Musikazale guztientzako hamabi emanaldi, udako kontzertuetan
Uztaila eta abuztua bitartean egingo dira Udako Musika Jardunaldiak aurten. Organo emanaldiak eta nazioarteko Folklore Jaialdia ere egingo dituzte
Udako Musika Jardunaldiak uztaila eta abuztua bitartean egingo dituzte, hamabi emanaldiko kartelarekin. «Kutsu ezberdineko musika estiloak egongo dira: Musika klasikoa, korala, gitarra, zarzuela, eta musika korala», azaldu du Iñigo Magunagoikoetxea kultura zinegotziak. Jazz eta blues musika emanaldiak ere egongo direla adierazi dute, jardunaldien aurkezpenean.
Antolatzaileek, uztailaren 23an egingo den Nazioarteko Folklore Jaialdiaren garrantzia ere adierazi nahi izan dute, Irlanda eta Errusiako dantza taldeak bertaratuko bai dira. Honekin batera, abuztuan, Gernika-Lumoko jaietan, Pariseko Musikal Handia ere aipatu du zinegotziak. Azpimarratzekoa da, bertan parte hartzen duten dantzari, aktore eta abeslariek, 30 pertsona baino gehiagoko taldea osatzen dutela, «ikuskizun garrantzitsua ikusteko aukera egongo da», azaldu du .
Jardunaldi hauek antolatzeko arrazoia, Gernika-Lumon dagoen musika kultura kalera ateratzeko grina, izan dela azaldu dute. Ekitaldiak toki ezberdinetan egingo dituzte, Jai Alai pilotalekuan, Elai Alai aretoan, Lizeo antzokian, Euskal Herria Museoaren kanpoaldean, eta baita Mertzedeko komentuan, Andra Mari elizan eta Lumoko San Pedro Elizan.
«Alde ekonomikotik, kontzertu gehienak dohakoak izango dira, eta ordaindu behar diren emanaldietan publiko guztientzako moduko prezioak jartzen saiatu gara», azaldu du Magunagoikoetxeak.
Beste zaleentzako musikak
«Urtero bezala, bertako talde baten emanaldia ere sartzu dugu jardunaldi hauetan», azaldu du Ricardo Abaunza, Kultur Etxeko zuzendariak. Aurton, Gernika-Lumoko, Gaudeamus korala izango da jardunaldiak irekiko duena, uztailaren 1ean, Jai Alai pilotalekuan.
Uztailaren 2an aldiz, Sara Maria Guerrero, Zamorako gazteak zarzuela gitarra erakustaldia emango du Elai Alai aretoan. Hainbat sari eta errekonozimendu irabazi dituen gaztea, Bilboko kontserbatorioan egiten duten urteroko lehiaketa irabazi ondoren dator. Udalak eta kontserbatorioak duten akordioari ezker etorriko dela adierazi du Kultur Etxeko zuzendariak. Akordioa lau urtez burutu dutela azaldu du berak, eta nahiz eta datozen musikariak gazteak izan «maila oso altuko artistak» direla adierazi du zuzendariak.
Uztailaren bederatzian berriz, Lizeo antzokian, Bilboko Zabalguneko Korala Masa Coral del Ensanche egongo da, lau bakarlari, abesbatza eta piano jole baten laguntzarekin. Ariak eta bakarkako abestiak egiteaz gain, piezak antzeztu ere egiten dituztela aurreratu dute antolatzaileek.
Hurrengo egunean, uztailaren 10ean, Lizeon ere bai, Edith Piaf abeslari frantsesari omenaldia egingo diote. Estefania S. Wulf eta Iñaki Miguel Caminok osatzen duten Paddam bikote donostiarraren eskutik etorriko da kontzertua. Omenaldia, abeslari entzutetsu honen jaiotzaren mende urteurrena ospatzeko egingo dute. «Piafen abestiez gain, omenaldi honetan, ospetsuak diren beste abeslari frantsesen kantak ere interpretatuko dituzte: Salvatore Adamo, Jacques Brel, Charles Aznavour… besteak beste».
16an, Juan de Diego Hirukoteak jazz kontzertu bat emango du Euskal Herria museoan. Aurreko urteetako formatuari jarraituz, Euskal Herria museoaren konpoaldean egingo dute emanaldia, musika kalera ateraz. Formatu berean, Bocinegro Blues eta Aiko taldeek ere saioak egingo dituzte Euskal Herria museoan, uztailaren 19an eta 30ean, hurrenez hurren. Euria eginez gero, kalean egingo diren emanaldi hauek, Elai Alai aretora mugituko dira.
Bocinegro Blues, Fuerteventurako taldea, hainbat jatorriko partaideek osatzen dute, jatorrizko blues musika doinuak bertaratuz.
23an aldiz, Nazioarteko Folklore Jaialdia egingo dute. Urtero errepikatzen den jaialdi honetarako Absolutely Legless, Irlandako dantza tradizionalen taldea egongo da. Klake eta gaeliko kulturako dantzak erakutsiko dituzte. Errusiako Bachkortostan errepublikatik, Miras taldea ere bertaratutako da jaialdira. Jantzi ikusgarriekin eta Uraletako dantza tipikoak ikusteko aukera emanez. Bertako enbaxadoreak aldiz, Galdakaoko Andra Mari Dantza Taldea izango da; nazioarte mailan euskal dantza tradizionalen erreferentea hainbat urtez.
Jardunaldi hauekin batera, Urdaibaiko Organoen Zikloaren hamahirugarren aldia ere sartuko dute. Hiru emanaldi egingo dituzte, herriko organo ezberdinetan: lehena Ojos ciegos y turbados izenpean egingo dute Gurutze Beitia, Benantzi Bilbao eta Josep Maria Berenguer musikariek, Mertzede komentuan. Bigarrena Jordi Bergesek emango du, Andra Mari elizan; eta hirugarrena Joxe Benantzi Bilbao mundakarrak emango du Lumoko San Pedro elizan.
EGITARAUA
-Uztailak 1. Gaudeamus Korala, Jai Alai pilotalekuan, 21:00etan.
-Uztailak 2. Sara Maria Guerrero, gitarra kontzertua. Elaia Alai aretoan, 20:30etan.
-Uztailak 9. Masa Coral del Ensanche, zarzuela emanaldia. Lizeo antzokian, 20:30etan.
-Uztailak 10. Paddam bikotea, Edith Piaf musikariari omenaldia. Lizeo antzokian, 20:30etan.
-Uztailak 16. Juan de Diego hirukotea, Jazz kontzertua. Euskal Herria museoan, 21:30etan.
-Uztailak 19. Bocinegro Blues. Euskal Herria museoan, 21:30etan.
-Uztailak 23. Irlanda, Bachkortostan eta Euskal Herria, Nazioarteko Folklore Jaialdia. Jai Alai pilotalekuan, 21:30etan.
-Uztailak 25. Ojos de ciegos y turbados, organo kontzertua. Mertzede komentuan, 20:00ean.
-Uztailak 30. Aiko taldea, euskal erromeria. Euskal Herria museoan, 19:30etan.
-Uztailak 31. Jordi Verges, organo kontzertua, Andra Mari elizan, 20:00etan.
-Abuztuak 7. Joxe Benantzi Bilbao, organo emanaldia. Lumoko San Pedro elizan, 20:00etan.
-Abuztuak 15. El gran musical de Paris, ikuskizun musikala. Lizeo antzokian, 22:00etan.
