Busturialdeko Hitza

Esnatu dinamika aurkezten ari dira herriz herri, "eragileak ahalduntzeko eta kontzientziatzeko"

Busturialdeko Hitza — 2026-05-25 14:31:13

Apirilaren 14an aurkeztu zuen Esnatu ekimena Udalerri Euskaldunen Mankomunitateak, arlo askotariko hamazortzi eragilerekin batera, Orion, eta orain, herriz herri, euskararen egoera erakusten duten datuetan eta bilakaeran oinarrituta, hitzaldiak antolatzen ari dira, beti ere eragileak “ahalduntzeko eta kontzientziatzeko” asmoarekin: “Herriz herri edo eskualdez eskualde euskararen egoera erakusten duten datuetan eta bilakaeran oinarrituta, hitzaldiak edo foroak antolatu dituzte UEMAk eta udalek”.

Eguen honetan (maiatzak 28) Muxikan elkartuko dira. Arritxu Zelaia UEMAko teknikariak emango du Esnatu. Gure hizkuntzak har dezan arnas hitzaldia, 18:00etatik aurrera, Ariatzako eskolan Euskararen egoera eta bilakaeragaz batera, Euskal Herriko zein Muxika, Ibarruri eta Gorozikako datuak aztertuko dituzte.

Ean, berriz, ekainaren 3an (eguaztena) daukate hitzordua. 18:30an Eskolondon bilduko dira Zelaiagaz. Eako Udalak, Euskara Batzordeak eta UEMAk elkarlanean deituta, hiru gai nagusi landuko dituzte; Euskal Herriko eta Natxitua, Bedarona eta Eako egoera soziolinguistikoaren diagnostikoa egin, UEMAren Lurralde Estrategia aurkeztu eta udalerri euskaldunei eusteko eragileek zer egin dezaketen aztertuko dute.

Zelaiaren berbetan, egoeraren gordintasuna azaldu nahi dute, eta horren aurrean herritarrak eta eragileak zein konpromiso hartzeko prest dauden ikusi. Izan ere, argi daukate tokikotik eta bakoitzak bere arduratik eragitea beharrezkoa dela: “Datuek esaten dutena da arnasguneak desagertzeko zorian egongo direla hamar urte barru. Datu orokor batzuk eta herriko datuak eta joerak zeintzuk diren ikusiko dugu hitzaldietan, baita horien aurrean zer egin genezakeen ere. Eragileei zuzendutako konpromiso dinamika daukagu. Nazio mailako eta erakunde publikoen konpromisoez gain, eragileen konpromiso dinamika abiatu da, uste dugulako besteekin nahikoa ez delako. Orain artekoa eginez, ez diogu eutsiko, eta jakin nahi dugu jendea zelako konpromisoak hartzeko prest dagoen, xumeetatik hasi eta handiagoetara”.

Bermeon, ostera, urriaren 24an, 11:30ean egingo dute saioa. Esnatu ala hil liburua aurkeztu du Garikoitz Goikoetxeak, eta Esnatu dinamikaren azalpena ere egingo dute.

Eremu euskaldunek bizirik iraun dezaten eragileek hartu ditzaketen konpromisoen inguruko hausnarketa sustatu nahi dute, eta, beraz, tokiko eragile eta elkarteei bat egiteko eskatu diete: “Gaur egun bezala jarraituz gero, eremu euskaldunenean ere euskarak atzerantz egingo duela diote ikerketek, eta horri erantzuteko eta egoera iraultzeko arduratik sortutako ekimena da Esnatu dinamika. Era guztietako eragileak ahalduntzea eta eremu euskaldunek bizirik iraun dezaten eragileen konpromisoak sustatzea da ekimenaren asmoa”.

2026ko otsailean aurkeztu zuen UEMAk Lurralde Estrategia proposamen politikoa, eta proposamen hori erakundeekin eta alderdiekin lantzen hasi da mankomunitatea, baina ohartarazi dute guztia ezin dela erakunde publikoen esku utzi: “Herriko eragileen esku ere badago arnasguneak bizirik mantentzea. Dena ezin dugu utzi Lurralde Estrategiaren esku, dena ezin dugu erakunde publikoen esku utzi. Herritarren eta eragile desberdinen ahalduntzea eta konpromisoa ezinbestekoak dira arnasguneak babesteko. Eragileon esku ere badago udalerri euskaldunek euskaldun izaten jarraitu ahal izatea, norberak nahi eta ahal duen neurrian”.

"Etxebizitza duina prezio eskuragarrian" lortzea ahalbidetuko duen ordenantza onartu dute

Busturialdeko Hitza — 2026-05-25 13:00:56

Busturiko Udalak udalerriko etxebizitza-beharrizanei erantzun eta etxebizitza “errazago” eskuratu ahal izatea ahalbidetu asmoz, beheko solairuetan etxebizitzak egokitzeko ordenantza berria onartu du. Ekimen “garrantzitsu” horri esker, etxebizitza eraikinetako beheko solairuetan eta hiri-lurzoruetan dauden lokalak etxebizitza bihurtu ahal izango dira, udal gobernu taldearen esanetan, etxebizitza eskuratzeko “aukerak handitzeko”.

Udal gobernu taldeak iaz hasi zuen ordenantza onartzeko prozesua, kontsulta publikoa egin eta busturiarren iritzia eta ekarpenak jasota. Aitor Aretxaga Busturiko alkateak herrian etxebizitza lortzeko “zailtasunak” daudenaren jakitun dira, batez ere, bizi-proiektua herrian garatu nahi duten gazteen arteen artean: “Ordenantza berri honetan lan egin dugu, gure bizilagunek etxebizitza eskuratu ahal izateko beste tresna bat baita. Neurri honekin lokal hutsen arazoari eta etxebizitza berrien beharrar erantzun nahi diegu, espazio horien erabilera egungo beharretara egokituz“.

Alkateak nabarmendu duenez, udal gobernu taldeak, udalerriaren “arduradun” diren aldetik, Busturiaren garapenerako eskura dituzten “legezko aukera guztiak” aztertu eta garatu behar dituzte, eta etxebizitzaren arazoari aurre egitea “funtsezko faktorea” da horretarako.

Araubide juridikoa.
Udaletik jakinarazi dutenez, ordenantzan jasotako irizpideak betetzen dituen lokaletako “edozein jabek” sustatu ahal izango du espazio hori etxebizitza bihurtzea. Izendapen berriagaz, etxebizitza udalaren araubide tasatuko babes publikoko etxebizitza izatera igaroko da, eta kalifikazio hori ezin izango da aldatu: “Etxebizitza berriak ohiko etxebizitza iraunkor gisa erabiliko dira beti, errentamendu-erregimenean edo jabetzan”, zehaztu dute.

Beheko solairuetan kokatutako lokaletako baten jabeak etxebizitza saldu edo alokatzea erabakiko balu, “esleipen-prozedura baten onuradun diren eta zenbait baldintza betetzen dituzten” pertsonek eskuratu ahal izango dituzte, hala nola, hiru urteko antzinakotasunagaz Busturian erroldatuta daudenak, etxebizitza bizigarririk jabetzan ez dutenak, babes publikoko etxebizitzak esleitzeko Eusko Jaurlaritzaren gehienezko eta gutxieneko diru sarreren araudia betetzen dutenak edota Eusko Jaurlaritzaren Etxebizitza Eskatzaileen Erregistroan alokairuko edo erosketako etxebizitzaren eskaitzaile gisa izena emanda daudenak.

Horrez gain, nahiz eta etxebizitza baten jabetza izan, 65 urtetik gorako pertsonek, mugikortasun murriztu iraunkorra dutenek edota mugikortasun murriztu iraunkorra duten seme-alabekin bizi diren pertsonek ere etxebizitzak eskuratu ahal izango dituzte, beti ere, jabetzan duten etxebizitzak irisgarritasun baldintza teknikoak betetzen ez baditu. Gainera, ordenantza berria indarrean sartu baino “gutxienez hiru urte lehenago” lokal baten jabeak diren pertsonek, edota etxebizitza heredatu dutenek, aurreko “baldintzak bete gabe” izango dute etxebizitzok erabiltzeko aukera.

Bizigarritasun bermeak.
Etxebizitza bihurtzen diren etxebizitza berriak “bizigarritasun-berme tekniko guztiak” beteko dituztela azpimarratu dute udaletik: argiztapena, aireztapena, isolamendu akustikoa, pribatutasuna, segurtasuna, ke-hustuketa, sanemendua, instalazio termikoak, aireztatze eta klimatizazio ekipoak eta euri-uren hustuketa. Horrez gain, eraikinaren estetika errespetatuko dela zehaztu dute.

Ordenantza berriarekin, “lurzoru berria okupatu beharrik barik” eta, aldi berean, gaur egun erabiltzen ez diren lokalen jabeei alternatiba bat eskainiz, etxebizitza erabilgarrien kopurua handitu nahi du udalak. Gainera, neurri berriak etxabeak dauden guneen “uri-irudia hobetzen” lagunduko du, eraikitako ondarea optimizatuz eta pertsonek “etxebizitza duina izateko duten eskubidea erraztuz”.

Baldintzak argituta, Aretxagak denbora luzez landu duten ordenantzaren xede nagusia gogoratu du: “Helburua da itxita dauden eta merkaritza-establezimendu gisa potentzialik ez duten lokalak etxebitzitza bihurtzea. Eskaintza handitu egingo da eta etxebizitza duina prezio eskuragarrian eskuratzeko aukera erraztuko du udalerrian bertan”.

Ondareak, musikak eta itsasoko zaporeek bete dute Bermeo

Busturialdeko Hitza — 2026-05-23 17:48:29

Bermeoko Lamera bete du 32. Arrain Azokak bigarren egunez. Azokaren irekierarekin batera, jaiari hasiera eman zien atzo [maiatzak 22], eta asteburuan murgilduta, milaka izan dira gaur [maiatzak 23] herria bete duten bermeotarrak eta toki guztietako bisitariak. Portuzaharrean, Lameran zein etxeetako balkoi eta zabaldutako leihoetan ikusi zitekeen jendea, eta mahonezko jantziek itsasoko kolorez bete dituzte bazterrak. Bermeoko armarridun zapiak lepoan jantzi ditu jendeak, azoka bizirik dagoela eta herriarentzat erakusleiho den asteburu bat iragarriz.

Mota, kolore eta zapore guztietako pintxo eta produktuak izan dira protagonista gaurkoan. Antxoa, atuna edo izokina izan dira jendearen gustokoenak, eta etenik gabeko salmentak izan dituzte txosnetan beharrean aritu direnek. Eguzkiak eguraldi ezinhobea ekarri du lehen orduetan, hala ere, goi-goian jarri denerako, gerizpea bilatzea zuten helburu askok eta askok. Jana eta edari hotzak izan dituzte esku artean bisitari guztiek; bakarka, bikoteka edo lagun-taldean zapore berriak dastatzen eta elkarbanatzen aritu da jendea goiz guztian zehar. Bazkaltzeko ordua ere bertan heldu zaie askori, eta Gune Solidarioak bertaratu diren ehundaka pertsona hartu ditu. Marmitakoa eta atun errea jateko aukera izan du jendeak, ordaindutako dirua sei eta hamabi urte bitarteko haurren tratamenduak ordaintzeko osasun-sistema publikora bideratuko dela jakinda. Euskal Herriko edozein jai girotan falta ez den talo postuak ere izugarrizko arrakasta izan du, eta etenik barik aritu dira oreari eragiten . Txosnen eskaintzari begira eta urtero bezala, kontserbak erostea hautatu dute askok. Arrain Azokan dastatutakoa bakarrik ez, bertan bizitakoa ere etxera eramateko modua izaten baita.

Zaporeetaz gain, tradizioa eta kultura izan dira gaur azokaren erdigune. Bermeoko sustraien eta nortasunaren irudi izaten da Arrain Azoka urtez urte, eta horregatik, izate hori musikaren bitartez plazaratu dute gaur herriko hainbat musikari eta eragilek. Musika Eskolako Kankinkabara, kantari txikiak eta Arrekatxutxa taldeen txanda izan da eguerdian, eta tradizioz betetako doinu alaiekin Portuzaharra girotzen aritu dira. Alde Zaharrean hasi eta Portuzaharrera egin du bidea KIETB erraldoi txikien taldeak, eta muiskarien erritmoa jarraituz eta portuan zeuden familia eta lagun taldeen begiradak eurengaantuz, erraldoien tradizioa Bermeon bizirik dagoenaren erakusgarri izan dira. Urrunetik danbor hotsak entzun dira orduan. Hurre-Hurre eta Adiskide txokoetako joleek Portuzaharra eta Lamera hartu dituzte, herritarrei danborren eta metalezko musika tresnen soinuak eskainiz.

Azoka aldarrigune bihurtu dute gaurkoan ere. Kontserberetako beharginek elkartzeko beharra izan dute beste behin, eta ozen entzun da Lameran bide bakarra baldintza hobeen aldeko etengabeko borroka dela. “Prekarietateari amaiera” emateko ordua dela adierazi dute, eta baita bizitzeko eta lan egiteko baldintzak hobetuko dizkien “hitzarmen duin” bat exijitu ere. Hala, ospakizuna nagusi bada ere, borrokak badu tokia bermeotarren Arrain Azokan.

Lameran batu dira kontserberetako langileak.

Gaurko egitaraua 20:00etan hasiko den Josu Zabalondo eta Luis Cuetoren ikuzkizunak itxiko du; betiko abesti ezagunen emanaldia egingo dute Frontoian.

Gautegiz Arteagako Udalak alegazioa aurkeztu dio Bizkaibus zerbitzua berritzeko aurreproiektuari

Busturialdeko Hitza — 2026-05-14 16:38:43

Gautegiz Arteagako Udalak alegazioa aurkezu dio Bizkaiko Foru Aldundiak proposatutako garraio publikoaren zerbitzuaren aurreproiektuari. Zehazki, Bizkaibuseko 3532-3 linean aldaketa bat egitea proposatu du, “udalerriko auzo guztiek hondartzetara joan-etorriak egiteko garraio publikoa eduki dezaten”.

Patrik Saitua Gautegiz Arteagako alkatearen hitzetan, mugikortasun iraunkorrarekin eta irisgarritasunarekin lotutako ekarpena egin du udalak, irtenbide “erraza” proposatuz: “Gure eskualdean eta, bereziki, eskuinaldean, garraio publikoa hobetzea gure gobernu-taldearen beharra, aldarrikapena eta lan-ildo estrategikoa da. Gautegiz Arteagako edozein bizilagunek Laida eta Lagako hondartzetara lineako autobusez joateko aukera eduki beharko luke. Garraio publiko erregular iraunkorreko eta erabilera orokorreko zerbitzuaren aurreproiektuari aurkeztutako alegazioa zuzenean lotuta dago mugikortasun iraunkorrarekin, irisgarritasunarekin eta udan baliabide garrantzitsu bat garraio publikoan eskuratzeko eskubideagaz. Gainera, irtenbide erraza proposatzen dugu”.

Udan, Ibarrangelu eta Gernika-Lumo lotzen dituen 3532-3 linean, Gautegiz Arteagako Muruetagane auzoko bizilagunek ez daukate garraio publikorako aukerarik hondartzetara joateko. Horregatik, Gautegiz Arteagak zerbitzu hori Muruetaganen hastea eskatu du, horrela, Muruetagane, Basetxetas eta Aldamiz auzoetako bizilagunek hondartzara garraio publikoan joateko aukera izango luketelako. Ibilbidea “optimizatzeko”, konexioak “hobetzeko” eta zerbitzua “eraginkorragoa izateko” modua dela uste dute udal ordezkariek, eta adierazi dutenez, neurri horrek Ereñoko bizilagunei ere “mesede egingo” lieke: “Udan, “Hondartzetako autobusa” izenaz ezagutzen den linea horrek hiru aldagai izango ditu: 3532 1 Lekeitio-Gernika hondartzetatik, 3532 2 Elantxobe-Gernika hondartzetatik eta 3532 3 Ibarrangelu-Gernika hondartzetatik. Jende asko biltzen den linea da, Laida eta Lagako hondartzetatik igarotzen delako”. Bi gune horiek aparkaleku “mugatuak” daukaztela gogoratu dute, eta, beraz, “zaila dela bertara iristea”.

Inurri txikien jaia, ederra bezain aberatsa

Busturialdeko Hitza — 2026-05-07 15:50:35

“Iñurrien antzera pauso txikiz aurrera, amestera”, dio ETS musikaren abesti ezagunak, eta txikitasunetik amestea zer den ondo baino hobeto dakite eskola txikiek. Iñurri lana egiten dute egunez egun, eta emaitza oparoak lortzeko gai direla erakusten dute. Gaur [maiatzak 7], inurri horien topaleku izan da Gautegiz Arteaga: XIX. Busturialdeko Eskola Txikien Jaia ospatu dute.

Gautegiz-Arteagako Montorre Eskolak antolatu du aurtengo hitzordua, eta Urretxindorra (Muxika), Uzelai (Busturia), Mundaka eta Haizeder (Ea-Elantxobe-Ibarrangelu) eskolako lagunekin giro ederrean elkartu ziren. Gutxi gora behera 500 ikasle inguru bat egin dute jaian, baina irakasle, guraso eta laguntzaileekin ia 800 lagun elkartu dira.

10:15ean Montorre Eskolakoen harreragaz hasi dute jaialdia, herriko plazan, eta jarraian, horiek bertsoak eta koplak abestu dituzte, eta elkarrekin talde argazkia atera dute. Ondoren, dantza entseguak egin, eta 11:30ean hasi dute dantza ikuskizuna.

Betiko moduan, adin tarteetan banatuta egin dute dantzan. 2-3 urte bitarteko umeek Kilimak abestiaren erritmora dantzatu dute, eta 4-5 urte bitartekoek Ene Kantak-en Ikasle berri bat abestiarenera. Gero, Lehen Hezkuntzakoak atera dira plazaren erdira. Lehenengo ziklokoek The Uski’s eskualdeko taldearen Horrelako aukeratu dute euren koreografia eskaintzeko, bigarren ziklokoek Goazenen Dantza dezagun hil arte eta hirugarren ziklokoek Duplaren Ongi etorri.

Gero, berriz, jolasetarako eta tailerretarako tartea hartu dute, txokotan banatuta; batzuk herriko plazan elkartu dira, eta beste batzuk, ostera, parkean.

13:15ean elkarrekin bazkaldu ostean, 15:30ean agurtzeko ordua heldu zaie. Amaierako ekitaldia bertsoekin eta biribilketan elkartuta girotu dute, eta Gautegiz Arteagakoek Muxikakoei pasatu diete lekukoa; izan ere, datorren urtean Urretxindorra Herri Eskolan elkartuko dira euren jai handia ospatzeko.

Herritarren zientziak eta komunitatearen parte-hartzeak hegazti migratzaileen kontserbazioan duten garrantzia azpimarratuko dute asteburuan

Busturialdeko Hitza — 2026-05-06 06:43:12

Hegazti bakoitzak balio du – Zure behaketek garrantzia dute! lelopean dator aurtengo Hegazti Migratzaileen Mundu Eguna, eta beste urte batez, Gautegiz Arteagako Urdaibai Bird Centerrek eta Busturiko Ekoetxea Urdaibaik egun horregaz bat eginez, eskaintza berezia prestatu dute domekarako (maiatzak 10).

Urdaibai Bird Centerren zentroko sarrera doakoa izango da 10:00etatik 18:00etara bitartean, eta hegaztien eraztunketa zientifikoaren erakustaldia egingo dute, 10:00etatik 12:00etara. Parte hartzeko, ez da aldez aurretik izena eman behar.

Aurten, hegaztiak ez ezik, haiek babesteko jende askok egiten duen “ahalegin handia” ere ospatu nahi dute, leloak herritarren zientziak eta komunitatearen parte-hartzeak hegazti migratzaileen kontserbazioan duten garrantzia azpimarratzen baitu.

Horregatik, Urdaibai Eraztuntze Taldeak hegaztien eraztunketa zientifikoaren arloan egiten duen “lan garrantzitsua” nabarmendu dute Urdaibai Bird Centerreko arduradunek. Eraztuntzaile adituek eta prestakuntzan dauden kideek osatutako talde horrek 2002an ekin zion lanari, eta hegaztien populazioei buruzko datu “baliotsuak” biltzen ditu etengabeko lanean: “Eraztunketa-saioan, bisitariek haien lan eskerga gertutik ezagutzeko aukera izango dute. Hegazti migratzaileek jasaten dituzten mehatxuei eta haien habitatak babesteko beharrari buruzko kontzientzia zabaltzeko gurekin bat egiteko eskatu nahi diegu bisitariei”. Era berean, hegazti migratzaileak babesteko mezua igorri dute, “hegazti bakoitzak balio duelako, eta behaketa bakoitzak berebiziko garrantzia duelako”.

Bestalde, Hegaztien behaketa paduran irteera prestatu dute Ekoetxea Urdaibain. Domekan, 10:30etik 13:30era bitartean ibiliko dira San Kristobal auzoko paduretan barrena. Parte hartu gura dutenek aurretiaz izena eman behar dute ekoetxea.eus webgunean, eta 2 euro ordaindu behar dira. Arduradunen berbetan, ekosistema horren aberastasuna eta bertan bizi diren hegaztiak ezagutzeko “aukera paregabea” izango da; izan ere, ibilbidean zehar, parte-hartzaileek bertatik bertara ezagutuko dute migrazio-ibilbideek eta naturgune horien kontserbazioak daukaten garrantzia: “Esperientzia irisgarria eta hezitzailea da, naturarekin bete-betean bat eginik. Publiko guztientzat pentsatutako esperientzia da, eta naturarekin ikastera, behatzera eta konektatzera gonbidatzen du, edertasun handiko leku batean”.

Langile espezializatuek azalpen “irisgarriak eta aberasgarriak” emango dituzte, eta ingurune naturalarekiko errespetuzko begirada “kontzientea” sustatuko dute. Parte hartzen dutenek ingurune natural pribilegiatu horretan barneratuta, paduraren errealitatea, biodibertsitatea eta kontserbazioaren garrantzia gertutik ezagutuko dituzte: “Ibilbidean zehar, pasabide, atsedenleku edo habia egiteko gune hori erabiltzen duten hainbat hegazti espezie ikusiko ditugu, migrazio-ibilbideek oreka ekologikoan daukaten funtsezko zeregina ulertuz”.

"Olinpiar jokoak bozgorailu izan dira guretzat"

Busturialdeko Hitza — 2026-04-28 16:56:10

Gautegiz Artegan goxo hartu dute Oriol Cardona Coll kataluniarra. Udalak emandako txapela buruan, eta Olinpiar Jokoetan lortutako urrezko eta brontzezko dominak eskuetan, irribarretsu eta pozik agertu da.

Zure ibilbide profesionalean zer suposatu du Olinpiar Jokoetan lortutako balentriak?
Oraindik hori ikusten ari naiz. Italiatik bueltatu nintzenean, aldaketa nabarmena igarri nuen. Ikusi nuen jendeak asko bizi izan zuela, eta ez nuen imajinatzen halako oihartzunik. Hainbeste jendek lasterketak ikusi zituela, mendiko eskia ezagutzen zuela eta gu ezagutzen gintuela ikustea ezustekoa izan zen. Nire bizitzan nola eragin duen, bizi dudan aldaketa, orain ari naiz ikusten. Eta espero dut mendiko eskiak hurrengo hilabete eta urteetan bilakaera positiboa edukitzea, jende gehiagok praktikatzea eta kirol honekiko interes gehiago egotea.

Uste duzu zure lorpenek zuen kirol modalitatea ezagutarazteko balio izan duela?
Horrela izan da. Olinpiar Jokoak bozgorailu bat izan dira guretzat, ezagutzera emateko bozgorailu. Behintzat orain jende askok ezagutzen du kirol polit hau. Eta espero dut jende gehiago probatzera animatzea. Jendeak ezagutzeaz gain, jendeak praktikatzea ere bada helburua.

Olinpiar txapeldun izateak ate gehiago edota berriak zabaldu al dizkizu?
Bai, horrela da. Noski, mediatikoki aldaketa izan da noski, eta orain horren ondorioak ikusten ari naiz. Gero eta interes gehiago dago; urrea lortu ostean, Espainiara heldu nintzenean interes handia egon zen, eta egoten segitzen du. Hori oso polita da, eta oso ondo dago.

Bi hilabete pasatu diren honetan, zelan gogoratzen duzu Olinpiar Jokoetako esperientzia? Eta urrezko domina lortu zenuen unea?
Esperientzia oso polita izan zen. Gauza berria zen denontzat, eta gauza handiaren sentsazioa neukan. Lasterketetan hainbeste jende animatzen egotera ez geunden ohituta, eta eskertzen da. Lehenengo aldian apur bat zirrara sortzen du. Bertan egon ginen astea oso polita izan zen. Azken batean, lau urterik behin gertatzen den ekitaldia da, eta lau urte barrura arte ezin izango dugu berriro bizi. Horregatik, asko aprobetxatu genuen eta benetan bizi izan genuen. Urrea lortu nuen finala hiruzpalau aldiz ikusi dut. Helmuga zeharkatu nuen momentua oso polita izan zen niretzat. Urte asko neramatzan helburu honen atzetik, eta lortu ahal izateak poztasun handia eman zidan. Poztasun handiko momentua izan zen.

Ezustekoa eman zenuen. Zein momentutan konturatu zinen urrea zeurea zela?
Helmugara heldu orduko metro eskas batzuetara, hiruzpalau segundo arinago, atzera begiratu nuen, eta ikusi nuen bigarrenaren eta nire artean alde asko zegoela, eta urrea bermatzen nuela. Orduan hasi nintzen gozatzen. Mila gauza gerta daitezkeen lasterketa da, eta helmugara heldu arte ezin da ezer ziurtzat jo. Helmugaratzea gozatu nuen; beteta sentitu nintzen. Hainbeste urtetako lanaren ordainsaria izan da. Momentu horretan urteetako lanak fruituak eman zituela sentitu nuen. Poztasun hutsaren sentsazioa izan zen; helmugara heldu, eta Italiara joan ziren familia eta lagunak ikusteak, hainbeste jenderen emozioa ikusteak neu ere emozioz betetzea eragin zuen.

Zein da zure hurrengo helburua edo erronka?
Ez dakit, baina bizitakoa bizita, lau urte barru Olinpiar Jokoetara itzultzea gustatuko litzaidake. Asko geratzen da, baina gustatuko litzaidake, eta horretarako borrokatuko dut.

Zelan hartu zaitu Gautegiz Arteagako herriak? Espero zenuen udalaren harrera instituzionala?
Ez nuen espero, baina Patrik Saitua alkateak hasieratik esan zidan hemen zerbait egin nahi zidatela. Harrerarengatik poz-pozik nago, eta hemen egotea luxua da. Denbora gutxi daramat hemen, baina oso ondo hartu naute. Udan egoten naiz hemen, baina jendeak oso ondo hartu nau.

Zer da Gautegiz Arteagatik eta eskualdetik gehien gustatzen zaizuna?
Entrenatzeko leku oso ona da, klima oso ona daukazue, eta lurraldean dauden bizikletan ibiltzeko ibilbideak ikaragarriak dira. Gainera, gimnasioa ere badagoenez, oso ondo datorkit. Hemengo bizi kalitatea oso ona da, oso ondo jaten da, tenperatura eta klima atsegina… eta jendea ere primerakoa da.

Aurtengo nekazaritza, abeltzaintza eta artisautza azokaren oinarri arautzaileak argitaratu ditu Gautegiz Arteagako Udalak

Busturialdeko Hitza — 2026-04-22 08:36:02

Ekainaren 13an egingo dute Gautegiz Arteagako Nekazaritza, Abeltzaintza eta Artisautza Azoka, eta bertan posturen bat ipini gura dutenek maiatzaren erdialdera arte aurkeztu ditzakete eskariak. Zehatz esateko, maiatzaren 15ean 14:00etan amaituko da eskaerak aurkezteko epea: “Eskabideak aipatutako epeetatik kanpo aurkeztuz gero, ezetsi egingo dira, beste izapiderik egin gabe, beti ere plaza hutsik ez badago”.

Udaletxean aurkeztu daitezke eskariak, astelehenetik barikura bitartean, 08:00etatik 14:00etara bitarteko ordutegian. Eskabidea horretarako prestatutako eskabide-ereduan formalizatuko da. Eredu hori udaletxean jaso daiteke, baita udalaren webgunetik deskargatu ere. Izena emateko fitxarekin batera, ‘Azokan parte hartzeko baldintzak’ puntuan zehaztutako dokumentazioa aurkeztu beharko dela jakinarazi dute: “Aurkeztutako eskabidea edo erantsitako dokumentazioa osatu gabe badago edo zuzentzeko moduko beste akatsen bat badauka, hamar egun balioduneko epea emango da akatsa zuzentzeko, errekerimendua jakinarazi eta hurrengo egunetik zenbatzen hasita. Hala egin ezean, eskatzaileak eskaeran atzera egin duela ulertuko da”.

Elikagaiak erakusteko eta saltzeko postuak gehienez 20 postu izango dira, eta produktuen barietatea bermatzeko, mota bakoitzeko postu kopurua zehaztu dute. Hala ere, produktu-motaren araberako baldintzak betetzen dituzten eskatzaileen kopurua aurreikusitakoa baino txikiagoa bada, beste atal batzuetan emandako lanpostu-kopurua handitzeko eskubidea edukiko du udalak.

Salmenta-postuak banatzeko, udalerrian, eskualdean eta Bizkaiko Lurralde Historikoan egoitza duten hornitzaileek lehentasuna edukiko dute: “Beren kategorian esleitutako plaza guztiak betetzen ez badira, ondoz ondo hartuko dira kontuan Euskal Autonomia Erkidegoko gainerako lurraldeetatik datozen eskabideak, Nafarroatik eta Iparraldetik datozenak, eta, azken buruan, Estatuko gainerako lurraldeetatik datozenak”. Horrez gain, oinarri araultzaileetan zehazten denaren arabera, Kalitate Bereiziaren Ziurtagiria zein Jatorri Deitura edukitzea (Jatorri Deitura Babestua (JDB), Adierazpen Geografiko Babestua (AGB), Espezialitate Tradizional Bermatuak (ETB) edota Eusko Label berme-marka) eta ekoizpen ekologikoaren ziurtagiria izatea (Nekazaritza Ekologikoaren Kontseilua) ere kontuan hartuko dute. “Era berean, titulartasuna emakumezkoa duten ustiategiak izateari ere balioa emango zaio, bai eta kudeatzailea emakume duen elkarteenak izateari ere. Ekoizle edota ustiategi gaztea eta berria izatea ere baloratuko da”.

Oinarri arautzaileak zein eskaerak egiteko inprimakia udalaren webgunean eskuratu daitezke.

"Eguraldi onak, plan onak eta giro onak" bat egin duten mendi irteeran batu dira

Busturialdeko Hitza — 2026-03-24 11:30:10

Mendizale eta ez horren mendizaleentzako irteera antolatu zuten Artiako Gazte Asanbladako kideek domekarako (martxoak 22), izan ere, Burretxaganera joateko irteera antolatu zuten.

Herritarrek bikain erantzun zuten, 20 lagun inguru izan baitziren Arteagako tontor altuenera joatera animatu zirenak, eguraldia lagun zutela.

Hala, 09:00etan aterata, 14 kilometro inguruko bidea egin zuten mendizaleek. Ondorioz, “eguraldi onak, giro onak eta plan onak” bat egin zutela aitortu dute antolatzaileek, baita hurrengorako prest daudela ere.

Espazio autogestionatu bat eskatu diote Gautegiz Arteagako gazteek udalari

Busturialdeko Hitza — 2026-03-24 10:30:59

Duela hiru urte sortu zuten Gautegiz Arteagan Artiako Gazte Asanblada, “gazteek herrian zuten bizigarritasun falta” dela eta. Ordutik, gazteentzako dinamika “aktiboa” sortu dute, baina etorkizunari begiratzerakoan, “gabezia eta arazo larriak” igartzen dituztela gehitu dute, elkartzeko eta antolatzeko espazio faltari eta etxebizitza duin eta ordaingarriak lortzeko zailtasunari erreferentzia eginda. “Ezintasun horiek muga handiak dakarzkigute etorkizuneko bizitza eta herri proiektu sendo bat eraikitzeko, eta Arteagako gazteok arduratuta gaude”, jakinarazi dute, ohar bidez.

Elkartzeko eta antolatzeko espazio propio baten faltak hainbat arazo dakartzala diote: batetik, herriko gazteen belaunaldien arteko hartu-eman falta egotea, “herriko izaera eta balioen transmisioa eragozten duena”; eta, bestetik, herrian egiten diren gazteentzako ekintzak “eskasak” izatea. Gainera, esan dute egoera horri aurre egiteko eta beraien intereskoak diren ekintzak antolatzeko “ageriko zailtasunak” dituztela: “Aipatu behar dugu, esaterako, sortu ginenetik gu batzeko, antolatzeko eta materialak gordetzeko lekuak herriko tabernak, parkeak, plazak eta gure gurasoen etxeak izan direla”.

Hala ere, gzte asanbladakoek diote eurena herrian “espaziorik ez daukan” adin kolektibo “zaurgarri bakarra” den arren, eurak “aktiboki batzeko eta herriari bizitza emateko” ekintzak antolatzen ahalegintzen segitzen dutela. Hori dela eta, gaztetxe formako espazio autogestionatu bat beharra plazaratu diote udalari: “Gazteok autogestionaturiko espazio baten eskaera kontutan hartzea eskatzen diogu udalari”.

Bestalde, herriko gazteek herrian emantzipatzeko duten aukera errealen faltak beraien bizitza proiektua Gautegiz Arteagatik kanpo egitera bideratutzen dituela ikusarazi gura izan dute. Arazo hori udalerritik haragoko “egiturazko arazo bat” dela badakite, baina Arteagako kasua “larria” dela nabarmendu dute, eta gogoratu dute etxebizitza duin bat eskuratzea legeak aitortzen duen eskubide bat dela; ondorioz, uste dute administrazioak —eta, kasu honetan, udalak—, herritar guztientzako etxebizitza sarbidea bultzatu beharko lukeela. Hala ere, salatu dute Gautegiz Arteagako Udalak hirigintza planteamendua “dentsitate txikiko etxebizitza libreak —prezio mugarik gabeko txaletak—” egitera bideratuta dagoela. “Ondorizoz, lurzoruen okupazioak ez du etxebizitzen eskaintza asko handitzea ekarri, eta prezioak oso altu mantendu dira”, adierazi dute. Eta, esan dute, gaur egun salgai edo alokairuan dauden etxebizitzen eskaintza “ia hutsala edo oso garestia” dela: “Gainera, planteamendu urbanistikoetan, dentsitate ertainera bideratutako eremu urriak etxebizitza libreak egitera bideratuta daude, babes ofizialeko etxebizitzak egin beharrean. Zenbat hamarkada dira azkenengoak egin zirenetik?”.

Beraz, jakinarazi dute gazte prekarizatuenen etxebizitzarako sarbidea “oso zaila” dela. Eta, gaur egun emantzioatzeko adinean daudena arteagarren kopurua herrian turismora bideratutako ohe kopuruagaz alderatu dute. “18 eta 35 urte bitarteko 166 gazte geunden herrian iaz, eta eta turismora bideratutako 200 bat ohe. Turista eta dirudunentzako herri hila gura dugu? Edo herri bizi, gazte eta saretua?”, galdetu dute.

Eta, ondorioa argi dute beraiek: “Gazte gaztetatik gure nortasuna egituratu duen herritik joatera bultzatzen gaitu Arteagako dinamika politikoak. Izan ere, aisialdi eskaintza eskasak inguruko herrietan (batez ere Gernikan) aukerak topatzera eroaten gaitu, eta apurka-apurka herriarekiko lotura galtzen dugu”.

Guzti hori kontutan ez hartzeak eta arazoak ez konpontzeak “galera itzela” ekarriko luketela uste dute Artie Gazte Asanbladako kideek: “Gazteen kultur ekarpena galtzea, herri bizitzaren eta biztanleriaren zahartzearen kontra. Horri lotuta daude herritar berrien jaiotza kopuruaren beherakada eta eskolaren etorkizuna”.

Beraz, eskutik doazen bi arazo horientzako konponbide erreal bat eskatzea dute, “hainbat eta arinen” etorri beharrekoa. Hala, Arteagako ordezkari politikoei 18 eta 35 urte arteko herritarren beharrizanak identifikatzea aztertzea eskatu diete, baita gaztetxe formako espazio autogestionatu bat beharra aztertzea ere. Gainera, herritar guztiak etxebizitzaren egungo egorari buruz informatzea eta gazteei herrian bertan emantzipatzeko aukera errealak eskaintzea exijitu dute.

Gautegiz Arteagako Udalak EH Bilduren "koherentzia falta" salatu du

Busturialdeko Hitza — 2026-02-26 14:32:58

Aste honetan jakinarazi du Gautegiz Arteagako EH Bilduk tramitazio fasean dagoen Hiri Antolamenduko Plan Orokorra (HAPO) berrikusteko eskaera egin diola Bizkaiko Foru Aldundiari. Planteamendu horri egindako kritika aintzat hartuz, Gautegiz Arteagako Udalak EH Bilduren “koherentzia falta” salatu du, 2022ko maiatzean egindako osoko bilkuran HAPOen proposamen hori aho batez onartu zela argudiatuz.

Izan ere, “EH Bilduk ere horren aldeko botoa” eman zuela nabarmendu dute, eta gainera, esan dute proiektua herritarrei aurkeztu zietela, partaidetza-prozesuak egitetik harago. Euren berbetan, “hogei ekintza baino gehiago” egin ditu udalak horren baitan, zeintzutan herritarrek banakako zein taldekako parte hartzea “nabaria” izan den.

“Gautegiz Arteagako Udalak Hiri Antolamenduko Plan Orokorraren (HAPO) hasierako onarpena egin zuen, honako irizpide hauen arabera: garapen iraunkorra, interes publikoaren mende egotea, urigintza-planteamenduaren eskumena, urigintza-antolamenduaren koherentzia eta herritarren parte-hartzea. Hasierako onarpena aho batez egin zan 2022an, maiatzaren 13ko osoko bilkuran zeuden zinegotzi guztien aldeko botoekaz, EH Bilduko ordezkariek barne. Beraz, ez dogu ulertzen EHBilduren koherentzia falta, HAPO barriaren alde bozkatu ondoren, orain kritikau egiten dau eta”, gaineratu du Patrik Saitua alkateak.

Aurreikuspenak.

Gauzak horrela, azaldu dute izapidetzen ari den HAPO berriak bizitegi-hazkunde moderatua eta ingurunera egokitutako hainbat tipologitako etxebizitza-eredua aurreikusten dituela: “Herriko erdiguneko iparraldean 30 etxebizitza inguru eraikitzea aurreikusten da. Horreez gain, errepide nagusiaren ekialdean eta mendebaldean egin daitezkeen beste 80 be badaude. Gainera, bi bizitegi-eraikin kolektibo eraikitzeko aukera planteatzen da: bata, 22 etxebizitzarako eukieragaz, eta bestea, alkarri-itsatsitako 15 etxebizitzaz osotua. Eremu horretan lankidetza publiko-pribaturako aukera aurreikusten da, udalerriko gazteei etxebizitza prezio merkeetan eskaintzeko”.

Horren aurrean, Saituak argi esan du plan berri horrek aurreikusten duela “herriko gazteentzat etxebizitza eskuragarriak” sortzea, udalerria bizilagunen behar berrietara egokitzea eta dinamika demografiko negatiboa etetea”.

Aurreikuspenez gain, planteamendu berriak “erdigunea sendotzeko eta hobetzeko apostu irmoa” ere egiten duela azpimarratu dute udal ordezkariek; etxebizitzak berritze eta zaharberritzeari lehentasuna ematen diola esan, eta udalerriaren “ondare arkitektonikoa” balioan jartzen duela gogoratu dute.

Zifrak albo baten utziz, HAPOen plangintza berriak funtsezko helburu bat duela esan dute: udalerri orekatu eta koherente bat eratzea, non ingurune naturala eta uri-espazioa modu harmonikoan biziko diren. Ondarea ere indartzen duela arrazoituz, horrenganako babesa eta etorkizuneko belaunaldientzako interes kulturalaren bermatzea lehen lerroan jarri dute Gautegiz Arteagako Udaletik.

Gautegiz Arteagako EH Bilduk BFAri HAPOen plangintza berrikusteko eskatu dio

Busturialdeko Hitza — 2026-02-24 14:17:01

Gautegiz Arteagako EH Bilduk salatu du etxebizitzaren arazoa gero eta kezkagarriagoa dela gazteen artean, eta udalerriko etorkizuna baldintzatzen ari dela ohartarazi du. Datu ofizialak eta tokiko egoeraren bilakaera mahai gainean jarrita, Hiri Antolamendurako Plan Orokorra (HAPO) aren egungo proposamenak ez diela herritarren benetako beharrei erantzuten adierazi dute, eta Bizkaiko Foru Aldundiari plangintza berrikusteko eskatu diote, herriko gazteei etxebizitza eskuragarria bermatuko dien ikuspegi bat lehenetsiz.

Hala nola, Gautegiz Arteagako EH Bilduk aurreratu du etxebizitzaren gaia “arazo kezkagarri” bihurtzen ari dela, batez ere gazteen artean: “Etxebizitza egoki eta duina izateko aukera Giza Eskubideen Deklarazio Unibertsalaren 25. artikuluko lehen atalean dago jasota. Zoritxarrez, Euskal Herrian egoera horretatik oso urrun gaude. Estatistika ofizialei erreparatzen badiegu, Euskal AEko 113.629 pertsona ezin dira independizatu baliabide ekonomiko faltagatik. Pertsona kopuru hori %13 igo da azken lau urteetan. Gazteen Euskal Behatokiaren arabera, Euskal Autonomia Erkidegoan 30 urte arteko gazteen % 61ek jatorrizko familiaren etxebizitza utzi nahi du, baina ezin du”.

Datu horiez gain, 3 ardatz bereizi dituzte oinarritzat: Gernika Gogoratuzeko Ramon Zalloren ikerketa, Busturialdea-Urdaibaiko plan estrategikoa eta 2030eko Landa Garapeneko Estrategiak. Zalloren ikerketaren arabera, “adin piramidea hobetzeko, eskualdeko gazte kopuruari eutsi behar zaio, bizi baldintzak hobetu, lan aukera berriak sortu eta alokairuko etxebizitzak eskaini”. Busturialdea-Urdaibaiko 2024ko plan estrategikoak, beregain, etxebizitza, erronka estrategikoen artean lehenengo puntuan hartzen da. Eta azkenik, 2030eko Landa Garapeneko estrategiak hurrengoa mahaigaineratzen du: “Etxebizitza egokiak eta eskuragarriak izatea funtsezkoa da landa eremuetara biztanleria atxiki eta erakartzeko. Landa-eremuetan etxebizitza egokia izateko aukera sustatzea, beraz, estrategia giltzarria da landa-eremuen garapen jasangarrirako eta komunitateak sendotzeko“.

Hori guztia kontuan izanik, kezka orokorraren ikuspegitik Gautegiz Arteagako egoerari erreparatu diote, eta esan dute udalerriak 896 biztanle dituela, eta azken sei urteetan hazkundea izan duela; 49 biztanle gehiago daude. “1896an herriak 802 biztanle zituen; 2024ean 878 ginen; eta 2025ean 896 biztanle ginen. Biztanleriaren batez besteko adina, bestalde, 48 urtekoa da. 300 pertsona inguru dira 65 urtetik gorakoak, eta 309, aldiz, 0 eta 40 urte bitartekoak. Horiek guztiak herriko eskolatik pasatu dira, eta sustraiak eta kide izatearen harrotasuna adierazten dute”, azaldu dute.

Beraz, EH Bildutik argi esan dute HAPOa hamar edo hamabost urteko ikuspegiarekin eginez, udalerriaren etorkizuna jende gazte horrengan pentsatuko duen plngintza batetik pasatzen dela ikusten dela, “horiei etxebizitza eskuragarria eskainiz, eta ez lorategi-hiri eredu bat, non etxebizitzaren kostua 600.000 euro ingurukoa den, HAPOaren hasierako onarpenean dioen bezala”.

Izan ere, tramitatzen ari den eta behin-behinean onartzen ari den HAPOak Bizkaiko Foru Aldundiaren azken txostenaren faltan, honakoak jasotzen dituztela gaineratu dute: Dentsitate ertaineko behe solairuko 73 etxebizitza, 22 etxebizitza kolektibo eta atxikitako 15 etxebizitza. Esan dutenez, gainera, hori guztia “esku pribatuetan eta inolako lurzoru publikorik lortu gabe” izango litzateke.

Beharrak, erantzun gabe.

Gauzak horrela, nabarmendu dute HAPOen proposamen horiek ez diela erantzuten udalerriaren beharrei. Eta auzotarrek gelditzeko, herria egiteko eta bizitza sozial eta kulturala dinamizatzeko duten eskubidea aldarrikatu dute, bide batez: “Gure herrian gera gaitezen, jaiotzen eta hazten ikusi gintuenean, eta baztertuak izatearen beldurrik gabeko bizi-proiektu bat garatu nahi dugunean”.

Horregatik, Gautegiz Arteagako EH Bilduk 2011an egin zen Hirigune proiektuaren arauketaren helburuak kontuan hartzeko eskaria luzatu dio Bizkaiko Foru Aldundiari, euren berbetan, horrek hobeto islatzen dituelako herritarren beharrak. Ze, gogoratu dute herriak ez duela erabakitzeko eskubiderik, 5.000 biztanletik beherako herrietan HAPOekiko azkenengo hitza azpiegiturako eta lurralde garapeneko sailak baitauka.

“Gaur egun, aipatutako HAPOak dagoeneko gainditu du Eusko Jaurlaritzaren irizpidearen onarpena; izan ere, etxebizitza babestuak egiteko lurzorua deskalifikatu dute, eta azaroan, berriz, babes-etxebizitzak egiteko lurzorua eskatu ziguten”, azpimarratu dute.

Arrazoi horiengatik guztiengatik, EH Bildurentzat garrantzitsuena herriko gazteei aukerak ematea den heinean, Foru Aldundiko Hirigintza sailari eskatu diote jarduketa berriro aztertu dezatela: “HAPO hau martxan jarri zen 2019. urtetik gauza asko aldatu dira, eta horiek kontuan hartu behar dira. Ezin dugu aberastasun sozial eta gizatiar hau herri egin gabe utzi”.

Gautegiz Arteagak 1.333.988 euroko aurrekontua onartu du, iazkoa baino %8,7 handiagoa

Busturialdeko Hitza — 2026-02-19 12:05:01

Gautegiz Arteagak 2026ko udal aurrekontua “behin betiko” onartu duela jakinarazi du. Izan ere, urtarrilaren 27an egin zuten azken osoko bilkura, eta horretan onartu zuten 1.333.988 euroko aurrekontua; iazko aurrekontuekiko %8,7ko igoera izan du. Gainera, nabarmendu dute udal-eraikinetako garbiketa-zerbitzuaren lizitazio-baldintzen agiri berria ere onartu zutela osoko bilkura horretan.

Hasiera batean aurrekontua abenduaren 16an onartu zen arren, behin betiko onarpena bozkatu aurretik erreklamazio bat ez onartzea ebatzi zuela eman dute udal ordezkariek aditzera: “Erreklamazioa aurkeztu zuen pertsona ez zen interesduna, eta beraz, erreklamazioa aurkezteko legitimitaterik ere ez zuen. Izapide horren ondoren onartu genuen behin betiko aurrekontua, eta era berean, Bizkaiko Aldizkari Ofizialean argitaratzeko agindua ere eman dugu”.

Aurrekontuen baitan, garatzen ari diren hiruzpalau proiektu nabarmendu ditu Gautegiz Arteagako Udalak. Horien artean daude Mendialdua eta Muniategiko espaloiak: “Herritik ateratzeko eta Laida eta Laga hondartzetarantz joateko iparraldeko errotondearen biondaren atzean espaloiak eraikitzea aurreikusi dugu”. Horretarako, gainera, aurreratu dute dirulaguntza bat izapidetu dutela Bizkaiko Foru Aldundiko Azpiegitura eta Lurralde Garapen Sailean. “Bide segurtasuna” ardatz izan du udalak proiektu honekin, eta esan dute kokapen onena zein izan litekeen baloratzeko, azterketa bat eskatu diotela kanpoko ingeniaritza-enpresa bati.

Bestalde, amaitzear dauden Andrabide harrobiaren ingurumen-egokitze lanak aipatu dituzte, eta gogoratu dute obrak amaitu ondoren, “ideia-lehiaketa baterako deia” egingo dela, “ondare-balio natural eta historiko hori dinamizatzeko modurik onena bilatzeko”. Horrekin batera, udalerriko trafikoa berrantolatzea ere kontutan hartu dituzte. Biak ala biak “positiboki” baloratu ditu udalak, esan dutenez.

Landatartasun handiena duten udalerrietara 5 milioi euro inbertituko ditu BFAk

Busturialdeko Hitza — 2026-02-11 13:49:17

Bizkaiko Foru Aldundiak Bizkaia Denontzat estrategiaren barruan kokatzen den programa berri bat jarriko du abian lurraldean landatartasun-maila handiena duen udalerrientzat. Besteren artean, Morga, Ereño, Arratzu eta Gautegiz Arteaga izango dira programaren onurak jasoko dituztenak. Hala, aipatutako horietan eta gainontzeko udalerrietan, guztira 5 milioi euroko inbertsioa egingo dela jakinarazi du aldundiak. Jarduketak landa-bideak hobetu eta mantentzearen helburuari eusten dio, bizilekua edozein izanda ere, “lurralde-kohesioa indartzeko eta aukera-berdintasuna bermatzeko” asmoz.

Nabarmendu dute programa horrek “zuzenean erantzuten” diela ahaldun nagusiarekin egindako eskubide-topaketetan udalerriek azaldutako eskaerei: “Topaketa horietan agerian geratu zen berariazko sostegua behar dela landa-azpiegiturak mantentzeak dakarren kostu handiari aurre egiteko, batez ere udalerri txikienetan eta biztanleria-dentsitate apalena dutenetan”.

Estrategiak lurraldea era orekatuan garatzeari eta landa-eremuei arreta berezia eman nahi diela esan dute, eta horretarako, Landa Ingurunearen Garapenaren Legean jasotako landatartasun mapa eta biztanleria-dentsitatea kontutan hartuko ditu laguntza horiek arautzeko dekretuak. Hala nola, aurreratu dute “guztira Bizkaiko 83 udalerriri” ekarriko diela onura programa honek; gehienez 60.000 euroko laguntza ezarriko ditu udalerri bakoitzeko.

Irizpideak.

Dirulaguntzak “irizpide objetiboaren arabera” banatuko direla azpimarratu du Bizkaiko Foru Aldundiak, eta horretan “landatartasun-maila eta biztanleria-dentsitatea” kontuan hartuko direla gaineratu du. Alegia, hurrengo irizpideak eman dituzte aditzera: “Arreta Bereziko Egoeretan dauden udalerriek %75erainoko dirulaguntza jasoko dute. Entitate guztiak landa-izaerakoak dituzten udalerriek eta 150 biztanle/km² baino gutxiagoko dentsitatea dutenen, berriz, %65eko dirulaguntza. Dentsitatea 150-300 biztanle/km²-koa duten udalerriek, ostera, %55eko dirulaguntza jasoko dute; eta azkenik, dentsitatea 300-450 biztanle/km²-koa dutenek %50ekoa”.

Gauzak horrela, dekretu arautzailea aurtengo udaberrirako argitaratzea aurreikusten du aldundiak, eta esan dute 2027ko apirilera arteko epea ezarriko dela laguntza horiek justifikatzeko.

Hobekuntza funtzional eta jasangarriak ardatz izan ditu Gautegiz Arteagako Udalak frontoia dinamizatzeko

Busturialdeko Hitza — 2026-02-09 14:52:12

Gautegiz Arteagako Udalak udal frontoia dinamizatzearen aldeko apustua egin duela jakinarazi du, legegintzaldiko programa kudeatzeko ardatz estrategikoetako bat dela zehaztuz. Horregaz, herrian funtsezkoa den kirol-espazioa egokitzen aurrera egiten du, “erabilera dinamikoa, zeharkakoa eta herritarren beharrizanekin bat datorrena bermatzeko”.

Udal frontoian egin diren hobekuntzen artean aldagelen erabarritze integrala nabarmendu dute udal ordezkariek. Horrez gain, spinning eskola birtualak egiteko balio anitzeko espazio bat ere prestatu dute. “Jarduera hau osogarri ona da 2023an ireki zen gimnasiorako, udalerriko kirol eskaintza handitu eta indartzeko aukera emango dauelako”, gaineratu dute. Jarduketaren barruan, bestalde, aurretiaz zeuden instalazioak berritu ere egin dituzte, azaldu dutenez, “banaketa barrira egokitzeko”. Aireztapen-sistema barri bat ere ezarri da eremu guztietan, hala nola.

Esan dutenez, 2023an, legegintzaldiko planaren baitan, udal-azpiegitura hobetzeko asmoz, segurtasun-sare bat jarri zuten frontoian, “jokalariak eta ikusleak gehiago babesteko”. Gainera, horri esker instalazioak pilota partidu profesionalak hartu ditzake, eta zelan ez, herrian kirol eta gizarte topagune izateari eutsi.

Patrik Saitua udalerriko alkateak lanon helburua azpimarratu du: “Gure udal frontoia beti izan da herrian topagunea, edonori irekia eta funtzio anitzeko espazioa eskaintzen duena. Gobernu taldetik hori dinamizatzearen eta herriko benetako beharrizanekin bat datozen zerbitzuak ematearen aldeko apustua egin dugu. Egin ditugun hobekuntzekin, gure frontoiak, pelota jardueraz gain, pelota partida profesinonalak barne, beste kultur ekintza batzuk be hartzen ditu, hala nola bertso jaialdiak, festetako dantza tradizinonalak, eskalada bertikala eta beste kirol jarduera batzuk. Herriaren bizitzarako funtsezko ekipamendu batek eskaintzen dituen aukerak eta gaitasunak ahalik eta gehien aprobetxatzea da helburua”.

Eta, esan du 2025eko udal aurrekontuan jasotako inbertsioari ekiteko, udalak diru-laguntza bat kudeatu zuela Bizkaiko Foru Aldundian, eta horri esker eramango direla aurrera biziberritze lanak. Halaber, “iraunkortasuna eta ingurumenarekiko errespetua” aipatu ditu giltzarri gisa, eta gogoratu du udal frontoia dinamizatzeko lanez gain, 2025. urte hasieran plaka fotovoltaikoak ere jarri zirela frontoiko estalian: “Energia-eraginkortasuneko proiektu horretan 48.000 euro inbertitu ziren, 45.000 euroko dirulaguntzarekin. Horrek energia eta diru asko aurreztea ekarri digu”.

Auzo batzarrak.

Horrez gain, Gautegiz Arteagako Udalak otsailean zein martxoan auzo batzarrak egingo dituela eman du aditzera udalak. Hala, Saitua auzo bakoitzera joango da jasotako ekarpenen bilakaeraten berri emotera; barikuro udaletxean egiten diren batzarren inguruko informazioa ere emango dute batzarretan, bestalde. Otsailaren 21ean eta martxoaren 7, 14, 21 eta 28an izango direla esan dute: “Zapatu goizetan egingo dira, eta bilera bakoitzaren eguna hurbildu ahala jakinaraziko ditugu eguna eta tokia, udaleko komunikazio bideen bidez”.

Udalak espero dau “entzute aktiboko” prozesu horreek, auzobarratzak, komunikazino bide bikainak izaten jarraitzea, herritarrek dituzten beharrak zuzenean ezagutzeko.

Zabalik dago neguko bertso barnetegirako izen ematea

Busturialdeko Hitza — 2026-01-12 16:30:17

Beste urte batez, Gautegiz-Arteagako Baratze Baserri Eskola izango dute topaleku Bizkaiko bertsolari gazteek, bertan egingo baitute otsailaren 6tik [barikua] 8ra [domeka] bitartean neguko bertso barnetegia. Bizkaiko Bertsozale Elkarteak Derrigorrezko Bigarren Hezkuntzako eta Batxilergoko ikasleentzat pentsatutako egonaldiak, bertsoarekin gozatzeaz gain, bertso eskoletan aritzen diren gazteek elkar ezagutzea du helburu, “harreman sarea sendotzeko”. Horregatik, parte hartu nahi dutenek urtarrilaren 22ra bitartean [eguena] zabalik dute izena emateko aukera.

Horretarako, Bizkaiko Bertsozale Elkartearen web orrialdean eskuragarri dagoen izen emate orria bete beharko da eta, zehaztu dutenez, ordainketa egiaztagiria atxiki beharko da. Barnetegiaren prezioa 73 eurokoa izango da, baina familia ugariek %15eko beherapena izango dute: 63,50 euro. Ordainketa egiteko bi kontu korronte zenbaki zabaldu dituzte antolatzaileek, bata BBK bankukoa (ES15 2095 0036 62 5060246189) eta, bestea, Laboral Kutxakoa (ES43 3035 0042 95 0420011426), eta kontzeptuan barnetagia eta parte hartzailearen izen abizenak zehazteko eskatu dute.

Halaber, barnetegian daudela bertsozaleek dirurik beharko ez dutela nabarmendu dute, mugikorraren erabilera “oso mugatua” izango dela zehazteagaz batera. Aforoari dagokionez, hori ere “mugatua” izango dela azpimarratu dute antolatzaileek eta, horregatik, parte hartzaileen zerrenda osatzeko izen emate ordena eta eskualdeen arteko oreka eta generoa hartuko dituzte kontuan.

Gazteek barnetegira eraman beharrekoak ere dituzte: Osakidetzaren txartela, lo zakua, mendirako oinetako erosoak, kirolerako arropa eta etxeko zapatilak. Hala ere, edozein zalantza gazteen bertso irakasleari galdetuz edo bulegora deituz —94-681 27 11— argitu ahal izango dela argitu dute.

2026ko kultur ekintzak antolatzeko bilera deitu du Gautegiz Arteagako Udalak

Busturialdeko Hitza — 2026-01-09 16:20:43

Urtea hastearekin batera, Gautegiz Arteagako Udalak bilera baten berri eman du. Hain zuzen ere, 2026. urterako aurreikusitako kultur ekintzak antolatzeko helburuagaz antolatu dute bilera. Zehaztu dutenez, kultur ekintza desberdinen proposamenak jasotzeaz gain, egutegiaren antolamendua egingo dute berta.

Eguenan (urtarrilak 15) jarri dute hitzordua, alegia, Gautegiz Arteagako Udaletxean, 18:00etan. Deialdia zabaltzearekin batera, herritarrak animatzera gonbidatu dituzte udal ordezkariek.

Lankidetza, erronka berriei aurre egiteko

Busturialdeko Hitza — 2025-12-10 09:00:48

Ikasleek jokabide bat barneratzeko modu aproposena joera hori ingurukoengan ikustea den jakitun, Montorre Eskolak teoriatik praktikarako jauzia egin du aurten. Gautegiz Arteagako eskolak Haizederreko ikasle, irakasle eta familiak hartu ditu zentroan, beraien eskola berria eraiki bitartean: “Laguntza behar zuenari laguntza ematen saiatu gara”, adierazi du Alain Ajuriagogeaskoa Montorre Eskolako zuzendariak.

Bi zentroak Eskola Txikien Sarearen parte dira, eta aurretik elkar ezagutzen zuten. Natxitukoak pare bat ikasturtez beraien egoitza utzi behar zutela jakitean, irtenbideak bilatzen aritu ziren, eta bazirudien Ibarrangeluko Kultur Etxera lekualdatzea zela ideia onena. URAk baina, ez zien behar zuten baimena eman. Egoera horretan, Montorrekoek aurrerapausoa eman eta beraien instalazioak eskaini zizkieten: “Elkar ezagutzen genuen, eta ateak zabaltzeko esfortzua egin genuen. Guk bakarrik eskaini genien laguntza hori”.

Bai ikasleak, bai irakasleak “pozik eta motibatuta” badabiltza ere, Montorrerentzat hasieratik “erronka” izan da aurrean dutena: “Bi eskola batu ditugu, ikasle, irakasle eta familiak, eta elkar ulertu; ikasleen onerako antolamendurik onena egiten saiatu gara”. Iaz Bizkaiko eskola txikiena izan zen Gautegiz Arteagakoa, 22 ikaslegaz; aurten, berriz, 105 ikasle inguru daude.

Bi eskoletako ikasleak elkarrekin daude ikasgeletan, eta balorazioa “positiboa” da: “Oso aberasgarria izaten ari da lagun gehiago egitea eta esperientzia eta ikuspuntu ezberdinak aztertzea”. Montorren sentsibilizazioa, elkarri laguntza eta herrigintza bezalako gaiak ere jorratzen dituztela nabarmendu du Ajuriagogeaskoak, lankidetzagaz ikasleei “adibide praktikoa” eman gura izan dietela azpimarratuz.

Oso eskertuta.
Zuzendaria “oso harro eta eskertuta” agertu da Montorre Eskolako familiekin, egoera berrira moldatzeko “esfortzu itzela” egin baitute. Gainera, horien eskuzabaltasuna ere eskertu du, “beti laguntzeko prest” daudelako. Halaber, Gautegiz Arteagako Udalaren partetik jasotako laguntzagaz ere pozik agertu da: “Oso eskertuta gaude”. Eskola komunitatearen parte ez diren herritarrentzat ere hitz politak gorde ditu zuzendariak, egoera berri horrek horien “egunerokotasuna moldatu” duelako, horien “lankidetza eta esfortzua” balioan jarriz.

Hala, Montorretik “gauza politak egiten” jarraituko dute, iaz grabatutako abesti eta bideoklipean esan legez, beraien identitateari eutsiz: Euskara eta biosfera.

Bigarrenak ere ez du hutsik egin

Busturialdeko Hitza — 2025-11-04 13:49:45

Gautegiz Arteagako Gazte Asanbladak bere ibilbideko bigarren mendi irteera egin zuen iragan asteburuan. Joan den domekan [azaroak 2], gazte zein nagusi herriko plazan bildu ziren, 09:00retan, elkarregaz Atxarre mendi tontorrerainoko bidea egiteko. 20 lagun inguruk parte hartu zuten, eta pozarren zaldu dira antolatzaileak.

Argazkia: Gautegiz Arteagako Gazte Asanblada.

Inguruko “baso, bidezidor, auzo eta tontorrak” hobeto edo hurragotik ezagutzeko aukera eduki zuten gaztetxoenek, eta ibilbidearen amaieran, gainera, indarrak berritzeko tarteaz ere gozatu zuten, poteo giroan elkartu baitziren. Guztira, lau ordu inguruz aritu ziren oinez, eta 18 kilometro bueltako ibilbidea bete zuten.

Argazkia: Gautegiz Arteagako Gazte Asanblada.

Urrian, Ereñozar mendira antolatu zuen lehen irteera Gautegiz Arteagako Gazte Asanbladak; 25 lagunetik gorako parte hartzeagaz eta orduko emaitza ona ikusita, azarokoa, bigarrena, haren konfirmazioa besterik ez da izan.

Gaztainen bila joan eta giro ederran bueltatu dira arteagarrak

Busturialdeko Hitza — 2025-10-13 15:45:18

Tradizioagaz jarraituz, atzo (urriak 12), ospatu zuten Gaztañerre Eguna Gautegiz Arteagako haur, gazte eta nagusiek. Beste urte batez, Montorrealdeko Guraso Elkartearen deiari erantzun zioten herritarrek, eta gaztainak batzera joan ziren Atxarre inguruetara. Azken urteetan baino jende gutxiago batu zen arren, “lagun giro ederrean” ibili ziren hara eta hona gaztainak topatzen. “Azken urteetan baino jende askoz gutxiago bertaratu zen. Jende gehiago espero genuen, baina dena dela, dena atera zen ondo eta giro polita sortu zen”, esan dute antolatzaileek.

Gaztañerre Egunean bildu ziren arteagarrak.Montorrealde Guraso Elkartea

Alde batera eta bestera joan behar izan zuten, ez baitziren egon aurreko urteetan beste gaztaina. Zehatz esateko, 17 kilo gaztaina bildu zituzten; iazko 38,5 kiloetatik urrun ibili dira, beraz, aurten arteagarrak.

Herrigunera bueltatuta, ez zioten ohitura bilakatu den gaztaina bilketaren apustuari hutsik egin, hainbat herritar saiatu ziren asmatzen zenbat kiloko sakua batu zuten.

Gaztainen kopuruari buruzko apustua egin ostean, horiek jateko unea iritsi zitzaien, eta antzinako erara prestatuta jan zituzten horiek; izan ere, tanbolinean erre ohi dituzte urtero. Aurten ere, pintxoak jateko aukera ere eduki zuten Montorrealde Guraso Elkartearen eskutik, giro ederrean, gainera.

Gaztañerre Egunean bildu ziren arteagarrak.Montorrealde Guraso Elkartea