakoitzak bertatik bertara bizi ditzala arrainak itsasotik irteten denetik bere platerera iristen den arte zeharkatzen dituen lau etapa nagusiak, sektorearen ikuspegi osoa eta modernizatua bermatuz”.

Bisitetan, prozesuaren lehenengo fasea ezagutuko dute. Arraina portura nola iristen diren eta ekanteak nola funtzionatzen duen ikusiko dute; rol-jokoen bidez, fikziozko enkante batean parte hartuko dute, erosle bihurtuz.

Nutrizio eta kontsumo arduratsuari buruzko tailerretan, berriz, Eroski zentroak bisitatuko dituzte, “erosketa arduratsuaren garrantzia ulertzeko”. Etiketak irakurtzen, kalitate- eta jasangarritasun-zigiluak identifikatzen eta tokiko eta sasoiko produktuetan oinarritutako elikadura orekatuaren garrantzia ulertzen ikasiko dute.

Sukaldaritza ikastaroak Donostian eta Bermeon emango dituzte. Errezeta “berritzaile eta erakargarrien” bidez, arraina eguneroko elikaduran integratzeko elikagai “dibertigarria eta zaporetsua” dela erakutsiko diete.

Arrantza Ikustera Goaz! esperientzian, ostera, itsasora irtengo dira, “artisau-arrantzako jardunaldi erreal bat bizitzeko”: “Ikasleek zuzenean ikusiko dute baxurako ontziek hondoko tretza bezalako tresna txikiekin nola lan egiten duten”. Horri esker, bertako espezieak bereizi ahalko dituzte, baita harrapaketa bakoitzaren atzean dagoen esfortzua baloratu ere. Azaldu dutenez, hezteaz gain, itsasoarekiko lotura emozionala sortzea dute helburu, “ikasleak artisau-arrantzako eta baxurako etorkizuneko preskriptore eta profesional bihurtuz”.

Ixone Soroa Eusko Jaurlaritzako Arrantza eta Akuikulturako zuzendariaren hitzetan, horrelako programak “funtsezkoak” dira bertoko artisau-arrantzaren eta baxurako arrantzaren etorkizuna bermatzeko: “Belaunaldi berriek Euskadirentzat estrategikoa den sektore bat barrutik ezagutzea behar dugu, gure itsas nortasunari, jasangarritasunari eta hurbileko elikadurari lotua”. Itsasoaren, kofradien eta bertoko arrantzaleen errealitatea ikasleei hurbiltzea portuentzat eta euskal arrantzaren balio-kate osoarentzat “etorkizuna ereitea” dela azpimarratu du.

Raimundo Ruiz de Escudero HAZIko zuzendariak esan modura, programa “aukera bikaina” da gazteei kontsumitzen dutenaren atzean dauden bermeak identifikatzen irakasteko. Eusko Label bereizgarria ezagutzen ikastea nahi dute, euskal flotak harrapatutako arrainaren kalitate, jatorri eta freskotasun “handiko” zigilua baita: “Zigilu hori belaunaldi berrien aurrean balioan jartzeak ekonomia urdina eta tokiko enplegua babesteaz gain, kontsumo arduratsu, kontziente eta euskal lehen sektorearekin konprometituaren preskriptore bihurtzen ditu ikasleak”.

Itsasoaren zaintzaren eta jasangarritasunaren garrantzia lehen lerroan ipiniko du Arrain Azokak

Busturialdeko Hitza — 2026-05-15 17:04:33

Maiatzaren 22tik 24ra bitartean, Bermeo berriro ere itsasoari begira jarriko da, 32. Arrain Azokaren testuinguruan. Aurten, “pauso bat harago” eman nahi izan dute; itsasoaren zaintza, jasangarritasuna eta kontzientzia jarri nahi izan dituzte erdigunean. Horri erreferentzia egiten dio aurtengo leloak: Itsasoa zaindu, bizia dastatu.

Nadia Nemeh Bermeoko alkateak esan bezala, mezu “oso sakona” ematen du: “Gure itsasoa zaintzen badugu, gure etorkizuna zaintzen dugu, gure arrantza sektorea zaintzen dugu, gure herriaren nortasuna zaintzen dugu”. Ideia hori islatu nahi izan dute aurtengo kartelean ere: ume bat heldu baten sorbaldan ageri da, eta itsasoa bere kolore guztietan. Irudi horren bidez, belaunaldien arteko transmisioa, zaintza eta etorkizunarekiko ardura irudikatu nahi izan dituzte.

Horrenbestez, itsasoaren zaintza, transmisioa eta etorkizunarekiko ardura erdigunean ipiniko dituzte. Arrigurikoek bide beretik egin dute sare sozialen bidez zabaldu duten bideoa: “Modu oso berezian lantzen du zaintzaren ideia”. Keinu txikien garrantzia azpimarratu dute bertan, eta “itsosue jabotie geure burue jabotie” dela gogoratzen du ikus-entzunezkoak.

Sustraiei eutsiz, berritasunez beteta dator azoka, eta Maite Caruezo Garapen Ekonomikoko zinegotziak azaldu ditu aurtengo nobedadeak. Berak nabarmendu modura, arrantza sektoreak bizi duen momentuaz gogoeta eginarazteaz gain, kontzientzia lana ere egin nahi dute: “Gure arrantzaleak eta kontserberak zelan dauden eta zertara joan behar garen kontzientziatzea bultzatu nahi dugu”.

20 erakustoki ipiniko dituzte, eta aurten, gainera, tokiko artisauak egongo dira, Pop-up Kresaltsua izeneko gunean: “Saiakera berrien bila eta azokaren etorkizuneko bideak aztertzeko asmoz sortu dugu gune berri hori”. Zortzi artisauk eskuz egindako sorkuntza bereziak edukiko dituzte, itsas arimadun piezen bidez, tokiko talentua eta hurbileko merkataritza balioan jarriz: “Itsasoa tradizio bihurtzen den lekua eta artea olatu bakoitzean aurkitzen dena izango da espazio berri honen espiritua”.

Bestalde, Eusko Jaurlaritzaren Aztertu programak “protagonismo berezia” edukiko du. Tailer eta esperientzia didaktikoen bitartez, itsas ingurunea ezagutzeko eta zaintzaren garrantziaz hausnartzeko tartea eskainiko dute.

Azokaren lehenengo egunean, Bermeoko ikastetxeek Itsasoko laborategia tailerrean parte hartuko dute. Bertan, inguruko ura aztertuko dute, koloreen bidez uraren osasuna ezagutzeko.

Familiei zuzendutako Itsaso osasuntsu baten zentzumenak jarduera egingo dute zapatuan eta domekan, 11:00etatik 13:30era bitartean. Kostaldeko materialak aztertuko dituzte, “zentzumenak erabiliz eta esperimentu txiki baten bidez ura osasuntsu dagoen egiaztatuz”. Jarduera adin guztietarako izango bada ere, 14 urtetik beherakoek helduen laguntzagaz parte hartu beharko dute.

Horrez gain, gaurtik aurrera, Nestor Basterretxea aretoan ikusgai dago Azterkostaren Itsasoaren Sekretuak erakusketa. Domekara bitartean, 18:00etatik 20:00etara bisitatu daiteke, eta datorren zapatuan eta domekan, berriz, 11:00etatik 14:00etara eta 18:00etatik 21:00etara domekan 11:00etatik 14:00etara.

Nadia Nemeh Bermeoko alkatea: “Gure itsasoa zaintzen badugu, gure etorkizuna zaintzen dugu, gure arrantza sektorea zaintzen dugu, gure herriaren nortasuna zaintzen dugu”

“Herri oso baten parte hartzeak” daukan esangura erakusten du Arrain Azokak. Hor dago Arrain Azokaren “benetako indarra”. Izan ere, herriko kultur eta kirol taldeak, elkarteak, boluntarioak, ikastetxeak, erakundeak eta enpresak elkarlanean aritzen dira urtero. “Hori da gehien baloratzen duguna, Arrain Azoka herri oso batek egiten duela”, azpimarratu du alkateak. Horregatik, antolakuntzako kideei, elkarte eta taldeetako kideei, boluntarioei, Arrigurikoei eta ikusten ez diren lanetan aritzen diren denei eskerrak eman dizkie. Caruezok ere esker ona adierazi, eta batasun horren garrantzia nabarmendu du: “Arrain Azoka da gure herriaren batasuna erakusten duen momentu bat da“.

[ARRAIN AZOKAKO EGITARAUA]

Alkateak zehaztu du ez dela azoka hutsa: “Geure herriaren isla da, gure arrantzaleen lana aitortzeko espazioa, gure kontserben kalitatea erakusteko aukera bat, eta batez ere, belaunaldiz belaunaldi transmititu den itsasoarekiko lotura ospatzeko unea da. Arrain Azoka gure herriko hitzordu garrantzitsuenetako bat da. Hiru egunez, gure nortasuna, gure kultura, gure gastronomia eta gure historia partekatuko ditugu herritarrekin eta bisitariekin”. Ildo beretik hitz egin du Ainhoa Elortegi BBK-ko Ingurumen arloko arduradunak: “Azokak ez dira soilik salerosketarako guneak; gure sustraien ispilu dira, gure historia kontatzen dute eta etorkizunerako bidea markatzen duten guneak dira”.

Hegaluze Saria. Barikuan, 12:00etan izango da inaugurazio ekitaldia, eta bertan, Bermeoko Nautika Eskolak jasoko du 29. Hegaluze Saria, “merezi” duen aitortza: “50 urte baino gehiago daramatza belaunaldi askori prestakuntza eskaintzen, eta gure itsas kulturaren transmisioaren ezinbesteko lana egiten”.

BBK-ko Ingurumen arloko arduradunaren hitzetan, urtero herri honek bere nortasun propopioa daukala “argi eta garbi erakusten” du, arrantzaleen zein sareginen lana goraipatuz, kontserbagileen eskutrebetasun eta elkarte gastronomikoen elkarlana erakutsiz: “Euren lanak eta euren ohiturak sortzen duten energia berezi hori balioan jarri nahi ditugu BBK-tik. Ia 50 urte daramatzagu Bizkaiko azokak babesten, eta argi ikasi dugu tradizioak gure komunitatea sendotzen duela”. Gogoratu du sasoiko produktuak, tokiko ekoizleak eta itsasoarekiko errespetua ez direla “kontzeptu hutsak”, gure bizimoduaren parte dira eta gure nortasunaren oinarri: “Herritarrek gero eta gehiago baloratzen dute gure kostaldeko produktuen jatorria, jendeak badaki zer dan ona eta badaki nondik datorren”. Horrek lehenengo sektorea “indartu” egiten duela adierazi du: “Horregatik, sektore honi laguntzen jarraituko dugu, kalitatea, jasangarritasuna eta gure inguruarekiko ardura ardatz hartuta”.

[ARRAIN AZOKAKO EGITARAUA]

Elkartasuna. Arrain Azoka elkartasuna ere bada, eta Solidaritza Gunea Lamerako karpan kokatuko dute. Barikuan eta zapatuan 13:00etatik 21:00etara eta domekan 13:00etatik 15:00etara bitartean egongo da zabalik, eta bertan bildutako dirua Bermeoko 6 eta 12 urte arteko umeen tratamenduetara bideratuko dute, Osakidetzak estaltzen ez dituen beharrei erantzuteko.

Marmitakoa eta hegaluze errea dastatzeko aukera izango da, boluntarioen laguntzari esker: “Herriko kultur, kirol eta gizarte taldeek, ikastetxeek eta gainerako partaideek egingo dute posible ekimen solidarioa. Etxera eramateko asmoa duten pertsonei ontzi propioa ekartzeko eskatu zaie”.

Asko ematen du azokak, eta asko da bere inguruan mugitzen dena ere. Arrain salmenta itxurak, Nautika Eskolako nabigazio-simulagailura bisitak, Hegaluze eta Taho itsasontzietan irteerak, Arrantzaleen Museora doako sarrera, fanfarreak, dantza saioak, danborradak, txistulariak, trikitilariak, erraldoiak, pilota eta zesta partiduak… Eskaintza zabala egongo da aukeran, eta programa osoa zein eguneraketak www.bizibermeo.eus webgunean eta Arrain Azokaren sare sozialetan jasoko dituzte.

50 urtez herria dantzan jartzen

Busturialdeko Hitza — 2026-05-15 08:39:14

Jakina da dantzatzen duen herria inoiz ez dela hiltzen. Hori sobera dakite Bermeon. Aurten mende erdia beteko du Bermeoko Alkartasuna Dantza Taldeak. 50 urtez dantzatu dute herriagaz, eta orain, lanaren uzta jasotzen ari dira. Domekan, Bizkaiko beste dantza taldeekin partekatuko dute urteurren ospakizuna.

Belaunaldi ugari igaro dira taldearen entsegu, bidaia eta ekitaldietatik, eta denboraren poderioz, herriko kultur panoramaren erreferente bihurtu da. Urteurren biribil horren aitzakian, zuzendaritza batzordeko kideek taldearen ibilbidea, egungo egoera eta etorkizunari begirako erronkak dituzte hizpide.

Alkartasuna Dantza Taldearen jatorria xumea izan zen. 1976an, Bermeoko institutu zaharrean, mutil kuadrilla bat elkartu zen, ikasketa bidaiarako dirua lortzeko ekitaldi bat prestatzeko asmoz. Gehienek ez zekiten dantzan, baina egoera hark ustekabeko bidea zabaldu zien: dantzan ikastekoa, euskal kulturarekin bat egitekoa, eta urteen joanagaz herrian egonkortuko zen taldea sortzekoa.

Orduan ezagutu zuten Patxi Beitia, Eibarko Klub Deportiboan dantzak erakusten aritutakoa. Harekin hasi ziren dantzan ikasten, eta berehala argi geratu zen taldeak aurrera egiteko emakumeak ere behar zituela: «Esan zigun ezinezkoa zela dantza talde bat sortzea, emakumerik gabe». Neskak taldera gonbidatu, eta Alkartasuna Dantza Taldea sortu zen. Izena bera ere Beitiak berak jarri zuela aipatu dute, gizon-emakumeen arteko elkartasuna azpimarratzeko.

Urte hauetan guztietan taldea asko aldatu dela diote kideek. Hasieran, Beitia zen dantzak zekizkien bakarra, eta gainontzekoek pixkanaka ikasi zituzten. Egun, dantzak ikasteko aukerak asko zabaldu dira; sare sozialen bidez ikas daitezke, eta dantzen estiloak beraiek ere aldatu egin dira.

Argazkia: Alkartasuna Dantza Taldea.

Aldaketa horien aurrean, taldeak gizartearekin batera moldatzen jakin du: «Gizartearen etengabeko aldaketara egokitu gara, egunerokotasuneko egoerak eta behar berriak kontuan hartuta; halaxe egin dugu urtez urte aurrera». Mende erdiko ibilbidea ez da kasualitatea; talde atzeko lan handia dagoela azpimarratu dute zuzendaritzako kideek.

Hasierako urteetan, taldea bera sortuta egon arren, ez zeukaten estatuturik, ezta egitura formalik ere. Hamargarren urteurrenean eman zuten urratsa, nabarmendu dutenez: orduan, estatutuak sortu eta elkartea ofizialki eratu zuten. Gaur egun, kultur elkarte moduan funtzionatzen dute, dagokion zuzendaritza batzordearekin: lehendakaria, kontu hartzailea, idazkaria eta dantza irakasleak. Lana taldeetan banatzen dute, guztien artean «antolatuago» aritzeko.

Gainera, taldearen jarduna ez da nagusien entseguetara mugatzen. Izan ere, kideen erdia baino gehiago haurrak dira, eta horrek «lan handia» eskatzen du. Urte osoan zehar antolatzen dituzten ekitaldiekin, Aratusteetatik Gabonetara arte luzatzen den egitaraua osatzen dute, horrela «herriarengana hurbiltzeko».

Taldearen izenak adierazi legez, elkartasuna oinarrizko balioa da Alkartasuna Dantza Taldean. Entseguak, bilerak, ekitaldiak eta bidaiak medio, ordu asko pasatzen dituzte elkarrekin, eta horrek harreman estuak sortu ditu: «Dantzari esker, familia bat sortu dugu». Familia hitzak bi zentzu hartzen ditu beregain: batetik, talde barruko giro estua; bestetik, belaunaldi arteko jarraipena. Izan ere, taldekide askoren seme-alabak ere gaur egun dantzan dabiltza, eta hori «seinale ona» da.

Zutabe nagusiak
Alkartasunaren oinarrian daude euskal kultura, tradizioa eta euskara. Horiek dira kide guztiek partekatzen dituzten balio nagusiak. Baina beste hainbat ere lantzen dituzte: familia sentimendua, elkarlana, errespetua eta diziplina. Gazte-gaztetatik barneratuta, urteekin «taldekideen baitan errotzen» dira.

Euskal dantzen egoerari dagokionez, Busturialdean «osasuntsu» ikusten dute panorama. Eskualdean dantza talde ugari daude, askok urte ugari daramatzate lanean. Adibidetzat jarri dute urteroko Busturialdeko Dantzari Eguna, adin guztietako dantzariak biltzen dituena. Halere, erronkak ere badaude: egungo gizarteak aisialdirako aukera asko eskaintzen dizkie gazteei, eta horrek zaildu egiten du euskal dantzen aldeko hautua: «Gure lana da hautu hori egiten duten gazteak ez galtzea».

Egonkortuta
Urteek eman dioten ibilbideari esker, Alkartasuna Dantza Taldea errotuta dago Bermeoko kultur eskaintzan. Dantza oinarri hartuta, denetariko ekimenak antolatzen saiatzen dira, ahalik eta publiko zabalenera iristeko. Horren adibide da taldearen egungo argazkia, 5 eta 13 urte bitarteko 74 gaztek eta 50 bat helduk osatzen baitute taldea: «Urtez urte aldaketa txikiak izan ditugun arren, egonkortasunari eusten diogu, zorionez».

Dantza taldearen urteurren berezia ospatzeko egitaraua prestatu dute. Asmoa da urte osoan zehar hainbat ekimen antolatzea eta bultzatzea. Aurreratu dutenez, besteak beste, taldearen sare sozialen bidez jakinaraziko dituzte antolatzen dituzten ekimen berriak. Hori bai, argi eta garbi dute ospakizunek helburu argi bat izango dutela: azken 50 urteetako lana balioan ipintzea eta taldearen ibilbidean parte hartu duten guztiei aitortza egitea.

Mende erdia igaro da Bermeoko institutu zaharrean sortutako ideia hartatik. Ordutik, dantzak eta elkartasunak belaunaldiak batu dituzte Alkartasunan, eta badirudi erritmoak luzerako daukala oraindik.

Argazkia: Alkartasuna Dantza Taldea.

Mediterraneoko harresiak hausten

Busturialdeko Hitza — 2026-05-14 16:48:03

Mundu berri bat. Bizitza berri bat. Zerotik hastea. Ametsez betetako bidaian abiatu, eta noraezean egon ondoren, nahi ez den errealitatearekin topo egitea. Pateran sartu, eta Mediterraneoan noraezean dauden pertsonak erreskatatzen dituen Aita Mari itsasontzia hamaika bizipen gordinen lekuko izan da. Egunotan, Itsas Salbamendu Humanitarioak egiten duen lan ordainezina bertatik bertara ezagutu dute bermeotarrek.

Jon Garcia Andonegi Aita Mariko boluntario bermeotarra ibili da bisita gidatuak zuzentzen. Bermeon ondo hartu dituzte; herritarrentzako bisitak eskaintzeaz gain, udalerriko ikastetxeetako ikasleak hurreratu zaizkie ontzira, baita udalbatza ere. Bermeon harrera «oso ona» izan dutela azpimarratu du Garciak: «12 urteko umeek erakutsi duten interesak atentzioa eman dit. Galdera asko egin dizkidate. Pasaia Itsas Festibaletik gonbidatuta etorri gara. Ate irekiak Bizkaian eta Gipuzkoan egin ditugu; Bilbotik etorri ginen Bermeora, eta hurrengo asteburuan Pasaiara goaz, eta handik, Portugaletera. Gero, Xixon, Coruña eta Saguntora joango dira, ekainean hasiko duten hurrengo misioa prestatzera».

Garcia 2016an Zaporeak proiektuarekin egon zen Grezian, Quiosen. Bertako kanpamenduetan sukaldean aritu zen beharrean, eta gero, Kataluniako Open Arms gobernuz kanpoko erakundearekin ere egon zen: «Sukaldaria nintzela jakin zuten, eta eurak deitu zidaten. Misio bat egin genuen; Golfo Azzurro ontzian, bi egunetan, 500 pertsona inguru erreskatatu genituen. Aita Marirekin ez dut misiorik egin, baina boluntarioa naiz, beti nago edozertan laguntzeko prest». Izan ere, berak esan modura, euren lana ere «beharrezkoa da», lehorreko lana ere garrantzitsua da: «Atzean ere jendea behar da; nire lanpostua profesionalizatu egin da, tripulazioan sartuta dago, eta ni boluntarioa naiz».

Aita Mari ontziaren transformazio prozesu osoan egon zen, Pasaian, eta ondo baino hobeto ezagutzen ditu ontziaren zirrikitu denak, ikusten direnak zein ikusten ez direnak. Arrantzontzia egokitu behar izan zuten, funtzio berrirako prestatu. Gaur egun, behean bi kamarote dauzka, komuna, dutxa, biltegi txiki bat eta fotokazetariarentzako mahaia eta ordenagailua. Goian dauzka, besteren artean, bina komun eta dutxa, garbitegia eta erizaindegia: «Eusko Jaurlaritzaren laguntzagaz, itsasontzia erostea lortu genuen, Jaurlaritza inplikatu egin zen, baina, gogoratzen dut Espainiako Gobernuaren baimenak jasotzeko, lauzpabost hilabetez itxaroten egon ginela». Hasieratik, beraz, hainbat trabari eta oztopori aurre egin behar izan diete: «Erreskate ontziek erreskate-guneetatik urrun mantendu nahi gaituztenek inposatutako milaka trabari aurre egin behar diegu».

Azaldu dutenez, gaur egun, Italiak portu segurua eskaintzen du erreskatea egin bezain laster, baina bertan geratzea galarazten die, arriskuan dauden beste ontzi batzuk hartzea galaraziz. Gainera, erreskatetik hurbilen dagoen portua esleitzeko agintzen duen nazioarteko zuzenbidea urratuz, Italiako Gobernuak urrutiko portuak eskaintzen dizkiete. Adibidez, Aita Mariren hamahirugarren misioan, bost egunez bidaiatu behar izan zuen Ravennara, Italiako mendate urrunera, 1.700 kilometrotara: «Estrategia bat da erreskate ontziak urrun mantentzeko eta gure baliabide ekonomiko urriak kaltetzeko. Misio horretan, bi erregai-tanga bete ziren, 40.000 euroko gastua suposatuz».

Itsas Salbamendu Humanitarioko partaideek zehaztu bezala, erreskatatutako pertsonak eurentzat ez dira migratzaileak ezta errefuxiatuak ere, eskubide osoko pertsonak dira: «Guretzat gure gonbidatuak dira». Itsasontzian sartzen direnean, uretan erreskatatzen dituzten momentuan ematen dizkieten txalekoak kentzen dituzte, eta lesio edo gaixotasunen bat baldin badaukate, medikuarengana bideratzen dituzte. «Batzuk hiruzpalau egun igarotzen dituzte barkuetan, ontzien arabera, eta batzuk erredura larriekin etortzen dira, lehenengo graduko erredurekin. Garrantzitsua izaten da medikua edota erizaina emakumezkoa izatea, eta gehienetan horrela izan da hemen; izan ere, erreskatatu ditugun emakume asko bortxatuak izan dira».

Zapore gazi-gozoko momentuak izaten dira. Izan ere, hainbat emoziok bat egiten dute; batetik «poza» sentitzen dute, erreskatatzen, laguntzen ari direlako, eta bestetik, egin nahiko ez luketen misioan ari dira, ez dutelako nahi inork horrelako egoerak bizitzerik: «Jendeak migratzeko horrelako oztoporik ez litzateke egon beharko, bizi hobe baten bila dabiltzalako. Denok emigratu dugu, orain eta iraganean. Normalean, Europara heltzen denarentzat ez da saiakera egin duen lehenengo aldia. Jende asko hiltzen da bidean. Mediterraneoa bada hilobia, baina basamortuan ere jende asko hiltzen da. Esaterako, Libiako herritarrek kontatzen dituzten istorioak beldurgarriak dira; tratu txarrak, bortxaketak, estortsioak… ». 70-80 pertsonarentzako lekua daukate: «Aita Mariren azkenengo misioan, 35 pertsona erreskatatu zituzten».

Aita Marikoek noraezean dagoen ontziren bat ikusten dutenean, Erromako kontrol-gunera deitzen dute, bertatik portu bat esleitzeko: «Eurek ematen digute baimena. Gure erreskate eremua Maltarena da, baina Maltak ez du ezer jakin nahi; gu ere ez gaituzte bertan nahi, sartzen ere ez digute uzten. Ni egon nintzenean, Maltan eduki genuen basea. Italiak baimena ematen digu, baina bertako itsas salbamenduko ontziak ez dira erreskateetara ateratzen. Uste dut italiar bakarra dagoela; gehienak Alemaniako gobernuz kanpoko erakundeak dira, eta Frantziakoak ere badaude».

Denak ontzi barruan daudenean, kit-ak banatzen dizkiete: mantak, arropak, janariak, mahai-tresnak… Eta dutxatu egiten dira. Jakiak eta gainontzekoak dohaintzetatik eskuratzen dituzte: «Jatekoa sobera edukitzen dugu. Esate baterako, Hotz Zarautz pertsona errefuxiatuen eta beraien eskubideen alde lanean diharduen gobernuz kanpoko erakundeak laguntzen digu». Hamalau pertsonak osatzen dute tripulazioa: «Legeak zortzi kide finkoak izatera behartzen gaitu: kapitaina, bi ofizial, makineriako burua, sukaldaria eta hiru marinel, eta sei boluntarioak dira hiru erreskatatzaile, erizaina, medikua eta fotokazetaria.

Portura iristen direnean, nahiko ez luketen errealitatearekin topo egiten dute: «Portura iristen garenean, ematen du presoak daramatzagula, dena poliziaz beteta egoten da. Eurek ez dakit zer datorkien, eta guk ere ez diegu esaten. Paperak lortzeko, asko borrokatu behar dute. Asilo eskaera gezur edota asmakeria galanta da. Gehienei ukatu egiten diete; gai konplexua da». Bermeotarraren hitzetan, Europako herrialdeak «gero eta lege zurrunagoak eta murriztaileak» egiten ari dira, eta ondorioz, erreskatatzen dituzten pertsonei «gero eta etorkizun ilunagoa» geratzen zaie.

Andra Mari eta Santa Eufemia jaien azalaren bila

Busturialdeko Hitza — 2026-05-12 10:00:42

Bermeoko Udala Andra Mari eta Santa Eufemia jaiak iragarriko dituen kartelaren bila dabiltza dagoeneko. Ohi legez, lehiaketa formatuan aukeratuko dute jaietako azal berria eta edozein pertsona fisikok parte hartu dezake. Interesdunek ekainaren 26ko 14:00ak bitartean dute proposamenak aukezteko aukera.

Lehiaketaren gaia Bermeoko jaiak izango da eta kartelak herriaren izaera islatu beharko duela zehaztu dute; hau da, jai herrikoiak eta herritarentzat direnak irudikatu beharko ditu, sortzaileak, euskaldunak, feministak, solidarioak eta ekologistak. Gainera, karteletan ‘Bermeoko jaiak 2026’ eta ‘irailaren 7tik 16’ testuak agertu beharko dira derrigor.

Sormen aldetik, parte hartzaileek nahi beste kolore eta teknika uztartu ahal izango dituzte, baina azken emaitzak 50×70 zentrimetroko neurria izan beharko du, formatu bertikalean eginda. Kartela lehiaketara aurkezteko bi bide zabaldu dituzte: bereizmen handiko PDF formatuan edo euskarri gogorrean, N-292 inprimakia beteta. Proposamenak Berhaz Bulegoan —08:00etatik 14:30era— edo Bermeoko Udalaren egoitza elektronikoan entregatu beharko dira.

Aukeraketa.
Jasotako proposamen guztien artean bakarra sarituko dute, eta irabazleak 600 euro jasoko ditu. Aukeraketa bederatzi kidez osatutako epaimahaiak hartuko du eta nabarmendu dutenez, horretan emakume eta gizonen ordezkaritza “orekatua” izango da. Lan guztiak aztertuko dituzte, besteak beste estetika, Bermeoren izaera islatzea, balioak eta originaltasuna kontuan hartuta. Balorazioan “gizakiek egindako lanak” lehenetsiko dituzte adimen artifizialaren bidez egindakoen aurretik. Edonola ere, parte hartzaileren batek kartelen sorkuntzan adimen artifiziala erabiltzen baldin badu, nahitaez horren berri eman beharko du aurkezpenean.

Epaimahaikiden bozkak zenbatuta, puntuaziorik altuena duten lanak azken fase batera sailkatuko dira. Horretan, herritarrek izango dute jaietako kartel irabazlea bozkatzeko ardura. Bozketa epea uztailaren 1eko 08:00etatik uztailaren 10eko 14:00etara artekoa izango da, eta udalaren webguneko Esaizu plataforman zein Gizarte eta Kultura Etxean egin ahalko da. Presentzialki bozkatzeko ordutegia 09:00etatik 14:00etara eta 17:00etatik 21:15era artekoa izango da, astelehenetik barikura bitartean. Gizarte eta Kultura Etxean aurrez aurre emandako botoek %70 balioko dute eta internet bidez jasotakoek berriz, %30.

Ia 15.000 euroko bilketa, pedalkaden bitartez eta ‘bizitzaren alde’

Busturialdeko Hitza — 2026-05-11 14:36:39

Asteburu ahaztezina izan da Bermeoko Ziklistek taldeko kideentzat: Minbiziaren Aurkako Elkartearentzako dirua biltzeko, Bizitzaren alde lelopean, Bermeo eta Castejon lotu dituen 450 kilometroko joan-etorrikoa egin dute, egun bitan. Domekako eguraldi txarraren iragarpenak Lamerako helmuga gunean prest zeuden jarduerak bertan behera utzi zituen, baina herritarrek harrera beroa eman zieten leher eginda baina zoriontsu bueltatu ziren txirrindulariei.

35 ziklista irten ziren Bermeotik, eta 31 itzuli. Baina lehen etaparen helmugara, Castejonera, 70 txirrindulari inguru iritsi ziren: “Urbasa inguruan bertako kideak bildu zitzaizkigun, eta herrian egundoko helmugaratzea prestatu ziguten”. Haizea izan zen azken kilometro haietako protagonista nagusia. Itzuleraren azken txanpan, ostera, euriteak harrapatu zuen tropela: “Barazar mendatea jaitsi ondoren, ekaitza jasan genuen, baina Bermeora ateri zela iritsi ahal izan ginen”.

Argazkia: Bermeoko Udala.

“Ez da azkena izango”.
15.000 euro inguru lortu dituzte, beraien esfortzuari esker: “Zifra polita da, pozarren gaude lortutakoaz”. Gainera, kutsu solidarioaz harago, tropelak edukitako “jarrera” nabarmendu dute: “Adibidez, trafiko gehien izan dituen errepide tarteetan, tropela zatitu egin dugu, ahalik eta trabarik txikiena sortzeko; oro har, errespetuz eta gizalegez jokatu dugu, eta oso harro gaude erakutsitako jarreraz”.

Horrenbestez, aurreratu dute Bermeo eta Castejon lotu dituena “ez dela azken erronka” izango: “Oraindik goizegi da ezer aurreratzeko, baina etorriko dira abentura berriak, betiere helburu solidarioekin eta bi gurpilen gainean”.

192 lagun batu ditu Warhammer 40k lehiaketan

Busturialdeko Hitza — 2026-05-05 14:40:52

Bermeoko Rol Eskola Elkarteak (BREE) ez dio urteroko hitzorduari utzik egin, eta herrian errotzen hasita dagoen lehiaketa antolatu dute, zazpigarrenez: Warhammer 40k txapelketa. Bermeoko elkartearentzat hitzordu berezia izaten da maiatzekoa, parte hartzaileen zein kuxkuxeroen “erantzun ona” izaten baitute. Horren isla, zapatuan Artza [maiatzak 2] beteta egon izana.

Warhammer 40k jolas futuristak gero eta zale gehiago ditu mundu guztian zehar, eta mundu guzti horren zati txiki baina esanguratsua elkartu zen zapatuan Bermeoko udal pilotalekuan: 32 taldetan banatutako 192 parte hartzaile. Talde guztiak Artzan sartu ahal izateko baina, antolakuntzak “zailtasun handiak” izan ditu: “32 taldeak sartu ahal izateko uko egin behar izan diogu, besteak beste, eszenatokiari”. Espazioa dute BREEkoek “oztopo nagusietako bat”; izan ere, aurten bederatzi talde lehiaketatik kanpo utzi behar izan dituzte: “41 taldek eman zuten izena, baina ez zen posible denak sartzea; lekua izango bagenu 246 lagun elkartuko ginateke”.

Parte hartze handiena. Edonola ere, antolatzaileak “pozik” daude izandako erantzunagaz, izan ere inoizko parte hartzerik handiena izan du aurten txapelketak:, iaz 26 talde eta 156 parte hartzaile elkartu ziren eta 2024ean, berriz, orain arteko errekorra zuen txapelketak, 30 talde eta 180 lagun batu zituen.

Bermeo Rol Eskola Elkarteko kideak.Bermeoko Rol Eskola Elkartea

Zailasunak zailtasun, Bermeo Rol Eskola Elkarteak asteburuak utzitakoaren “balorazio ona” egin du., Warhammer zaleak “eroso” egotea lortu zutelako eta hori beraientzat “garrantzitsua” den aldagaia delako: “Beste lehiaketa batzuetan ikusi dugu partaide gehiago hartu ahal izateko mahaiak txikitzen dituztela, baina guretzat oinarrizkoa da Warhammer 40k txapelketa lehiatzen ari direnak eroso egotea”.

Sariak. Lehiaketaren zazpigarren aldia izan da aurtengoa. Lehen sei urteetan bost taldek lortu dute garaipena, azken bi urteetan, Battlebunker talde gasteiztarra izan baita garaile. Aurten baina, ezin izan dute hirugarren garaipena eskuratu: Team Spain 2024 taldea izan zen onena, eta lehenengo postuan amaitu zuten txapelketa. Edonola ere, hirugarren amaituta, podiumea izan ziren gasteiztarrak, bigarren amaitu zuen Diamond Dogs taldeagaz. Jokalari onenaren saria, bestalde, Alejandro Mancusok poltsikoratu zuen eta hoberen margotutako armadaren saria, berriz, Carlos Pueblak.

90ko hamarkadan sortuta, 2019an birfundatu zuten elkartea, helburu argiagaz: gazteak pantailetatik urrundu eta parez pare jolas dezatela bultzatzea. Hasieran bigarren aroa Warhammer mundura bideratu bazuten ere, mahai-jokoek bere lekua eskuratu dute, eta elkarteak “eskaintza zabala” du orain.

Itsaso garbien aldeko marrazki eta leloak

Busturialdeko Hitza — 2026-05-05 11:38:52

Bermeorako bidea hartu du Mater Ontzi Museo Ekoaktiboak bultzatutako Zero Zabor Uretan programa ibiltariak. Atzo aurkeztu zuten Zabor eta Bio erakusketa Nestor Basterretxean, eta bertan egon ziren Bermeoko Herri Eskolako, Eleizalde Ikastolako eta Sagrado Corazon ikastetxeko ikasleak.

Bermeoko ikasleak dira, hain zuzen, domekara bitartean Gizarte eta Kultura Etxean ikusgai dagoen erakusketako irudi eta marrazkiak sortu dituztenak. Beraien lana eskertu eta zorionak eman zizkien Nadia Nemeh Bermeoko alkateak: “Zuen ahotsak eta zuen mezuek erakusten dute baduzuela kontzientzia, ardura eta etorkizuna zaintzeko benetako gogoa”.

Marrazkiek batera, Bio eta Zabor erraldoiek apainduko dute asteon Gizarte eta Kultura Etxea: alferrik botatzen diren gauzak islatzen ditu Zaborrek, plastiko eta zatarraz egindako munstroak. Bio erraldoiak, berriz, itxaropena transmititzea du helburu, pertsona oro itsas zaindari bihurtzea. Misio bera dauka erakusketak ze, Nemehk esan legez, “Zero zabor uretan ez da esaldi hutsa”. Erakusketa “hausnartzeko, ikasteko eta konpromisoak hartzeko abiapuntutzat” jo zuen alkateak.

Eguneroko erronkak.
Ikasleek itsaso osasuntsu baten aldeko hainbat konpromisogaz bat egin eta aurrera eraman ditzaketen ekintza txikiak zerrendatu zituzten: “Zaborra gutxitu behar dugu, gauzak berrerabili, itsasoa oso txarto, zikin, dagoelako. Zaborra txikitzeko, adibidez, ura kantinploran eraman dezakegu, eta aluminio-papera erabili beharrean, tuperrak erabili”. Sagrado Corazonekoek programa zabaltzeko prestatutako leloen berri ere eman zuten: Bermeo garbi, itsasoa bizi edo Ura bada garbi, garbia da bizi izan ziren proposamenetako batzuk. Bermeok duen gazteria “konprometitua, sortzailea eta ausarta harro egoteko modukoa” dela adierazi zuen Nemehk.

Domekatik aurrera, Bermeoko merkatari elkarteak hartuko ditu ikasleen marrazkiak, erakusleihoetan jarri eta mezua zabaltzen jarraitzeko.l

Warhammer zaleen topaleku izango da Artza asteburuan

Busturialdeko Hitza — 2026-05-01 11:15:11

Maiatza iristeagaz batera badator bermeotar zein Warhammer zaleen agendan errotzen hasitako hitzordua: Bermeoko Rol Eskola Elkartearen (BREE) VII. Warhammer 40k lehiaketa. Lehiaketak handik eta hemendik etorritako Warhammer 40k jolas futuristaren zaleak bildu ditu azken urteetan eta aurten ez da ezberdina izango, inoizko parte hartzerik handiena izango baitu aurten: 32 taldetan banatutako 192 parte hartzaile igaroko dira bihar [maiatzak 2] zein etzi [maiatzak 3] Artza pilotalekutik.

BREEk antolatutako txapelketa urtez urte erantzun zabalagoa izaten ari da, eta antolakuntzak “zailtasun handiak” izaten ditu guztiak pilotalekuan kokatu ahal izateko: “32 talde sartu ahal izateko eszenatokiari eta beste hainbat elementuri uko egin behar izan diegu, eta hala ere, bederatzi talde lehiaketatik kanpo gelditu dira. 32 sartu ditugu, baina 41ek eman zuten izena; lekua izango bagenu 246 lagun elkartuko ginateke”.

Beste lehiaketa batzuetan espazio berean talde gehiago sartzeko mahai txikiagoak ipintzen dituztenak ohartu dira BREEkoak, baina beraientzat “jokalariaren erosotasuna garrantzitsua” da, horregatik, talde batzuk kanpo utzi dituzte. Warhammer zale guztiak bildu ezin izatea “penaz” bizi badute ere, lehiaketak “tiradizo handia” duela ikusteagaz pozik daude.

Warhammer zaleek zein jolasera lehen hurbilketa bat egiteko interesa dutenek egun guztian zehar edukiko dute horretarako aukera bihar: 08:00etan hasiko dira, eta 20:30 aldera amaituko dute eguna. Hiru partida jokatuko dituzte, lehenengo biak goizean zehar, eta hirugarrena arratsaldean, 17:30etik aurrera. Domekan, berriz, bi partida jokatuko dituzte goizean, eta 15:00ak aldera sari banaketa egingo dute. Sariak dira, hain zuzen, BREEkoek “asko zaintzen” duten beste elementuetako bat, izen ematea ordaindu duenak “merezi duela sentitzea” bilatzen baitute.

Bermeoko berbalagunek udaberriko sendabelarrak ezagutu dituzte

Busturialdeko Hitza — 2026-04-30 16:00:21

Bermeoko Berbalagunek udaberriko sendabelarrak ezagutzeko saioa antolatu zuen atzo [apirilak 29], eta hamabost lagun inguruk egin zuten bat deialdiagaz.

Taraskan elkartu ziren eta Kurtzio auzoan egin zuten lehenengo geldialdia, besteak beste, horma belarrak eta asunak aztertzeko. Gaizka Sanchezen azalpenak entzunda, sendabelarrok nola eta noiz jaso, nola egosi eta errespetatu beharreko mugak ezagutu zituzten. Horrez gain, Sanchezek sendabelar bakoitzak gorputzeko zein ataletan eragiten duen azaldu zien berbalagunei.

Sanchezek berak papezko poltsatxo bana eman zien parte hartzaileei, eta horiek sendabelarrez bete zituzten, hurrengoan zeintzuk batu jakiteko: “Agendetan apuntatu genituen zehaztapenak, ez ahazteko”.

Arratsalde “aberasgarria”
Berbalagunek arratsalde «interesgarri eta aberasgarria» igaro zuten: “Seguru hurrengo hitzorduren batean jarraituko dugula sendabelarren munduan sakontzen, elkartrukean eta euskaraz”.

Atuna balioan jartzeko pintxo lehiaketa antolatu dute

Busturialdeko Hitza — 2026-04-29 09:30:26

Maiatzaren 2a [zapatua] Atunaren Nazioarteko Eguna dela aprobetxatuta, atunaren balio kateko eragileak biltzen dituen Bermeo Tuna World Capital elkarteak I. Bermeo Tuna Pintxo Lehiaketa antolatu du. Hala, barikutik [maiatzak 1] domekara [maiatzak 3] bitartean herriko 15 establezimenduk atunarekin eta hegaluze jasangarriarekin egindako pintxoak eskainiko dituzte.

Lehiaketaren helburua atuna balioan jarri, Bermeoko arrantza tradizioagaz duen lotura azpimarratu eta udalarriko ostalariek beraien proposamenetan egiten duten berrikuntza eta jasangarritasunaren aldeko lana nabarmentzea da. Horregatik, pintxoak egiteko erabiliko duten produktua “bertako flotatik” datorrena izango da, baita inguruko kontserba-enpresetatik eta atunaren sektoreko enpresetatik ere.

Asteburuan Bermeora bertaratzen den edonork izango du 15 tabernak bisitatu eta pintxoak dastatzeko aukera, 14:00ak orduko. Pintxo janak gainera, saria izan dezake. Antolatzaileek bezero zein establezimenduentzat sariak prestatu dituzte: publikoaren artean “herriko establezimenduetan gozatzeko hainbat esperientzia” eta Bermeo Tunako atun jasangarriko kontserba-sortak zozkatuko dituzte; taberna irabazleak, berriz, txapela eta 300 euroko bonoa jasoko ditu, bere ohiko kontserba hornitzailean trukatzeko.

Zozketan parte hartu nahi duten herritarrek establezimenduetan eskuragarri egongo den libuxka eskuratu beharko dute eta, gutxienez, hiru taberna ezberdinetan pintxoak kontsumitu beharko dituzte. Tabernariari liburuxkan zigilua jartzea eskatu beharko diote, norbere datuekin bete eta tabernetan kokatuko dituzten kutxetako batera bota. Establezimendu parte hartzaileak ondorengoak dira: Alakrana Bermeo, Andeko, Batun Batun, Bokale, Artza Frontoiko Taberna, Kai Alde, Zubigane, Bermeoko Kafe Antzokia, Toki Alai, Etxepe, Leku, Galerna, Oker, Joshe Mari eta Eguzki.

Portuzarrera sartzeko baimen iraunkorrak eskatzeko epea zabaldu du udalak

Busturialdeko Hitza — 2026-04-17 15:05:38

Espazioaren erabilera orekatuagoa eta oinezkoen lehentasuna bermatzeko helburuagaz, Bermeoko Udalak Portuzarreko ibilgailuen zirkulazioa mugatzea erabaki du, eta ondorioz, urteko aldi ezberdinetan itxita egongo da. Halere, herritarrei eta portuarekin lotura zuzena duten eragileei “informazio argia eta garaizkoa” eskaini asmoz, Portuzarrera sartzeko baimen iraunkorrak eskatzeko epea zabaldu du.

Portuzarra herritarren aisialdirako eta elkarbizitzarako “gune atseginago” bihurtzeko helburua du udalak eta, horretarako, portua urteko sasoi batzuetan ibilgailuentzat ixtea erabaki dute; hala, asteburuetan, jaiegunetan, Aste Santuan, uda garaian —ekainaren erdialdetik irailaren erdialdera— eta Gabonetan —abenduaren 23tik urtarrilaren 6ra— ibilgailuak ezingo dira Portuzarretik mugitu, 13:00etatik 18:00etara arteko ordutegian.

Baimenak eskatzeko epea ekainaren 15a bitartekoa izango da, eta udaletik jakinarazi dutenez, eskaerak astebeteko epean ebatziko dira. Baimenek urtebeteko iraupena izango dute, eta automatikoki berritu ahal izango badira ere, udalak egiaztapenak egiteko aukera izango du. Gainera, bost urterik behin berritze-prozesua egitea aurreikusten dute. Ekainaren 15etik aurrera, sarbidearen kontrola bideo-zaintzaren bidez egingo dute, eta horretarako, “ezinbestekoa” izango da aurretik baimena izatea.

Baimen sistemak Portuzarraren erabilera antolatzen lagun dezakeela uste dute udaletik, jarduera ezberdinak “bateragarri” egingo dituelako eta espazioaren izaera zaintzen lagunduko duelako: “Helburua da ibilgailuen presentzia ahalik eta txikiena izatea, betiere beharrezko jarduerak bermatuz”.

Eskaera egiteko bi bide izango dituzte eskura erabiltzaileek: Berhaz bulegora bertaratzea edota Portura sartzeko baimen iraunkorrak prozedura jarraituz, Bermeoko Udalaren egoitza elektronikoaren bidez egitea. Beharrezko urrats eta dokumentazio guztia prozeduran zehaztuta dago. Edonola ere, eskabidea egiteko dagokion inprimakia (IN-444) bete beharko dela jakinarazi dute.

Horrez gain, kasu guztietan gehienez bi ibilgailuren matrikulak aurkeztu ahalko ditu erabiltzaile bakoitzak, matrikula eta ibilgailuaren modeloa adierazita. Halere, baimenak kolektibo ezberdinei zuzenduta daudenez, aurkeztu beharreko dokumentazioa ez da beti berdina izango; portutik sarbidea duten etxebizitzetan erroldatutako herritarren kasuan, esaterako, eskaera egiten dutenak etxebizitzan erroldatuak izan beharko dira. Amarratzaileen kasuan, ostera, titulartasuna erakusten duen dokumentua aurkeztu beharko da —EKPren faktura edo amarratzeen titulartasuna egiaztatzen duen Eusko Jaurlaritzaren agiria). Portuko jardueretan parte hartzen duten pertsona, ostalari edota merkatariak udalaren Jarduera Ekonomikoaren erroldan izena emanda egon beharko dira baimena jaso nahi badute; elkarteen kasuan, Jaurlaritzaren elkarteen erregistroan erregistratuta egon beharko dira. Azkenik, portuko lonjen erabiltzaileek horien titulartasuna egiaztatzen duen agiria aurkeztu beharko dute.

Udalak, “beharrizanei ahalik eta erantzun egokiena emateko asmoz”, aurrez zehaztuta ez dauden egoerak ere aztertuko dituela iragarri du, “malgutasunez” jokatzeko konpromisoa hartzearekin batera. Gainera, ekainaren 15etik aurrera inor beharrezko sarbiderik gabe gelditu ez dadin behin-behineko sarbide sistema osagarria ontzen ari dira, “une puntualetan sortzen diren beharrei erantzun arina emateko”.

Triki kantu eguna ospatuko dute zapatuan Bermeon

Busturialdeko Hitza — 2026-04-16 14:55:41

Arrekatxutxa eta Kanta Kanta Lorue taldeek Triki-Kantu eguna antolatu dute zapaturako [apirilak 18], eta Urdaibai Kantagunea, Busturiko Kantari eta Arrasateko Trikitixa Eskola Taldea izango dira gonbidatuak.

Kantuz eta musikaz blai egiteko prest daude musikazale eta kantuzaleak, eta guztira 250 lagun inguru batuko direla zehaztu dute: “2026ko Bermeoko VI. Kanta Egunari Triki-Kantu Eguna izena eman diogu. Oraingoan, Arrekatxuta trikitixa taldeak eta Kanta Kanta Lorua taldeak kantu jira bat egingo dugu beste talde gonbidatu pare bategaz, Bermeo berriro ere, kantuz eta musikaz blai egiteko”.

12:00etan ekingo diote Bermeoko kaleak zeharkatzeari, eta 15:00rak bitartean kalejiran ibiliko dira. 14:30ean Lamera inguruan ariko dira, eta Kasinoaren parean egingo dute azkenengo geldialdia. “Dantza eta kanta zaparradaz” emango diote amaiera kantujirari eguerdian, eta ostean, San Migeleko eskaileretan argazki erraldoia aterako dute, topaketak borobiltzeko helburuagaz.